［純愛短篇番外］以朋友之名嘅愛情，我地各自嘅單相思: 04. 是有喜歡的人吧

「去呀。」張子萊點一點頭，「做咩咁問？我去好出奇咩？」

「唔係呀～因為Eva問起我，所以我咪問下你。」Chole微微聳肩，「仲以為你要番屋企陪女朋友之類添～」

「冇女朋友陪邊個？」張子萊無奈一笑，「陪空氣呀？」

一個著住緊身裙、有着一頭黑色大波浪長髮嘅女仔行入嚟

「Eva，Cyrus話佢都去食飯。」Chole對行入嚟茶水間嘅Eva講道





「聽到啦啱啱。」Eva露出一個微笑

渾身止下散發着知性氣質嘅Eva，有着精緻嘅臉蛋、姣好嘅身材，但純對唔係一個花瓶，佢係一個有優秀工作能力嘅職場女性

Eva望向張子萊，但張子萊一眼都冇望佢，只顧着耷低頭睇手機

夜晚大家放咗工之後一齊去食飯，坐喺長櫈前嘅大家對於準時放工都好開心，張子萊嘅隔離坐嘅都係男同事，Eva同Chole坐喺佢嘅對面；大家聚餐都有講有笑，冇咩太大嘅問題

Eva望住嘅視線一直停留喺張子萊嘅身上冇移開過，張子萊感覺到手機一震，拎出嚟一睇，見到係李穎容嘅message，便頓時嘴角上揚回覆





「係中意嘅人⋯？」Eva喺心中猜測道，「定只係朋友⋯？」

Eva試探般輕輕地用鞋尖掂咗張子萊嘅腳一下，張子萊下意識縮腳，腳放後咗

「Sorry。」Eva微微一笑對張子萊講道

「唔緊要。」張子萊搖搖頭

Eva對張子萊嘅中意早就係成個部門都知道嘅事，只係人地講起嘅時候，Eva都只係當做係大家嘅玩笑一樣笑笑就算





「嗰日聽Chole講，話見你孭住個女仔喎～」坐喺張子萊身旁八掛嘅男同事們搭住張子萊嘅膊頭，「衰仔呀，拍拖都唔講呀！」

張子萊無奈一笑，Eva聽到後亦同大家一樣起哄，但卻默默豎起耳仔聽

「冇拍拖呀，朋友咋！」張子萊飲咗一啖啤酒，「諗多咗啦你班人！」

「送到人地番屋企呀？」坐喺張子萊右邊嘅男同事奸笑道，「嗰晚好快活啦一定～」

「痴線，諗咩呀！」張子萊不禁紅了耳根，「我咩都冇做，朋友咋真係！」

「Cyrus份人咁保守點會做啲咁嘅嘢呀～」坐喺張子萊左邊嘅同事講道，「而且佢份人咁gentleman點會做啲咁嘅嘢？」

「總之我咩都冇做啦～」張子萊笑了笑

「但你真係唔拍拖呀？人地呢啲年紀都已經做好結婚嘅打算。」啱啱先踏出社會幾年，年紀最細嘅Chole問道





「Chole你做咩？中意Cyrus呀？」坐喺張子萊右邊嘅男同事又講道，「等到你有Eva咁知性嘅時候先講嘢啦！定你想同Eva爭呀？」

「又講！？」Eva無奈地笑了笑，「講咗成兩年都仲講！」

Eva望咗張子萊一眼，見到張子萊聽到身邊同事咁講都冇反應，心裏其實有啲不忿

「我問下咋嘛！又冇話我中意佢！」Chole反一個白眼講道，「Alex你真係好無聊呀！」

「唔無聊邊有得笑啫？」坐右邊嘅Alex講道，「點解唔拍拖啫Cyrus？上星期隔離部門個Mandy唔係同你表白咩？隔離部門最高質嘅女喎～」

「唔中意人就無謂一齊啦～」張子萊講道，「如果同唔到中意嘅人一齊，我真係會寧願單身一世。」

「嘩～好man呀～」坐喺左邊嘅Gordon講道，然後望住Eva同Chole，「呢啲咪嫁得過囉！」





「唔好再講我啦！食飽啦咩！」張子萊無奈地拎起筷子夾餸食，「食嘢啦！」

喺完咗聚餐之後，大家都各自番屋企，張子萊同Eva同一個番屋企方向，所以兩人一齊行

Eva總係會偷偷望向張子萊，但張子萊卻唔會主動同佢搭話

「平時喺公司主動同我講嘢，都係講工作上嘅嘢⋯」Eva喺心中諗道，「我生得咁靚，但佢望都唔望我一眼⋯」

張子萊同Eva之間隔咗一隻手嘅距離，張子萊好安靜，咩都冇講，但Eva卻一直想主動開口同佢講嘢

「我嗰日聽Chole咁樣講完之後，仲嚇咗一跳，原來你有女朋友。」Eva先開口帶起話題，輕輕撥一下頭髮

「冇呀，仲係一個單身狗咋～」張子萊笑了笑，但仍然冇望Eva

「估唔到你會講出寧願單身一世嘅說話。」Eva笑了一笑，「唔好怪我八掛，雖然都有少少好奇，你真係冇中意嘅人咩？講得出『如果同唔到中意嘅人一齊，我真係會寧願單身一世』之類嘅說話，應該係有中意嘅人啦～」





張子萊選擇咗沉默，笑而不語；Eva眼見張子萊沉默不語亦只好尷尬一笑




IG Link: https://www.instagram.com/nd_cotttoncandy/?hl=zh-tw