［純愛短篇番外］以朋友之名嘅愛情，我地各自嘅單相思: 06. 口不對心的秘密

打多咗兩、三場之後，李穎容先話有啲攰然後冇再開新局，但轉個頭佢就打電話比張子萊

「又話攰？打過嚟做咩？」張子萊起身行番房時順手將廳燈閂上

「打機打到攰，但又未眼瞓嘛～」李穎容瞓到被窩中，側瞓着邊講電話邊睇手機，「傾一陣就瞓啦不過。」

「今日有個女同事話中意我。」張子萊忽然間講嘅一句，直接剎李穎容一個措手不及

「咁、咁突然嘅⋯？」李穎容愣咗一下先識得比反應，「咁然後呢？」





李穎容嘅心就因為張子萊突然間講嘅一句而慌張起嚟，佢嘅心臟正用力地跳動着，每一條神經線都格外緊張

「拒絕咗。」張子萊緩緩地開口回答道

「呼⋯嚇死我⋯」李穎容喺心裏默默地鬆咗一口氣，然後又開口問道：「今次點解又拒絕？係人地唔靚定點？」

「唔係，佢靚，高學歷，身材唔錯，工作能力強。」張子萊淡定地開口講道

「咁點解唔要？」李穎容不解地問道





「唔中意，就係因為唔中意呀～」張子萊講道

「又唔中意⋯人地又靚又好身材仲要工作能力強，你都唔中意？」李穎容因為張子萊一句「唔中意」而鬆一口氣，又開始好似平時一樣同佢傾計，「真係要懷疑一下你係唔係gay⋯」

「我係直。」張子萊無奈地講道

「做好單身一世嘅覺悟未？」李穎容開玩笑一樣問道

「你自己都單身啦⋯仲話我⋯」張子萊不禁一笑，「你都要做單身一世嘅覺悟啦～」





「我先唔會單身一世！」李穎容頓時講道

喺電話另一邊嘅張子萊靜咗一秒

「有中意嘅人啦咩？」張子萊平靜地問道，縱使心中都係有啲擔心

「唔⋯冇喎咁又～」李穎容輕鬆地講道，「不過呢啲嘢，搵下就有㗎啦～」

「陣間人又搵唔到，嫁唔出呀～」張子萊開玩笑講道

「嫁唔出點算？」李穎容笑咗一笑，「唔緊要呀～你陪我唔結婚就得啦～」

「嚇死，我仲以為你叫我同你結婚⋯」張子萊無奈地講道，看似平靜嘅佢，心臟早就跳得快到好似要心臟病發一樣

「都幾好喎～」李穎容笑道，心裏當然想結婚對象係張子萊，諗下都覺得開心，「我同你嘅年紀又差唔多，同你又夾，都中你嘅要求呀～」





「拍拖同結婚係兩回事呀小姐⋯夾就可以結婚㗎啦咩？」張子萊反一下白眼講道，「咁結婚嘅話都要睇其他嘢㗎嘛～」

「例如呢？」李穎容好奇地問道

「做咩咁想知？已經決定好要嫁比我？」張子萊笑問道，心裏卻喺好開心嘅同時默默地覺得咁樣都唔錯

「痴線啦～我點會決定好要嫁比你！只係單純地好奇想知咋嘛～」李穎容頓時否認，此刻嘅佢臉頰紅到好似蘋果一樣，「講到好似我一定會單身一世咁⋯」

「好難講㗎～」張子萊講道，「可能會呢～」

「喂呀～你詛咒我嘅！」李穎容微微鼓起兩泡腮，「我到時真係單身一世係唔係你負責呀！」

「唔⋯我又冇咩所謂嘅～」張子萊輕鬆地講道，但佢卻唔係開玩笑，佢只係收起咗真實嘅答案，用「冇所謂」嚟掩蓋





李穎容對於張子萊嘅答覆有啲愕然，佢冇諗過張子萊會咁樣答佢，佢以為張子萊一定會話「我先唔要娶你⋯」之類嘅回答

「哼⋯可能你會搵到中意嘅人先呢～」李穎容試圖轉話題，將問題推到張子萊身上

「都可能會。」張子萊認真地回答道，李穎容聽到呢個回答，頓時輕皺起眉頭

傾多咗一陣兩人都因為聽日要番工而收線，本來開心嘅氣氛就喺收線後逐點褪去

李穎容側身瞓喺床上準備瞓覺，但一合上眼就諗起啱啱同張子萊喺電話入面講嘅嘢

「嘖⋯」李穎容瞓喺床上輾轉反側，完全瞓唔著，不禁諗道：「點樣嘅女仔先會令男仔想娶⋯？」

可以嫁比自己中意嘅人，係每個女仔都希望嘅事嚟；同張子萊結婚，李穎容連諗都唔敢諗，兩人連一齊都冇一齊過，仲講咩結婚？

李穎容嘅好奇心蓋過咗佢嘅睡意，佢直接拎起手機上網search





「男人同我相處起嚟覺得開心同舒服⋯」李穎容細細聲講道，「我成日都同張子萊一齊打機，佢唔開心嘅話都唔會同我挽啦～相處唔舒服嘅話，都唔會同我做朋友啦～」

李穎容自言自語地講道，然後又專注地睇下一個

「佢嘅屋企人都中意你⋯」李穎容頓時努力地回想

李穎容努力地回想，之前都已經見過張子萊嘅屋企人好多次，因為有時兩個人會一齊食飯，張子萊帶過李穎容番屋企，但只係以朋友嘅身份




IG Link: https://www.instagram.com/nd_cotttoncandy/?hl=zh-tw