男校病: 【9】
果日阿泉好突如其來咁發個message比我，問我下個星期六得唔得閒。
係盲既都知佢想點啦，佢想單獨見我，擺明係想對我試試水溫。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝
都係由番我呢個男主角黎講番呢單野啦。
是咁的，我見自己係某個星期六下晝得閒，因為果時岩岩係潮特樓上間英X度補完Physics，所以就想打蛇棍睇下阿敏得唔得閒。
如果佢得閒，就約佢一齊食Lunch。
其實我就冇預過D乜架啦，都有心理準備會比佢拒絕，所以心態上都尚算平靜。
但係果陣時既我，始終都係一個困左係男校好多年既死毒撚一個，要我單對單打電話比一個女仔，果個仲要係我暗戀既人，比著你，你都手震腳震啦。
我拎住個電話，係個contact list度係咁向上掃又向下掃，卒之我都鼓起勇氣㩒落個綠色既「通話」制，打電話比佢。
「嘟⋯⋯嘟⋯⋯」
我等左約廿秒。
「嘟⋯⋯嘟⋯⋯」
「嘟、嘟、嘟、嘟。」
試左幾次，都分唔清係佢個電話打唔通，抑或係佢特登唔聽我電話。
跟住我隔左一陣，再試過，都係唔得，我當然好唔忿氣，於是今次就比個message佢，同佢講明我既來意：
「Carmen，你今個星期六得唔得閒？我知道家樂坊果度有間餐廳既芝士豬扒Lunch set好好食架，不如一齊去啦。」
因為我廢事佢諗咁多，我索性將時間、地點、食乜，一次過打晒出黎。
等左冇幾耐，佢終於都覆我。頂！佢覆人message，仲珍貴過沙漠入面搵到水呀！
「sry….. maybe I’m not free…」
我滿心期待一個OK既答覆，但點知換過來都係無情地食著屎。
佢話就話唔得閒，但潛意識地就係想同我講：「做咩我要同你個毒撚食飯？我同你好熟咩而家？」
唉，我都知，係我怯，係我個人慢熱，以前比著咁多時間，每日可以見面，但係果時既我都無好好把握機會去發展比朋友更進一步既關係。
而家佢之所以會覆我，好大可能都只係比面我係佢小學同學，除此之外，佢同我可謂無任何瓜葛。
雖然人地已經明顯地表態唔想出黎見我，但係我果時又出奇地臉皮厚，我反轉頭又問佢：「咁下星期啦！」
「ummm… 」佢覆。
呢個就係佢最後覆既message。
And for now, I’m completely f**ked up…
係呢D時候，好兄弟及時出現出謀獻策，就可以挽回返唔少分數，而呢個人，就係之前都有提及過，而家Form 4都仲同我同班既阿輝。
「輝，輝，輝！今次又要你幫幫手！」
一個小息，我再次係小食部出面部售賣機度搵到佢，情況就好似返返一年前Gathering前果陣咁。
「泉，咩風又吹到你過黎呀？」佢笑笑口咁講。
「冇野，呢度人多，不如我地去遠少少講。」我覺得呢D野比較私人，都係唔好比同校人知好。
如是者，我地走左去跑道某個角落，果度有條通往禮堂既後樓梯，平時跑圈既同學，就係呢個位置蛇王偷圈。
「上次果壇野你冇料到，今次你又想再黎過呀？」知我心者阿輝也，未講佢已經知我搵佢做乜。
「係呀，我想約阿敏出黎食個lunch，佢都唔制…..」我個樣好似一個情場失意既青年，弱小既心靈受唔住打擊咁，眉頭間帶點憂鬱。
「係咁咋嘛，簡單啦。」佢已經諗到計仔。
「我地詐詐帝一齊約佢去玩，咁人多既話，佢自然有理由會黎啦！」
「係喎！點解我冇諗過可以叫人既！」我個頭頂點著左個燈泡。
「拿，就咁，你加我再加幾多人，盡可能係阿敏識既，就叫晒佢地黎，約阿敏去唱K。」
「咪住先，無端端我邊度搵幾個小學同學黎陪我地癲，仲要話埋比佢地知我想點……」我一面狐疑。
「你係怕陣間有熟人爆你比阿敏聽，等你前功盡廢呀？」阿輝問。
「Exactly！」我答。「咁我地可以叫邊個？」
「呢一層，我都唔係好清楚，始終呢個計劃係你諗出黎，你係咪應該負番叫人黎既責任呢？」阿輝應。
「岩既岩既….」我講。
「唔通你要我好柒咁樣對住班入面D人，姐係榮爺呀、發哥呀、阿禮呀果D，同佢地講『阿泉想約女神出街，有冇人星期六可以幫手？』咁樣？」
我當堂嚇一跳：「梗係唔好啦！」
「咁你知就好啦，咁你去問人有冇興趣架啦。」阿輝拍拍我肩頭，拎住佢包檸檬茶，就走左去。
我都幾清楚要點做，又會咁岩得咁橋，有個自稱係小學同學既朋友，叫Johnny，佢無端端add我Facebook，其實我連見都未見過佢，只係見佢同我都幾多共同朋友（即係小學同學），所以先confirm佢個friend request。
咁好啦，反正都係小學同學，咁就add左都冇壞。
跟住冇幾耐佢就即刻主動係Facebook 聊天度搵我傾，傾傾下先知原來呢個Johnny仔一次gathering都未黎過，佢就話自己怕醜，同人唔熟，所以就廢事出黎。
我反問番佢：「因為你同人唔熟，就唔蒲頭？咁你以後都唔蒲頭呀？」
佢就話：「其實我就係想見下大家……但係我又諗唔到有咩野做……」
「咁呀，不如去唱K啦，去岩岩尖沙咀新開果間Red Mr.，好冇？」
「good idea喎！我一次都未去過唱K。但係……」
我知佢擔心D乜，佢驚冇人陪佢去，我就拍晒心口叫佢放心，因為我已經叫齊晒同學幫手。
係早一個星期，我已經叫到另一個好friend既同班同學瑋仔幫手，佢一知道我想約女出去，即刻義不容辭，話要幫手揍夠人腳。
好啦！而家只差阿敏一關。
我二語不說message比阿敏，同佢講：「我地不如今個星期六去唱K呀！好多人都黎！」
佢等左一陣先應我，就問：「有邊個黎？」
我就照直同佢講：「有個叫做Johnny既小學同學話想一齊黎，你識唔識佢呀？」
阿敏就答：「我都唔識佢喎……無端端做乜會彈左個Johnny出黎……」
「哈哈，我都唔清楚呀，佢之前冇黎過gathering但係又想見下大家，咁佢咪諗住拜託我叫大家一齊出黎囉！」我話。
「唔…… 好啦！星期六幾點邊度等？」阿敏話。
我估唔到阿敏會咁快應承，我當堂對住個電腦螢幕，好大聲咁「Yeah」左出黎！連坐係客廳睇緊師奶劇既阿媽，都忍唔住擰轉頭望一望係房入面果個無比興奮既我。
太好啦！終於都可以再見到佢啦！好緊張添！