男校病: 【6】
交完水費，大腦為之一緊既神經都霎時放鬆落黎。
嗯，我已經準備好啦。
我講都唔使講，阿瑩見我返黎，即刻開大金口，開始對我審犯：
「阿泉，去完廁所啦？你走都走唔甩架啦，到你講啦！」
點答好？我度好晒，呢個答法應該係最好架啦！
我故作鎮定，口都冇震，就話：
「大家都知道我讀緊男校，莫講話女仔都識唔到件啦，又何來會有心儀對象呢？」
阿瑩當然唔信，話晒我當年都曾迷倒班中不少女生，我指欣賞我畫功既女仔。
佢於是就話：「你點會冇呀？以前你好紅架喎，個個爭在要你係本紀念冊度畫野。」
「嘻！呢啲都係過左去既事啦！今時唔同往日。」
我字行間眉頭帶點晞噓，有一種後悔入左男校既感覺。
「咁雖然係男校度識唔到女仔姐，但係你真係連一個鍾意既女仔都冇？」阿瑩問。
「我岩岩都講左話冇，咁你點問我都係答冇架啦。」我回應佢。
只見阿敏默不作聲，似乎心事重重，未知道佢係咪一時間受唔住我呢個答案既衝擊。
又或者，其實佢一直知道我暗戀佢，但佢見我咁唔坦白，所以有點失望？
又抑或，佢其實都有心上人，只係果個...... 其實就係我？
算數啦，江子泉，唔好咁自作多情好冇！佢會鍾意你，無可能啦！
但係，點解我又要咁傻？點解我唔直接表明心跡呢？
唉！之唔係因為我怕死囉！
我真係好怕開左口之後，連朋友都冇得做，你諗下，仲要當住咁多人面前講啲咁私人既野，對一個讀緊中三既女仔會係一個幾大既驚喜同打擊，如果阿敏稍微EQ低少少，佢一定當場發我爛乍，之後仲會點，唔使講啦……
所以我選擇唔當場自爆，都係無可厚非既，明明大家有機會就咁連成一線，成為我一廂情願心目中既情侶，但自己就選擇唔走出呢個重要一步，這麼遠那麼近，就係咁既意思。
「瑩，唔好問佢啦，佢唔講咪唔好迫佢囉。」珊珊嘗試叫停阿瑩既追問。
我原本有打算叫阿輝幫下我口，不過我又怕佢臨場會跣我一腳，爆我大獲，所以我就將呢個Plan B擱置左。
呢個時候，果然不出我所料，成班女仔就將個炸彈拋去阿輝度引爆。
「喂阿輝，你同泉仔同校架嘛！你八唔八到佢啲野先！」
阿輝好識做，扮到咩都唔知咁，就話：
「我地上到中學都好少見大家，所以就唔係好清楚，哈哈！」
「咁都冇理由少少野都八唔到既，係咪先？」
阿瑩露出一個餓相，真係好難頂！乜知道我啲野真係咁重要咩？
「唔知呀我，我有時係見到佢同班男仔攬頭攬頸咁囉！」阿輝話。
「能成為密友大概總帶著愛～」阿龜呢個時候乘機潤我，哼出一句歌詞。
「哦！原來阿泉你係呢Type既！！」阿瑩笑住講，當然佢唔係認真果隻啦！
「喂～唔好誤會，我係直架！」我搞笑咁答返佢。
「清者自清啦，你使咩咁大反應姐！拿，我地就respect任何取向既，大家都係好朋友呀嘛！」阿瑩話。
「好啦，唔好玩佢啦，問埋阿輝先啦！」冇咩點出聲既琳琳就講。
「我都未有心上人，可能遲下都要學阿泉咁，中途轉基架啦！」阿輝繼續發揮佢抽水本色。
「咁你地兩個一齊，咪天生一對囉！」琳琳用好詭異既聲調去講。
但係呢個moment真係唔係講笑，我聽到佢講呢句野果陣，當堂打左個冷震，因為佢睇黎好想我同阿輝真係一齊，大家唔好唔記得，佢係個腐女黎。
「嘩哈哈，哈哈，哈。」我同阿輝同時報以一聲冷笑。
「連笑都咁夾，仲唔係一對呀啦！」琳琳又講啦！
我同阿輝都懶得再理佢，有得佢自high。
「係喎，我地未問阿峰呀！」男仔頭阿殷都冇見點出聲，但佢勝左記性好，令大家都冇放下屠刀，放過阿峰。
「我？你問龜仔啦，佢最清楚。」阿峰輕輕地答。
「阿龜，爆料！」阿殷同阿珊異口同聲咁講。
「其實呢，實不相瞞，阿峰係有女朋友架！」
「吓！！！」呢一野，連靜到幾乎訓著既阿敏都幾乎彈起左。
我唔知點解佢咁大反應，究竟係純粹因為對阿峰震驚，定係因為龜仔講到聲。
「我同我女朋友，一齊左半年啦......」阿峰講下又講，不知不覺咁就帶大家進入左一個好似童話般既故事，一時又講下佢條女嚮阿峰生日果陣特登整蛋糕佢食，上個星期見天氣轉涼，織左條頸巾比佢，甜到漏油。
呢個閃光彈就真係殘死人啦！
「到時請飲記得叫埋我地呀，哈哈！」
阿瑩同其他女仔聽完，當正佢地兩個一定會白頭到老，而同時每個女仔，都無一露出一個羨慕眼神，其實我都唔明有咩好羨慕，你話如果收禮物果個係佢條女就話姐。
明明就係佢女朋友不問回報去為阿峰付出咁多野，轉個頭如果係阿峰咁有心思，送野比佢女朋友，我相信班女唔只係羨慕咁簡單。
我包單佢地一定流晒......水…… 流晒口水！
「有冇樣睇呀？」阿瑩大膽要求開樣，但阿峰亦都冇托手肘。
「拿，你地慢慢睇。」隨即，阿峰大方地將部手提電話傳比班女仔睇，入面不外乎兩個人既合照，同埋啲貼紙相之類既野。
放心，冇閃卡，阿峰為人正經，又點會影呢啲野呢！
「又幾靚女喎，阿峰你執到啦！」阿殷話。
「點呀，你有興趣咩？」阿峰就答佢。
「係呀，你搵日帶佢出黎比我識下呀！」阿殷好坦率，就咁同阿峰講。
「好呀！哈哈！」阿峰仲以為阿殷講笑，睇黎仲未知發生咩事，心水唔清既其他人，都唔係好明岩岩阿殷既言下之意。
我差啲忍唔住要爆一句：因住陣間條女比佢食左呀！（雖然我唔肯定阿殷係咪真係Les）
唉，我認，吃不到的葡萄是酸的，仲要係有個又靚又好有心機既女朋友，幾時先輪到我有？我要求都唔係好高姐，有阿敏既Level就得架啦！呀唔係，有阿峰條女一半都照殺！
媽，好毒呀！
阿峰眼望望我，佢暗暗嘆息，好似想同我講：
「我地讀男校，係咁架啦！I know that feel bro！」
呢個時候，我都知道其實大家差阿瑋未問，不過我廢事人地難堪，所以就冇叫大家問番，就有佢啦。
講真啦，聽男仔講左咁耐，都好悶啦，而我地最期待既女生環節，終於都要黎啦！
「岩岩我講左啦，不如到我問Carmen啦！」阿瑩指住沉蟄多時既阿敏。
而一眾男生，見女神就黎要講野，大家都好緊張，而呢個時候，唔知點解岩岩坐係側邊仲打緊機既幾個男仔，唔知幾時已經坐晒係我隔黎，神情同我地一樣既興奮又驚。
阿敏好似未見咁大場面，仲要有十幾隻雄性既眼球聚焦係佢度，佢都咪話唔淆。
「呃...... 其實我......」