當問題少年遇上問題少女: 46.正式同居

“天文台將於明日下午考慮發出一號戒備訊號，超強颱風…..”
 
去完Camp後一星期，我係屋企房中做功課，阿爸叫左我出黎
 
「傑呀」
 
「係!」
 
佢指一指電視俾我睇
 




「今個風唔野少，梓晴屋企一定擋唔住，上次件事你有冇同佢講呀?」
 
「有呀，佢都要考慮下」
 
「佢幾多號交租?」
 
「好似兩日後」
 
「咁你而家立即去接佢黎先啦」
 




「你講真架?」
 
「呃你做咩?」
 
我係梓晴屋企到，幫佢收拾細軟
 
「你阿瑪真係我叫搬去你到?」
 
「係呀，間房都執好哂」
 




「不過……怕唔怕俾人閒言閒語呀?」
 
「但係妳繼續住呢到，妳連今個風過唔過到都唔知呀」
 
「嗯…」
 
係個風未到之前兩日，我同梓晴執好哂佢屋企所有野，通知業主後，就搬左去我屋企到住
 
「梓晴呀」
 
「係!uncle!!」
 
「妳好好係到住啦，我地唔會迫妳走」
 
「知道哂，真係打搞哂啦」




 
梓晴係房到執好佢自己嘅行裝，佢慢慢將佢嘅野放係櫃入邊，仲有放係書檯上
 
我企係佢房門前望住佢放行李
 
「你做咩企係到?」
 
「冇呀…冇諗過竟然會同妳同居」
 
「如果…俾人發現左咁點呀?」梓晴應該有少許擔心
 
「放心啦，到時我會同人講我屋企租左間房俾妳住」
 
「咁我地洗唔洗前後腳返去練波?」
 




「邊洗丫，我地又唔係同校」
 
梓晴放好行李後，又開始溫習
 
另外佢都抽時間睇下比賽片段
 
有時阿爸會加把口入黎，所以我地兩個練習時間，係變相長左
 
而梓晴同我之間，又再親密左一步
 
阿爸阿媽叫得梓晴黎住，都會好好照顧佢，就連衫都幫佢洗埋
 
結果，我屋企開始出現少女胸圍、底褲，同埋佢果套長衫校服
 
我地練完波之後，已經係三號風球




 
今次個風真係好犀利下，三號波嘅威力同平時三號完全係兩回事
 
一出學校門口就差D企唔穩
 
同梓晴一人一把遮，冒住大風雨咁返到我屋企樓下商場
 
「嘩，今次個風真係好犀利，如果我仲住天台屋都唔知會點」
 
「好彩叫左妳黎咋」
 
「我間舊屋一定不停滴水」
 
我地行到樓下間惠康，梓晴就問洗唔洗買定D餸
 




「係喎，睇個勢呢個風影響好大」
 
我地入到惠康一齊推住手推車買野
 
「蛋…要買，屋企冇啦」
 
「妳點知架?」
 
「唔?打開雪櫃囉，唔…要買菜，你食咩菜多?」
 
「我唔食芥蘭」
 
「今晚佢地會返黎食?」
 
「當然啦，阿爸今日係site到整完防風就會返，阿媽都好快返」
 
「你記住同佢地講我地買左餸啦」
 
「得啦!講左啦」
 
「唔….買定d魚旦牛丸，我知你鍾意食烏冬」
 
「丫…妳又咁瞭解我嘅」
 
「我叻囉」
 
梓晴的確好叻女，佢係一班師奶黎買野之前，就買好成個星期嘅野，仲存放得好好
 
係佢搞掂廚房野之後，再煮埋午餐俾我地
 
當然碗又係我洗啦