當問題少年遇上問題少女: 32.其實拖下手唔代表乜野

「頭先你俾Polly吸走左呢?」
 
「下….妳咪亂講啦，有妳係到，我邊會咁易俾佢吸走呀?」
 
「真係?」
 
「做臣子點會呃郡主呢?」
 
「如果你想搵Polly做福晉，我唔會介意喎」
 




「點會呢?我只想係郡主身邊侍候郡主」
 
可能梓晴冇諗過我會咁講，所以佢聽到之後面紅紅咁
 
有一d應該係梓晴同阿靜嘅同班同學黎左，應該係黎睇文浩架啦
 
但係當佢地見到我同梓晴傾計係到笑果時，佢地都表現得唔知講咩好
 
因為梓晴係其他同學眼中係一個好Cool、唔識同人相處嘅怪人
 




但係今日，佢竟然會同我傾得好開心
 
阿靜走埋去佢d同學身邊
 
「呢個呢，就係文浩同班同學傑仔，佢係亦都係Jessie混雙拍檔」
 
「喂喂阿靜，仲有果樣呀…」
 
「哦…係喎，佢仲係第一個可以係羽毛球場上打低Jessie嘅人」
 




「佢…可以打低Jessie?冇可能喎」
 
梓晴出奇地同其他同學講野
 
「冇錯，我係單打上輸左俾佢，不過呢…」
 
梓晴望住我
 
「我終有一日會贏返佢一次，一定」
 
即係下戰書啦嘩?
 
「嘩嘩嘩，我地有眼福啦，我地就等Jessie妳嘅反擊戰啦」
 
之後阿靜補左一句




 
「但係妳唔會愛上佢架呵?」
 
我地兩個同時聽到阿靜咁講後，一齊面紅
 
而佢其他同學係到加把咀
 
「好難講呀，難得有個男仔咁襯Jessie，可以融化左佢」
 
「妳…妳地唔好亂講…」
 
「定係傑仔你仲掛住Niki呀?九真果個Niki?」
 
「嘩…你連ex都係我地姊妹校架?」
 




「我..我冇掛住佢呀，咪玩啦喂」
 
「定係你鍾意Polly呀?」
 
阿靜咁講，其他人立即起哄(包括梓晴)
 
「好啦好啦，放過我啦」
 
「算數!放過你」
 
再係羽毛球隊房內點算物資，應該差唔多齊哂
 
梓晴今日都係要幫人補習，所以佢要走先
 
係我正諗緊呢幾個鐘係咪去老闆到打躉果時，Polly係我後邊拍左一拍




 
「喂，陪下我丫」
 
「唔?妳想去邊?」
 
「冇所謂啦，你一陣有咩地方去?」
 
「唔….我冇野做呀」
 
「咁陪我行街啦」
 
Polly同Jessie睇嘅野係有唔同。梓晴佢鍾意睇嘅係實用d嘅野，或者書，而Polly鍾意睇衫同精品之類。呢個可能同佢地兩個嘅家景唔同有關
 
係商場內，我同Polly兩個人係到行，有時Polly會撓住我
 




我下意識望一望佢隻手，而Polly亦同我對望
 
「你怕Jessie唔鍾意?」估唔到佢第一句就單刀直入咁問我
 
但係我同梓晴又冇咩關係，怕咩呢
 
「唔?我同Jessie有咩事?」
 
「冇呀，見你地兩個最近冇哂D火爆場面，而且close左好多，有時又一齊出現，你同佢唔係拍緊拖咩?」
 
「唔係唔係，我同佢係拍檔…上次我幫左佢，佢慢慢開始接受我同我熟絡者」
 
「真係?你同佢拍拖我冇所謂喎」
 
其實當時Polly已經由撓住，變成拖住我
 
我又再望一望我地隻手
 
「拖下手唔代表咩d者」
 
Polly拖住我係商場到行，佢亦都乘勢問我其他野