男校病: 【7】
「其實我……」阿敏唔知比咩反應好。
「我……我……仲未有心上人囉。」
我就唔知邊隻眼明明就見到阿敏佢講呢句野既時候，全程望住阿龜。
內裡有一種青春少艾含苞代放既感覺，但係又保留番少少含蓄。
其實我都傻唔晒，起碼feel到佢係對阿龜有少少好感既，之不過阿龜知唔知，同埋受唔受，又係另一回事。
「車～呢個唔係答案黎囉！你知唔知咁樣，大家幾冇癮！」阿輝話。
「敏敏一定大把人追啦，點會冇個岩你呀！」阿峰牙擦擦咁講，好似胸有成竹咁，佢鍾唔鐘意阿敏我就唔清楚，但係對佢既態度上，相比對住其他女仔，都係明顯特別nice架啦。
「咁人地真係冇呀嘛。」阿敏塊臉好似充到紅卜卜咁，睇黎佢好怕羞又要怕比人識穿咁。
至於阿龜，聽完之後都若無其事。人地而家鍾意你呀，死蠢！我恨都恨唔到呀。
呢舖真係難分真與假，阿敏又死口唔認佢鍾意阿龜，而其他女仔見狀就暗暗咀笑，好似知道D咩不可告人既秘密。
話時話，點解佢會好揀唔揀，會揀阿龜既呢？
講番小學果陣，好多同班既人都話佢同男班長，即係今日冇黎果個阿翹好襯，阿翹雖然生得唔高大，但係個樣就勝在夠清純、夠順眼，勤力讀書之餘又唔係傻仔咁既款，總之就好有書卷味同文藝人、音樂家feel，簡單D黎講，佢係sell氣質既男仔。
小學校際朗誦攞獎、鋼琴六級、小提琴四級、仲入埋choir，點鬥。
至於阿翹升左上中學之後，佢既近況我就唔清楚啦。
但我略略都有聽過幾個版本，只係傳聞而未經證實，就係有人話佢入左間英中男女校之後，就變左情聖，唔夠個幾兩個月就換畫，但係都總有好多女仔爭住排隊咁，條龍仲墟陷過排書展開幕。
你問我，究竟阿翹有咩咁好，D女爭住要？
我好難解釋比你聽。
我只知道，如果我都有番阿翹咁既樣貌、咁既口才、咁既音樂才華，我都相信要溝到正女，其實唔難。
話則雖然小學果陣好多人傳佢同阿敏兩個好曖昧，但最尾好似都係做返普通朋友，咁都好合理，反正小學既時候大家都未識得去戀愛、未識得去處理一段感情，太早萌芽只會帶黎唔開心既結局。
以阿翹既quali，如果佢追求阿敏，我相信阿敏都唔會拒絕，但係其他來者就通通都會被拒諸門外，食閉門羹。
我會認為，係因為自升左中學之後，阿敏心目中既阿翹好似變左質，所以最後導致呢兩個人不歡而散，至於佢地有冇正式地拍過拖，我唔知道，我亦都唔想，因為只要諗到阿翹呢個花心友點樣糟塌女神隻纖纖玉手，個心就好唔舒服。
但阿翹就因此，成為左好多班入面得唔到阿敏歡心既男仔既發洩對象。
果陣時，我都未sure自己係咪對阿敏有好感，因為我仲讀緊小六，我仲未諗到拍拖呢個問題，因為我覺得，讀書勝於一切，我亦都冇諗過自己會入左男校，將我將來七年中學有女女既美好生涯，就咁白白斷送。
直至上到Form 1，大家分渡揚鑣左，我先發現我走左寶，呢個時候已經再番唔到轉頭，要怪就怪我以前冇同阿敏點熟絡過，我冇阿翹咁既先天優勢，做埋男班長，根本就為佢可以埋到阿敏身而度身訂造。
仲記得有一次，果陣時坐係我側邊既祥仔，冇錯，就係而家同人打緊機果個排骨仔，佢試過有次唔小心倒瀉個飯盒，又咁岩跌正阿敏度，結果就搞到人地條裙污糟左，阿敏個人夠大量，又冇乜點怪佢。
但係祥仔始終都係覺得欠佢一個人情，於是就請教我應該點做。
佢果朝早岩岩番到班房，趁人少少果陣就係我耳仔邊度講：
「喂大畫家，你平時咁識氹女仔開心，而家我想同個女仔道歉，可以點做？」
我就答佢：「雖然我唔知你想同邊個講，但如果你有心既，咁你咪比少少心思落去囉。」
佢聽完之後幾滿意，第二日小息果陣，趁阿敏去左圖書館當值，就靜雞雞攝左封信係阿敏個櫃筒入面，我估就應該係道歉信。
阿敏小息完番黎，發現左封信，佢就好細心咁當場拆黎睇，睇完之後就會心微笑左，之後仲擰轉頭向祥仔笑，仲話：「我都唔care，有佢啦！」
阿敏微笑呢一個motion，簡直觸動左乳臭未乾少男的心，祥仔就好似對佢著左迷咁。
佢成日借D意想撩阿敏傾計，但係又成日都比阿翹搶晒風頭，因為阿翹每次都係話要同阿敏傾D正經野，傾傾下又變到得番二人世界咁，搞到祥仔好不爽。
我唔忍心見到祥仔咁，就同佢講：
「人地有阿翹架啦，你仲叉隻腳埋去使咩姐。」
「你又唔係佢，你點知阿翹就係佢男朋友？」
「我憑直覺。」我答。
「我唔信你啦，你次次都唔準既。」
卒之，到阿敏同佢面對面講清楚，佢先肯罷休。
「阿祥，我好多謝你既心思，可能係我表達得唔好，其實我笑係自然反應，我開心所以我就笑，我唔係對你有特別意思架，我地都係做同學啦。」
呢句話，就令祥仔既南柯一夢告一段落。
不過，祥仔就認為，佢衰左，只係因為佢樣樣野都及不上阿翹，包括學業同其他世藝，更重要係家底。雖然，我相信阿敏唔係果D貪慕虛榮既女仔，但係，好似阿翹咁既中產，斯文有禮兼有氣質，真係好難唔會有偏愛，直頭覺得佢件冷衫都好似特別乾淨咁。
而祥仔，就成日節衣縮食，一個月既學校訂飯飯錢就三百幾蚊，圍番差唔多每日十幾蚊，係咁多年前，咁既價錢都算合理，但係祥仔冇訂飯，佢只係帶幾個菠蘿包就算。
佢果封所謂道歉信，都唔係咩特別既靚信紙，只係一張A5單行紙，張紙係街邊文具舖幾蚊一本既notepad度搣落黎，最多都係加多個貼紙咁。
不過，我都知道祥仔已經係佢最有限既資源裡面，盡左最大既努力架啦。
祥仔今次gathering坐左咁耐，真係未見佢同阿敏有講過野，我覺得係佢刻意想避開阿敏，又或者根本就冇預料到阿敏會黎。
而佢坐係度打緊果部PSP，係佢阿哥出糧送比佢既生日禮物，但佢阿哥非三大fresh grad都唔係賺好多，而家寄左好多份CV都未有大公司show，唯有搵份頹工，做住reception先。所以呢部PSP，黎得別具意義。
至於阿翹點解唔黎，都唔難理解，因為佢自從升中後同阿敏關係變差，尤其係唔妥過大家一排之後，阿翹應該都意識到，有阿敏既地方，佢就唔應該出現。
佢比人封左做情聖，就可以解釋為，佢升左中學之後就識過其他女仔，再唔需要同阿敏一齊，同時佢個人性格變得咁犀利，唔多唔少可能都係受阿敏既不滿影響。
講番阿龜，佢個人就冇咩野，一向都安份守己，平時都正正常常，同我地班男仔玩多，但係佢都叫做可以同女仔傾兩咀，以前小學果陣，雖然講野有D幼稚，但都幾得受女仔歡迎。
升到中學之後，我之前都有提及到，佢做project果陣想乘機溝女，但唔成功，係因為個女仔嫌佢未夠成熟，做野有少少拖泥帶水，唔夠企理。
所以我千諗萬諗都諗唔通，點解阿敏會鍾意佢。
或者，係佢口味獨到，我唔係講樣，如果齋計樣，龜仔其實仲靚仔過我，而家我係指性格方面。
人夾人真係好重要，但前提都要大家鍾意對方。
我好好咁安慰自己，阿龜自己都有愛既人啦，仲點會理阿敏。
呢次gathering完左之後，我特登問阿龜有冇同其他人聯絡，我仲特別提到阿敏，佢話冇。
咁都好D，起碼我又少左個顧慮。
但係，當我同阿敏既關係只係停留係片面既小學舊同學，仲冇咩聯絡既情況之下，有咩方法可以令自己同佢更進一步呢？
既然已經知佢係同台，不如先同佢message，再約佢出街？
平時得閒就問下佢近排點？
我唔知道，我都冇咁既經驗。
於是，我本住唔做唔錯既諗法，淋熄埋我自己把火，結果係成個中三既剩餘時間，我都冇對阿敏作出過任何行動。
咁又浪費左個黃金機會。
終於到左中四揀科，當我意識到仲有兩年就要考我人生第一個公開試，我就開始明白，有D野而家唔去做，就只會呢一世都得「後悔」兩個字。