當問題少年遇上問題少女: 66.好似情侶嘅一對

「Polly同妳講左d咩呀?」
 
「你…你咪理啦!!!你好開心啦!!!人地錫你」梓晴塊面又紅佢又嬲咁講
 
「做咩呀?妳唔鍾意?」
 
「你…你嘅事關我咩事呀!!!」佢好嬲咁行開左
 
Polly見到咁樣，就行埋我身邊
 




「你自己係咪未有答案呀?」
 
「咩…咩答案呀?」
 
「之前我話…想你做我男朋友….你俾唔俾到答案我?」
 
「即係…Polly呀……其實…..」
 
Polly望一望我，然後同講
 




「我知道你鍾意果個，係Jessie，係唔係?」
 
「其實又唔可以話鍾意嘅，係有好感囉….」
 
佢拍一拍我膊頭
 
「你而家同佢一齊住，如果你覺得佢真係適合你嘅話。不妨同佢發展下囉」
 
「妳點解會…」
 




「因為我知道你唔會揀我，你放心喎，我唔係果D因愛成恨，要生要死果種人」
 
當日練習完後，梓晴嬲爆爆咁返屋企
 
食完飯後佢返左入房，關埋門冇出過黎
 
我係咪做左咩激嬲左佢?
 
第二日，我同佢同時出門口返學
 
等lift時，我係佢身邊不停問佢
 
「嬲完未呀?」「嬲完未呀?」
 
梓晴嘟起個咀好唔開心咁




 
但係佢都有理我
 
「你尋日好開心啦，人地錫你啦」
 
「咁我都唔知佢會咁做架嘛」
 
梓晴入到lift中仍然鼓起泡腮，所以我就不停咁篤佢塊面
 
佢好不滿咁鬧我
 
「你呀!!人地錫你你就接受?」
 
「係啦係啦，係我衰啦」我係佢面前扭耳仔認錯
 




「著緊校服架!!你出到去咪咁做呀!!!」
 
「同妳食早餐?」
 
「呢個當然啦!本郡主肚餓」
 
我地兩個去到學校附近間茶餐廳食早餐
 
依舊，佢食火腿通，我食沙牛麵
 
係茶餐廳內，有唔少我地兩間學校嘅同學係到
 
但係大家都係同校嘅坐返埋一齊，所以我地兩個就成為焦點
 
梓晴係檯底踢我一下




 
「唔?做咩呀?」
 
「我覺得好似好多人望住我地咁嘅?」
 
我抬頭望一望四周
 
「當然啦，成間餐廳得我地呢檯係一男一女食野，其他都係全女班全男班」
 
梓晴變得好尷尬
 
「咁樣…我地一齊食早餐會唔會唔好呀?」
 
「怕咩丫，我同妳都一齊住緊囉」
 




食好早餐，我同佢一齊過馬路，兩個人一齊行返學
 
對於有人送梓晴返學(即係我)，大家係佢背後都議論紛紛
 
因為暫時只有羽毛球隊知道梓晴已經改變左
 
佢係其他同學心中，依然係一個唔出聲、好孤獨嘅問題少女
 
我送到梓晴去信義里果到
 
「好啦，你唔好上去啦」
 
「妳冇問題?」
 
「有咩問題喎，反正…反正今晚都會見面架啦，而且今日仲要練波」
 
「呀….講起練波，Polly佢係咪負責單打?」
 
梓晴點一點頭「出賽陣容冇變，而且Polly話會幫你整件學校風褸俾你，同埋整件隊衫俾我地」
 
「隊衫呀?妳地設計呀?」
 
「聽講係Polly屋企個集團Sponsor，所以Maggie、Floerence同Caroline佢地果邊都會有件一模一樣」
 
一模一樣?咁樣我咪變左佢地真光一份子囉，我洗唔洗著長衫呀?
 
「差唔多夠鐘啦，有咩遲d再傾啦」
 
「妳晏就係咪同我食?」
 
「咁…唔同你食…我仲可以陪邊個喎」
 
我地兩個係真光附近係到傾計，就好似一對情侶咁樣
 
所以，我地引黎真光訓導組嘅目光