當問題少年遇上問題少女: 33.點解你會揀佢?

「其實點解你當初會同Niki拍拖嘅?」
 
「下….當初呀?」
 
「嗯，你地點識架?」
 
「即係咁….我同佢係球場上識嘅…」
 
「唔?點樣?」
 




「唔……有次我地去一個同學屋企個會所打波，果時我又係場邊休息。然後見到Niki自己一個人坐係到悶緊，佢又見我坐係到，所以佢就問我打唔打波」
 
我停左一停再諗返當時情況
 
「我見佢有D悶，所以咪起身陪下佢打波囉」
 
「然後就鍾意左人地啦?」
 
「都唔係嘅，之後有一日放學我要去又一城買野，突然有女仔拍我膊頭，我先認到係佢，然後我送佢返屋企再交換聯絡方法咁囉」
 




「咁由認識，到拍拖，用左幾耐?」
 
「用左呀….唔…大約一個月囉」
 
「咁都好正常」
 
我地兩個坐係Starbucks到飲野
 
「妳呢?妳d男朋友s又點呢?」
 




Polly啜一啖果汁
 
「佢地?唔…有d係補習識，有d係網上識咁囉」
 
「妳識得嘅一定非富則貴」
 
「咩呀，唔係架，我之前同個大學生拍拖，佢唔係好有錢架咋」
 
「呀…其實妳屋企做咩，點解可以係京士柏有兩個單位?」
 
「我屋企?我屋企開餐廳同糖水舖囉」
 
「Woo~生意人」
 
「咁你屋企呢?」




 
「我呀?我爸爸係工程師，媽咪係普通文員」
 
「咁你點解會打波嘅?」
 
「我呀?受爸爸影響囉」
 
「你爸爸教你打波?」
 
「係呀，我所以技術都係爸爸教我」
 
「但係佢而家仲有冇打波呀?」
 
「冇lu，佢係十幾年前斷過十字韌帶，球員生涯結束左啦」
 




「佢咪好失望囉」
 
「佢又冇嘅，起碼佢試過係公開賽拎過獎丫」
 
「香港公開賽?」
 
「係呀，佢拎過第三」
 
「咁你係佢傳人喎」
 
「我仲未學哂佢嘅技術同臨場心態，我之前試過同佢打過，我仲係輸俾佢，仲係俾佢大炒果隻」
 
「唔…睇你打波，你真係好有攻擊性，發球果一下已經係攻勢，真係心血少D都會嚇親」
 
「真係好有攻擊性咩?」




 
「點會冇，一回個波俾你，你下一個動作通常就係殺波，仲要非常快果隻。如果企唔啱位，肯定救唔到波」
 
聽到Polly咁講，我又諗起梓晴所講嘅野
 
「其實我爸爸好易就破到我嘅打法」
 
「真係?點破呀?」
 
「唔講妳知，等妳自己諗下」
 
「哼!我一定會諗到嘅」
 
破我打法唔難，爸爸每次都係以慢波黎破我招數，或者猜空兩邊，等我唔可以踏順步伐去殺波。然後慢慢將節奏帶返去佢到，再突然間快攻
 




咁就可以贏到我
 
佢話過我嘅打法，出到去公開賽，最多去到八強
 
因為一遇上同我類似打法嘅球員，我會變到好心急
 
今次俾人呃左黎打混雙，希望可以改下我d打波比賽心態
 
「你爸爸應該教左你好多野喎」
 
「係呀，由握拍開始，教左我好多野」
 
「握拍都要教?」
 
「每次都要由基本功開始練習」
 
「所以你基本功就咁扎實啦」
 
我飲一啖咖啡
 
「妳功力都唔差呀，我見妳上次練波都好輕鬆」
 
「同你差唔多者」
 
「係喎，今個訓練營會有咩搞作架」
 
「唔…..第一日入到camp咪俾大家放鬆下，玩下遊戲，當晚可能由教練下廚。第二日開始有d團隊遊戲同練波,，夜晚bbq。最後一日就係例牌影相之類」
 
「教….教練下廚?佢會煮d咩架」
 
「唔知架，應該都食得嘅」
 
我同Polly行到咁上下，我又送佢返屋企
 
佢屋企我都去過幾多次，次次都係送到佢大堂就走
 
送完Polly之後，我走去梓晴屋企。去到佢自已整嘅羽毛球場，自己係到練發球