當問題少年遇上問題少女: 64.你想揀佢咪揀佢囉

“叮叮~叮叮~”
 
梓晴係電車上周圍望
 
「嘩….原來堅尼地城咁得意架?」
 
「係呀，新舊區交替」
 
「我仲以為呢到係全部舊區添」
 




「唔….妳想睇舊野?」
 
梓晴點一點頭
 
「一陣去上環我帶妳睇睇丫」
 
“叮叮~叮叮~”
 
慢慢電車去到海味街
 




「點呀?洗唔洗買返D補下咁呀」
 
「我都唔識煮嘅」
 
「妳唔係應該好叻煮飯咩?」
 
「係咩?」
 
「咁妳煮野咁好食，一定好叻」
 




「你呀!口花花」
 
去到近上環，我地落車，經扶手電梯上山
 
「妳以前…同屋企人有咩做架?」
 
「唔?冇架，阿瑪得星期日有得休息，佢放假咪係屋企瞓覺。額娘都係」
 
「所以妳咩地方都冇去過」
 
「嗯」
 
「咁睇黎我以後要帶妳去玩多D」
 
「真係?」




 
「呃妳做咩?」
 
梓晴眼中有少少淚光，再打左我一下
 
我帶住梓晴去到嚤囉街到睇野
 
「呢到好多舊野喎」
 
「係呀，當年會考有一課書，叫店舖，作者西西就係行黎呢到D後街黎睇舖」
 
「有特別嘅景色?」
 
「唔….可以睇到老香港囉」
 




經過一D街邊小檔，梓晴對D野好有興趣
 
我陪佢一齊睇
 
「呢枝係….」
 
「係髮簪黎架」
 
「妳點會知架?」
 
「我額娘有丫嘛」
 
「不如…買枝俾妳?」
 
梓晴拉埋我去一邊「傻架咩，你都識講呢到係地攤貨啦，我先唔會將呢D野插上我個頭到呀」




 
「咁我地再睇其他野丫」
 
係嚤囉街，四周都有好多舊貨
 
有月餅模、有刀刀劍劍，有民國大洋
 
甚至有雍正通寶(當然係假野啦)
 
梓晴拎出電話，搵返西西嘅課文黎睇
 
「唔….同內容相差好遠」
 
「當然遠啦，會考都不知冇左幾多年」
 




「不過仲有D舖頭留係到喎…呢間酸枝店…」
 
「妳真係咁認真咁，邊睇邊行?」
 
「咁先可以睇真D呀」
 
果晚我地兩個真係去挑戰自己生命
 
尋晚打完邊爐，今晚就食韓燒
 
個喉嚨一定會好痛，不過唔理啦，有得食就好食
 
呢個正正係我嘅名言
 
係韓燒餐廳內，我地兩個面對面坐
 
滋滋聲此起彼落
 
四周都係油煙，好肥膩嘅味道
 
梓晴燒好一堆牛肉，再放係我隻碟上
 
「估唔到，妳燒韓燒都有一手喎」
 
「只不過係一堆生嘅肉，俾我再熟之嘛」
 
的的確確，梓晴煮野真係非常好食
 
「今日做咩咁好請我食飯?」
 
「咁唔通要女仔出錢咩」
 
我燒左一堆肉之後，叫佢打開口
 
「餵妳呀」
 
「呀~~~~」
 
結果佢自己都係食到一咀都係
 
我地兩個食好飯，返去旺角到幫梓晴拎鞋，然後兩個人一齊返屋企
 
「妳今日攰唔攰呀?」
 
「同你去街點會攰」
 
「妳無啦啦要問Polly點著嘅?」
 
梓晴面紅紅咁講「咁佢……靚女嘛，又識襯衫」
 
我伸個頭埋去佢到
 
「定係有第二個原因呀?」
 
「咩…咩呀….咩原因喎….咁你想揀佢咪揀佢囉…同我講咁多做咩喎」
 
「咁我又冇話一定會揀佢嘅」今次輪到我細細聲講
 
「唔?咩話?我聽唔到呀」
 
「冇野呀!!」
 
梓晴明顯係聽到我講咩野，佢係我身邊不停咁問我
 
忽然，有一種生物係我地面前出現