［純愛短篇番外］以朋友之名嘅愛情，我地各自嘅單相思: 05. 十年多的喜歡

「Sorry，係我多口啦。」Eva講道，「只係有啲好奇，因為平時我地幾個一齊食飯，Alex同Gordon都會成日講呢啲話題，但你好少提起呢啲事。」

「哈，的確，但我已經有中意嘅人。」張子萊喺Eva覺得尷尬嘅時候笑咗一笑回答道，「係一個已經中意咗好多年嘅人。」

「好多年⋯？」Eva訝異地望向張子萊，心裏默默地失落：「原來一直都有中意嘅人⋯」

Eva望住張子萊，佢從張子萊上揚嘅嘴角中睇得出，佢好中意嗰個人

「點解你唔同佢表白？同佢講嘅話可能都有機會。」Eva好奇地問道





「一直都想表白，但一諗到會影響到我地本來嘅友誼，我就講唔出口。」張子萊微微搖頭

「你唔怕會後悔？佢可能會比人追走之類⋯」Eva追問道

「都怕呀～」張子萊笑咗一笑，「都會怕佢比人追走。」

「你地識咗幾耐呀？」Eva想知道多啲，所以一直追問張子萊

「好耐啦，都識咗⋯十幾年啦！」張子萊笑咗一笑，「我中意咗佢好耐㗎啦～應該都有十一二年？」





Eva一臉震驚，除咗係張子萊同佢講咗咁多之外，都係因為佢到呢一刻先知道，張子萊已經中意咗嗰個人十年以上

「咁你仲唔表白？」Eva打從心底感到疑惑，「你咁忍得！？」

「怕失去。」張子萊以三個字回應

因為呢三個字，Eva深深咁感受到張子萊對嗰個女仔嘅重視，重視到⋯寧願忍住唔表白，繼續做朋友，都唔想冒險失去佢

「睇嚟你真係好重視佢⋯」Eva心裏難受，但都要微笑着講道





「Eva。」張子萊認真地叫咗Eva一聲，Eva望向張子萊，「其實你條件咁好，應該有更適合你嘅人。」

Eva愕一愕然，張子萊嘅意思，佢當然明白，正因為佢中意張子萊

「哈⋯我都冇表白就比你拒絕咗兩次⋯」Eva耷低頭望住地上兩人嘅影子，兩人之間嘅空隙喺地上嘅影子中更似一道牆，「你一直都知呀原來⋯」

「你值得更好嘅人。」張子萊只係比咗一個簡單嘅回答

「既然你知道咗啦已經，咁我都直接講。」Eva停低步伐，張子萊見佢停咗落嚟，都停落嚟回頭望向Eva，「同事講嘅嘢係真，我亦的而且確係中意你⋯我冇諗到你原來已經有中意嘅人⋯」

「對唔住，但你真係值得更好。」張子萊認真地講道

「Cyrus，可能我咁講好過分，但你真係打算一直等佢？」Eva輕皺起眉頭，佢嘅倔強同好勝心令佢冇法放棄，「可能唔會有結果。」

「唔知，但係我一直以嚟都冇遇過比佢更可以令我心動嘅人。」張子萊輕輕一笑，「佢以外嘅人，我都冇考慮過。」





「我唔會咁輕易放棄，就算你拒絕咗我都好。」Eva認真地望住張子萊講道

「我知我講咩都好，你都唔會咁易放棄，但Eva，我敢肯定你會失望而回。」張子萊堅決地講道

「你就咁肯定？可能我可以打動到你呢～」Eva反駁道

「我對佢嘅感覺，我好清楚。」張子萊嘅眼中冇絲毫嘅動搖，「可能我咁講會令你難受，但係真係冇人比得上佢，就算你再靚再優秀都好。」

Eva嘅心被狠狠插咗一刀，張子萊嘅堅定更係補咗刀

⋯

「你唔好過嚟啦，你殺咗嗰個人先啦！」張子萊手上拎住手機，手機橫着拎，耳仔帶住耳機，「左邊呀李穎容！左邊呀！左邊呀我話！李穎容！」





「你見到唔救我！？」另一邊廂嘅李穎容亦將手機橫着拎，耳仔帶住耳機，「我唔理呀！我一定要拎到5殺！」

「你咪又係靠我carry你⋯」張子萊按下開局時講道

今晚兩人約好咗一齊打機，中學嗰陣一齊打過機之後就開始成日同對方一齊打機，到宜家都要抽一日出嚟同對方一齊挽、一齊做任務

「你今次唔好再掉低我一個自己走咗去呀！」李穎容嘅聲線略帶不滿地提醒道，「討厭鬼⋯！」

「討厭我唔好同我一齊挽呀～」坐喺梳化上嘅張子萊笑住講道

「唔得！今日講好咗要一齊打任務！」本來灘喺床上嘅李穎容即刻坐好起嚟

每個星期一齊打機嘅夜晚，對李穎容嚟講係最開心嘅時間，可以打機唔係重點，重點係可以聽到張子萊把聲








IG Link: https://www.instagram.com/nd_cotttoncandy/?hl=zh-tw