當問題少年遇上問題少女: 53. 暫時平安的高手

「腦神經外科? Polly妳做咩事呀?」
 
果時Polly已經攤係我身上邊，然後聽到好多人大叫
 
「Polly…Polly佢暈低左呀!!!!」
 
Michelle大叫之下，好多人望哂過黎
 
未等教練黎到，我已經抱起Polly走出去信義里，直跑落窩打老道
 




正當我想橫過去廣華時，有部白車停低左
 
白車立即打開門，唔需要檢查，直接開車過對面廣華急症室
 
Polly立即被推入R房
 
我係門外等緊果時，護士出黎問我Polly病歷
 
「你係病人同學?」
 




「可以話係」
 
「佢因咩事暈低?」
 
「我唔清楚，佢剛先想叫我陪佢去仁安搵佢主診醫生」
 
「佢有咩病?」
 
「詳情我唔太清楚，不過佢主診醫生係腦神經外科」
 




「咁樣….我地幫佢照CT睇下先，麻煩你通知佢屋企人」
 
我一個人坐係外邊等果時，梓晴同幾個隊友，連同Maggie同教練一齊黎到
 
「Polly呢?佢點呀?」教練非常擔心咁問
 
「仲係R房，護士剛先叫我地通知佢屋企人」
 
「已經通知左佢屋企」
 
此時，有護士帶Polly去照CT
 
然後有醫生出黎詢問
 
「醫生，我係佢學校教練，我地個學生有咩事?」




 
「啊，係咁嘅，剛先我地聯絡佢係仁安嘅主診醫生，用電腦睇左報告，病人個腦入邊有個腫瘤，不過好彩係良性」
 
「咁佢洗唔洗轉院?」
 
「唔需要啦，我地同QE都有腦神經外科，仁安果邊都同意病人暫時留係呢到休息，有需要時佢地會黎做手術」
 
之後護士推住仲瞓緊嘅Polly出黎去照CT，然後推左去女性腦神經外科病房
 
我同梓晴，仲有Maggie、潘教練、Chloe、文浩等人坐係病房外
 
「腦腫瘤…….」梓晴自己係到講
 
「所以…Polly先將球隊交俾我同你……」
 




「即係佢預自己再打唔到波，以後?」
 
「點可以架….我同佢仲有場雙打未打完….仲有我同佢果場單打….」
 
梓晴雙手捂面係到流淚
 
潘教練走到佢面前，摸下佢個頭
 
「冇事嘅…冇事嘅知唔知，傻女，唔洗喊」
 
我係梓晴身邊陪住佢
 
大約30分鐘之後，Polly屋企人黎到，佢地第一眼，就認到梓晴
 
「佟梓晴」




 
「世伯….伯有…」
 
「妳唔洗擔心寶利，醫生話佢冇咩事，唔好再喊啦傻女」
 
「知…知道…」
 
然後佢地轉去望住教練
 
「唔好意思教練，我地個麻煩女應該…暫時唔可以打波住…所以…」
 
「趙生趙太，羽毛球唔重要，最緊要係Polly佢冇事，而且，Jessie會幫Polly打落下去」
 
然後趙生再睇一睇我地幾個
 




「請問係邊位抱我個麻煩女過黎醫院?」
 
我慢慢行出黎
 
「世伯….係我….我冇叫白車就擅自抱Polly出黎」
 
「做得好，你應該就係讀華仁嘅同學?」
 
「係…」
 
「我個女經常提起你，麻煩哂你啦」
 
「我…我應份嘅」
 
然後，我地聽到另一對夫婦黎到嘅聲音，不過佢地係黎鬧Maggie