當問題少年遇上問題少女: 31.親自下廚嘅拍檔

「妳而家有哂裝備，似返個校隊成員啦」
 
「你地….對我咁好….我可以點報答你呀?」
 
「下?我幫妳都冇話要求回報」
 
「不過阿瑪講過，人地幫左我，一定要報答人…」
 
「咁呀…妳請我食飯囉」
 




「嗯…好呀，如果你唔嫌我屋企細同亂」
 
「我都上過去啦，買上妳屋企食?」
 
「我煮俾你食」
 
「咩…咩話?」
 
我係咪聽錯?梓晴佢話煮俾我食?佢煮飯俾我食?
 




「妳煮?」
 
「係呀」
 
第一次聽到有女仔話煮飯我食，我個心跳得好快。上次拍拖，唔好話煮，Niki連掃下街都唔肯。如今，梓晴話煮俾我食
 
「不過有條件架」
 
「咩呢?」
 




「你洗碗囉」
 
「成交」
 
於是我同梓晴去左買餸，再返上佢屋企，兩個人煮飯仔
 
估唔到佢煮起飯上黎有版有眼
 
「做咩望實我呀?」
 
「冇，估唔到妳煮飯咁叻者」
 
「下?我自已照顧自己幾年啦，點會唔識煮飯呀」
 
梓晴佢整左幾樣餸出黎，每樣都好好食




 
「妳真係入得廚房出得廳堂，邊個娶到妳，真係佢福氣」
 
真係，梓晴煮野好好食，係呢個時候睇真D，佢面紅紅咁望實我
 
「你…無啦啦咁講做乜」
 
「讚妳囉，唔通踩妳咩」
 
「算你啦」
 
我地兩個食完晚飯，我就乖乖地去洗碗，然後先離開梓晴屋企
 
今次真係第一次有女仔煮飯我食
 




係入camp前，係唔洗練波嘅日子，不過梓晴同Chloe佢地要補課
 
我同文浩就要為入camp而準備
 
「羽毛球」「齊」
 
「球拍」 「齊」
 
「計分板」 「齊」
 
我地兩個男仔幫班女仔係到點行裝
 
估唔到班女仔唔止帶好多裝備入去，佢地仲帶左
 
「麻雀」 「齊」




 
「啤牌」 「齊」
 
「UNO」 「齊」
 
其實我地係一齊去練波定做打雜?
 
Polly係我地身邊一齊點野
 
「點解妳唔洗補課嘅?」
 
「唔?我尋日補完啦，做咩呆左咁望住我呀?」
 
「我…我第一次見妳著校服」Polly著起套校服，同佢著運動服同便服果時係完全唔同
 




Polly著起套旗袍校服時，佢同我心中嘅女神好似樣
 
「做咩呀?你第一次見我著校服咩?」Polly對住我笑住講
 
「套校服…好襯妳」我俾面前嘅Polly深深咁吸引住
 
今次到Polly面紅「你鍾意…你可以日日接我放學架，咁咪日日有得睇囉」
 
「傻…傻啦…..妳咁多人追」
 
Polly伸出隻手捉實我個鼻，之後轉身就走左
 
然後文浩拍一拍我膊頭「犀利喎….連Polly都俾你收伏到」
 
「你…咪亂講呀….Polly唔係我可以高攀得起」
 
「定係咁講呢，除左Polly之外，仲有個俾你揀」
 
「邊個呀?」
 
「Jessie囉」
 
「傻啦…佢地d真光妹唔係我高攀到嘅」
 
「你仲掛住Niki呀?你連果兩塊拍都送埋俾Jessie啦」
 
「唔….即係…」
 
「我明嘅….初戀係難忘d嘅。你都可以開始段新感情」
 
「你呢D熱戀中嘅男人，點會明呀」
 
呢句野未講完，Chloe已經唔理呢到係佢學校範圍，飛出黎拖實文浩
 
而梓晴就係我後邊拍一拍我
 
「喂，係到準備緊?」
 
我一轉身望到著住真光校服嘅Jessie，佢俾我嘅衝擊比起Polly更大
 
Jessie扎起左佢地學校傳統嘅孖辮，係佢白白嘅皮膚下，露出左個微笑
 
Jessie同Polly嘅美貌係不分上下，只係Jessie有個眼袋，始終佢係窮家女，冇Polly有咁多護膚品