男校病: 【8】
2011年12月17日。
仲好記得果日好多中學同學、成班好姊妹同埋親戚黎送我機。
我班姊妹真係唔話得，明明就黎考mock，都專程黎送機，搞到我鬼死咁感動，佢地仲親手整左D禮物我，入面有我地D合照，叫我到時擺係床頭，咁就可以無時無刻都見到佢地。
我有問過佢地，其實我咁樣就飛走去做逃兵，有冇話唔開心定嬲我，但佢地都覺得我已經盡左力，因為我係佢地眼中，我係果D永不言敗、絕無偷懶既人。
雖然，我覺得自己仲可以更加努力。
臨過關前，係機場禁區出面，媽咪佢流淚滿面，用佢隻好暖既手緊緊咁握住我，不斷千叮萬囑，叫我：「女！過到去人生路不熟，樣樣野都要小心呀！知唔知呀！」
我淨係「嗯」左一聲，我又見到班女仔個個眼又紅，鼻又腫。其實我果時心情好複雜，但係又唔想因為情緒太波動而影響到在場咁多人，所以我淚都冇流過滴。之不過，當我入到閘等登機果陣，成個人就崩堤咁一發不可收拾，自己坐左係登機閘口附近既櫈度，一邊低頭一邊啜泣。
因為我真係好唔捨得佢地……
坐係我身旁既鬼仔見狀，同我講左句「Are you alright?」，就遞左張紙巾我，搞到身邊d人都望住我，以為我係咪唔見左證件定身份證，結果令我好唔好意思咁去上機。
我第一次離開左陪我長大既屋企，獨個兒飛左去老遠舊東家，即係事頭婆個地頭度，讀書。係，由暑假果陣我已經決定要出外讀書，因為Form 6果陣真係考得唔係太好，雖然都合格升到上Form 7，但係班主任對我既情況就唔係咁樂觀。
「Carmen，你呢兩個學期都考得麻麻喎，如果你再唔勤力D既話，我怕你未必考到入大學喎！」Miss Chan少有認真咁同我講。
我知道佢唔係同我講笑，因為正常一個老師唔會無端端講D咁既野去打擊學生自信，而係我真係未必入到。
「但係我平時都做好多sample paper同寫notes架啦……」我答佢。
「咁可能係你方法用得唔岩。你要知道，如果用錯方法，溫書既效果同你付出既時間未必係成正比既。」Miss Chan講。
「Miss Chan Chan…咁我可以點做呀，我好想升大學。」
「平時有冇搵其他練習做？學校出面果D？」Miss Chan問。
我見佢咁問，即係兜個圈想叫我出去補習或者買書做姐…….
「有就有，不過好多out sy.野，我覺得學唔到d乜。」
「咁都好過咩都唔溫啦，其他同學都好比心機架！你都加油啦！有咩唔識就問我啦！」Miss Chan又答。
為左專心應付個試，我好唔忍心咁同學校講我要退出校隊，即使Form 7係我最後一次打學界，我都唯有放棄呢個機會。
排球隊上上下下都對呢個突如其來既消息而震驚，個個都起晒係咁問我係咪發生左咩大件事，其實我真係冇野，只係想放多D時間去讀書。
人地比我付出少時間，但換來既成果更我比豐厚，簡單d黎講係我讀書資質唔夠，既然係咁，我要比人付出多幾倍努力。
因為我真係唔甘心，大學唔理得你運動幾叻，除非你勁到入港隊，Kong U都可能仲有特別offer比你入，但係我又遠遠未到呢個程度，所以我唯一可以做到既，就係quit校隊。
屋企人都覺得學業為重，佢地好支持我離隊呢個決定。
之不過，我係暑假果陣就同屋企人商量，不如出去外國。
初時佢地好反對，因為屋企真係冇咩錢，可以話係要節衣縮食先僅僅夠我去讀書，爸爸媽媽每人都做緊份公務員工，所以政府先貼番少少錢比我地。
我同屋企人講，不如我去到果邊搵part time做，可以幫補下生活費，但佢地又唔想我做野做到捱壞身體，又驚我係果邊會遇人不淑，所以寧願幫得我就幫。
後尾，係英國既Auntie話可以照顧我，我屋企人先放心，所以就比我過去。
最後，係臨考A-Level前既四個月前，我就退左學，去agent搞掂晒student visa同其他野，準備過英國。因為我都估到，以我咁既成績，要有offer真係好難，與其揀副學士，倒不如出國殺出另外一條路。
一去到London，我仲又係希斯羅機場度等轉內陸機，由飛機落到出面既時候，寒風凜冽，個天仲開始落緊雪黎，結果班機又要Delay，我就要係機場呆坐多幾粒鐘。
初到貴境既我，已經碰著黑，我真係幾忐忑不安。
哈哈，不知不覺已經過左去兩個幾月，所有野適應晒，只係時差果D有問題。
接腫而黎既assignment，雖然多到喘唔過氣，但係咁既生活先為之充實，我亦覺得，如果個人一懶落黎，我就好快搵唔番以前果個林慧敏，果個做乜野都會付出百分百拼勁既我。我係呢邊，比我想像中更好食好住，但同auntie一齊住，佢都唔會放心比我出夜街
，所以成日有朋友約我落bar，我都去唔到，得個推字。
你估有得揀，我會唔想去咩。人地話：「出到外國就要見識多D，最好就識到個型棍鬼仔，唔好咩都怕蝕底。」
見識？去蒲？鬼仔？
我連去見識既機會都冇呀，嗚嗚嗚。
不過我auntie都好苦口婆心咁同我講，話我酒量差，就算佢帶我去，佢自己都唔放心丟低我一個自己走左去舞池玩。
我auntie都幾後生，以前係蒲精黎架，後尾嫁左比舅父先收心養性，專心做個好主婦。佢勁飲得，兩三支gin，唔溝就咁飲，依然面不改容，我有佢一成功力就好啦！
講返我自己，過左黎英國咁耐，我都有間唔中同班女仔skype下，平時唔得閒就係whatsapp個group度傾計，不過佢地而家都忙緊AL，所以都搵得唔密。
至於男仔，黎黎去去都得果幾個，有個就係舊年x’mas ball 識既喇沙仔，之後就係st.paul仔，再之後就係小學同學。
呀，輪到一個我都唔係好想提起佢個名既人！
江子泉。
其實我都唔係有心去傷害佢，之不過，我都係覺得我對佢無感覺，做普通朋友，得閒敘下舊，咁樣咪仲好？但係，佢又一直對住我死纏爛打，我已經比左好多下台階比佢，對佢都幾忍讓。
只係，佢都係好一廂情願覺得，我終有一日會比佢既努力打動。
唔好傻啦，呢啲野，真係勉強唔黎。況且，我唔係一個隨便既人，我真係好希望我既初戀情人就係我老公。
之前有好多仔主動上門追我，試過特登等我放學，又話約我出旺角行街兼睇戲，又試過有人無端端送d好貴既野比我，最誇張果次，收到條Swarovski既鍊，閃到連我都唔敢比阿媽知。
講起一件幾搞笑既事，就要去番Form 4果陣。
我地自果次gathering之後一直都無聯絡，我繼續忙我既排球隊訓練，同埋代表學校參加科學比賽。
誰不知，果日佢無端端send個message比我（果陣未有whatsapp)，問我係咪同台。
咁我心諗，你問得我，就梗係想搵人sms傾偈啦，咁我就同佢講我係人仔台，佢咁岩又係。
於是我地就傾左一排，不過我同佢真係無咩共同話題，大家嚐好都唔一樣，佢成日問我有無聽日本同韓國D歌，但係我又好少聽歌，黎黎去去都係香港果D多。舊歌反而我仲聽得多，7、80年代果D我好鍾意，貪佢地夠soft，歌詞又有意思，你可以話我老套，但我有呢個特別僻好，某程度上都係比我爸爸夾band所影響。
因為，佢最鍾意Beatles。
我望番佢後生果陣，佢頭髮又長又鬈，當年都真係幾殺食架！
好啦，之後阿泉搵我，我都好少覆佢，因為佢講野好悶，下下都好似審犯咁。
平時我地既內容大致就係咁……
泉：敏敏，做緊咩呀？ 19:32
泉：溫緊書呀？ 19:34
泉：好勤力喎你！ 19:40
我：dinner 19:42
泉：我都岩岩食完飯啦！19:50
泉：阿媽煮左我最鍾意食既梅菜肉餅 19:51
我：幾好呀！19:52
泉：你而家食完飯又做咩呀？ 19:53
我：study 19:54
泉：加油啦！支持你！ 19:55
我： ^^ 20:28
我地就咁維持左呢段無謂既短訊關係，差唔多有一個月。
直至有一日，我比佢一個要求嚇親。