當問題少年遇上問題少女: 52. Polly的秘密

坐埋一邊休息果時，Polly行埋黎同我地講
 
「留力呀兩個勇士」
 
「我汗都冇滴喎，仲唔係留緊力咩，21分我先得果6分」
 
「Jessie呀…」
 
「我留左力架啦，係Niki自己問題」
 




第二局戰況仍然同第一局差唔多，我地今日鬆左手，所以比數係21-14
 
係女雙果方邊，Michelle同Jeanie同人地就互有勝負
 
係混雙完左之後，Peter仔已經好快離開現場，只剩低Niki一個
 
佢有少許尷尬咁望住我，佢有d想坐過黎
 
梓晴見到咁嘅場面，佢好快咁走去我身邊坐低
 




女單永遠係最受注目嘅比賽
 
Polly係到做左簡單熱身之後，就準備上場
 
出場前，佢係袋仲拎左枝氣吸左啖
 
佢今場嘅對手，係佢一直以黎嘅老對手，可以話亦敵亦友嘅對手
 
九真羽毛球隊隊長Maggie
 




Polly今日精神有d恍惚，佢好似有d唔舒服咁
 
出場前佢仲去洗左個面
 
果時我剛係洗手間出黎
 
「Polly，妳冇事嘛，面色唔太好喎」
 
「冇….可能就快period到者….」
 
「不如妳休息下啦，叫Michelle代妳打呢一場」
 
Polly捉實我隻手
 
「唔…唔好…」




 
「不過妳真係好差喎」
 
「阿傑…你記唔記得果一件事?」
 
「妳指要我同Jessie幫妳帶羽毛球隊?」
 
「嗯」
 
我見Polly眼神好真誠，所以我點一點頭
 
「唔該哂你」
 
之後佢係學校到，雙手捉實我，再錫去我個咀到
 




Polly帶住病容去到場上
 
唔止係我，就連對手Maggie都發現Polly係有d唔舒服
 
不過Polly堅持要比賽
 
但係第一球，佢已經露出病意
 
Maggie接左Polly發嘅球，回返過去
 
Polly進行攻擊，第一下仲可以殺到波
 
之後Polly動作愈來愈慢，但係佢地兩個比分仲係相差一分左右
 
Polly對於Maggie嘅執著，真係好重




 
大約去到10-10果時，有一個人去左球證身邊叫暫停
 
「Jessie?妳做咩呀?」
 
「我幫妳打埋佢，俾妳塊拍我」
 
「不過….不過….」
 
「出去!」
 
Polly依然企係球場上唔肯走
 
「Polly呀…妳打唔到架啦，妳休息下啦」
 




「Maggie，連妳都咁講?」
 
「妳自己都知咩事，今日妳都冇狀態。妳想贏我嘅話，我係九龍塘等妳」
 
Polly係兩大高手威逼下，黯然離場
 
梓晴代Polly打埋餘下嘅比賽
 
佢同Maggie兩個打到好燦爛
 
雙方互有攻守，互有領先
 
係場邊嘅Polly已經乖乖地換返校服，靜靜到係到休息
 
終於完左場友誼賽
 
「Jessie….妳過黎丫」
 
Polly冇力咁叫梓晴埋去
 
「Polly?妳冇事嘛?」
 
「妳幫我去同隊員講幾句，之後就可以解散」
 
「我…我?」梓晴指一指自己
 
「嗯…..」Polly點一點頭
 
「從今日開始，妳係球隊副隊長，連埋阿傑兩個人，幫我帶住隊波」
 
梓晴依照Polly說話去左同隊員講幾句後，大家就解散
 
而Polly仍然係坐係到，佢個樣愈來愈唔舒服
 
「Polly呀，不如我陪妳去睇醫生先啦」
 
「睇醫生冇用架…你….你陪我去醫院丫…」
 
「醫院?得，我抱妳過廣華，等一等」
 
Polly擰一擰頭
 
「你送我去仁安啦，我個主診醫生係果到…」
 
「主診醫生?」
 
「嗯…」
 
Polly拎左醫生張咭片俾我「你打呢個電話搵王醫生…」
 
我望見張咭片，咭片上寫住腦神經外科專科醫生