當問題少年遇上問題少女: 13.第一張的合照

「剛才果幾球，好精彩」佢微笑咁對住我講
 
「撞彩者，邊有咁好波」
 
「如果次次都可以瞄準網頂黎打，我相信唔係好彩，我都係第一次見Jessie打波咁狼狽」
 
「妳過獎啦Polly姐，妳係到等我地咩事?」
 
「放心啦，我唔係想同你1 on 1」
 




我大約知道Polly等我係為左咩，所以我好快咁拒絕佢先
 
「一開始講明，文浩先係落場比賽果個，我唔會搶佢個位」
 
Jessie返到自己位於天台嘅屋企，自己拎塊球拍出去自制嘅球場係到不停練波
 
「點解會輸俾佢呢?呢個對手好有挑戰性。如果佢同我拍檔的話，我地會唔會贏到呢?」
 
而家，每個人心中都有自己嘅計畫，希望將呢對聯校混雙組合，為大家帶黎一d衝擊同新鮮感
 




我同文浩Chloe坐係starbucks入邊，佢地都係到問緊我對Jessie嘅睇法
 
「其實佢實力好犀利，佢帶住人打嘅節奏好快，如果一跟唔上就會好快輸」
 
「係…我上次同佢1 on 1就係俾佢打亂左節奏」
 
「不過我覺得Polly嘅level應該同Jessie差唔多」
 
「Polly姐?佢係單打真係好犀利架，同協恩同體藝打到好燦爛架」
 




「有機會都想同佢較量下」
 
「不過.... Jessie佢咁有天份，點解唔會打學界呢?」
 
「呢個係一個好大嘅謎團」
 
「如果你地想知，不過問下Polly姐丫」
 
「有冇問題架?」
 
「冇問題嘅，俾個機會你去接近我地個校花喎」
 
「校花?」
 
「係呀，Polly姐好多男仔追架，佢又係富家女，住學校後邊D豪宅，讀書又叻打波又叻，係一個好對象黎架」




 
文浩聽到之後細細聲講「哎呀~~」
 
「你哎咩呀!!!而定我唔好咩!?我對你唔好咩!!下!!!我好差咩!?」
 
文浩受到Chloe嘅炮彈式轟炸，原來袁崇煥嘅後人都只不過係一名九叔
 
於是第二日Polly就應邀出黎同我地去飲野，好彩Polly揀左尖沙咀海港城之中嘅starbucks，我幾驚佢會揀返學校附近呀，已經每日返學去果到架啦，如果連假期都去果到，我會死
 
我預早左一個鐘係尖沙咀到行，自己一個係誠品睇書，忽然膊頭俾人拍一拍，我轉身睇一睇，原來係Polly
 
佢今日著左件t shirt加及膝傘裙再加涼鞋，仲將佢把長髮放落黎
 
老老實實，佢真係好靚女，如果要形容佢嘅話…..佢有d似陳嘉倩嘅
 




「做咩呆左咁望住我呀?我好醜咩?」
 
「唔..唔係呀，Polly姐妳點會醜呢」
 
Polly笑笑口作狀打我「你呀，口甜舌滑」
 
佢睇一睇我手上本書笑笑口咁講
 
「估唔到你會睇呢D書架喎」
 
「哦…呢D呀?我求其搵咋」
 
「唔….『你是如此難忘記』做咩呀?你有情傷?」
 
「下….我覺得個作者寫嘅野幾好睇之嘛」




 
「懶浪漫，不過我鍾意」
 
「估唔到Polly妳都有可愛嘅一面喎，平時妳係球場到總係板起塊面對住其他人」
 
「咁做隊長，一定要有威嚴嘅」
 
「妳F.4就做到隊長，妳打波一定好叻」
 
「唔知呢?同我打一場你咪知囉」
 
Polly撓住我隻手周圍去睇野，佢睇嘅不外乎精品之類，呢一個真光女書院羽毛球隊隊長都有少女一面
 
「喂喂，拎你電話出黎丫」
 




「做咩呀?最新打劫手法?」我真係唔知佢想用黎做咩
 
Polly拎左我部電話再拉我埋佢身邊，於是我就同佢影左一張合照，相中嘅我地兩個好close，仲笑得好開心
 
我眼前嘅Polly笑得好天真，同平時嘅佢完全係兩個人
 
到左約定時間，我地兩個去到Starbucks坐低，等待袁氏夫婦黎