當問題少年遇上問題少女: 12.初次的對決

潘教練係一邊微笑，Polly就係場邊睇實，好似一早就知道結局
 
Jessie一如以往，好冷靜咁望住我
 
練習結束，潘教練叫哂所有冇JJ嘅隊員去做總結，而我同文浩就坐埋一邊休息
 
「點呀?Michelle、Jeanie，同佢地打左兩場，有咩評價呢?」
 
Jeanie有少少唔高興咁回答「教練妳又話佢地只係派二線過黎?點睇第二場果個都唔似二線啦」
 




「佢的確係九華羽毛球B隊，千真萬確」
 
「二線都咁嘅實力呀?佢D殺波完全唔似二線喎」
 
呢個時間，隊長Polly出聲
 
「不如咁講啦，常子傑的確係今年九華羽毛球B隊，但係冇人講過佢之前唔係A隊成員喎」
 
「佢係A隊?」
 




Polly點一點頭「冇錯，舊年為止佢都係A隊主力，不過因為有D事，佢唔再落場打學界，所以佢退去B隊」
 
潘教練望一望佟梓晴
 
「Jessie妳有咩評價?」
 
「教練妳要我同邊個拍檔我就會拍邊個」
 
「咁樣…」教練望實Jessie，然後拎起一塊拍遞俾佢
 




「去做妳想做嘅野啦，今日妳應該唔洗幫人補習」
 
「嗯…唔該教練」
 
正當Jessie行出去果時，Polly叫停左佢
 
「梓晴!!」
 
「唔?咩事呀Polly?」
 
Polly將佢塊拍遞俾Jessie
 
「用我塊拍啦」
 
Jessie冇伸手接過塊拍「唔該哂妳，唔需要啦」




 
佢係場中望實我，呢個時候，教練行過黎，但佢未開口，我已經拎起塊拍起身行出球場
 
Jessie想正面同我打一場單打
 
所有人都坐哂係場邊睇我同Jessie之間嘅練習，身為男士，我讓佢發球先
 
“啪!”Jessie開出一球好普通嘅發球，無理由第一球就由我展開攻擊，所以我就輕輕回返個波俾佢
 
Jessie一見到就踏前輕力回波，佢呢一下係一招陰招，將我迫上前場救波，等我打高個波之後再殺波得分
 
我亦一如佢所料，將個波打高，不過我係將個波打高，係向場邊打高，令佢冇辦法踏順黎殺波。而我救完波之後都立即返後場
 
果然我呢一下波，令到Jessie要退後橫身跳後殺波，就係佢唔順步，令到呢球速度一般
 




但係個波到我塊拍果時，我感覺到Jessie殺呢一球都好用力，睇黎佢係一心一意同我分高下
 
所以唔可以留力，我要尊重下呢個對手
 
擋左嘅波再飛到對面場區，Jessie將個波打返過我場區修正，準備再一次殺波
 
但係就當個波去到我場區時，我跳高殺左一下波
 
個波高速飛向網頂，係網頂輕輕挨左一下，所有力都俾個網瀉哂，個波慢慢冇力咁向Jessie場區，正當我以為呢一分可以拎到果時
 
Jessie已經快速走到網前撈高左呢一球
 
個波再次飛到我面前，係一個得分好機會
 
我一下殺波，羽毛球落地，係一球IN波




 
高手過招，一分已夠，呢一分得黎唔易。Jessie行出場邊
 
「Jessie?一分咋喎」
 
Jessie望住Polly，一句野都冇講
 
佢拎住背囊行到我身邊望一望我
 
「唔該哂你」放低呢句說話後就離開左球場
 
我同文浩換完衫後，就發現Polly係到等緊我地