男校病: 【5】
係人多既場合中講野，一向都係我既死穴黎。
我本身個人已經怕醜，二黎怕講多錯多，所以我都好明白「沉默是金」呢個道理。
好啦，而家咁既情況，就搞到我幾咁老尷！
岩岩可以有位入同敏敏傾偈，但係就係大家你眼望我眼既果一剎那，我竟然膽顫心驚，猶疑其後臨陣縮沙。好啦，而家佢就坐左埋去班女人度，令我白白浪費左呢個黃金機會。
不過我知道，成個聚會流流長，之後都實有機會可以傾到偈，所以我都唔係太放係心入面。
只係阿輝，從佢既表情話比我聽，佢係有點鄧我唔抵。
而我身旁既幾位仁兄，講完打機就講動漫，講下呢個月新番有邊套好睇，一陣又講下邊個聲優把聲最甜，又講下邊個角色可愛。
佢地吹左一大輪水，我完全搵唔到野同佢地講，因為我冇睇開，我諗呢啲就係冇共同話題既壞處。
就係呢個時候，我靈敏既聽覺話比我聽，果班女人好似係度講緊我地班男仔，但只見佢地掩掩咀笑，好似聽到佢地話：「乜你地啲男仔個個都咁毒架...」，我就心知不妙。
無可否認，我地一班讀左男校幾年既仔，係唔識得點樣令自己風趣幽默，然後可以係班女仔面前打交道氹佢地開心，而我地既話題黎黎去去唔係運動，就係二次元文化，打機動漫IT野，根本同果班男女校出左黎幾年既人，直頭就差天共地。
佢地會覺得，如果成班人傾男仔野而唔踩班女仔，就係宅男，你班女諗野真係膚淺！
呢邊有四個男仔繼續講班女口中所謂既「毒野」；
另一邊不遠處，係唔知幾時既事，只見阿峰、阿瑋、龜仔、阿輝已經同埋個乸型阿良同埋班女仔打成一片，阿敏仲傾得好投入添。
呢個時候，阿輝向我打個眼色示意，我好明白佢想點，佢想叫我坐埋黎，而佢亦都知道我係一個機會主義者，剛才小小挫折又點會令我放棄搵timing同阿敏傾偈呢？
於是乎，我就坐左埋去果班男女堆果度。
就係咁，我地呢度幾男幾女圍住個圈，一邊玩住uno，一邊係度講野大家既野，不過呢，大家愈講就愈興奮，亦都愈唔避忌，尤其班女仔，開始問埋晒d好八婆既問題。
呢個時候，半鬼妹既珊珊就出聲：「阿龜呀，你而家有冇拍拖呀？」
話岩岩先講完，個個就擺出一個等聽野既姿態，不約而同地望住龜仔，龜仔霎時間反應唔黎，嚇到連佢手上果張Draw 2牌都跌左出黎。
之後，佢好作狀咁抖大啖氣，就答：「冇！一向都冇架啦！」
呢個時候，出名多咀既阿峰就插咀：「成件事唔係架！岩岩我地先問佢係中學做project果啲野，佢專登搵個佢鍾意左好耐既女仔同佢一組架！」
頓時班女仔好似發現哥倫布發現新大陸咁，齊齊「嘩」一聲，唯獨阿敏聽完冇咩反應，而我亦留意度，佢一路都暗中望住龜仔。
以前聽人講，龜仔係果啲好恨想識到女仔，又會因為識到一大班異性朋友而自豪既人，傻既都feel到，佢想漁翁撒網，睇下邊個得到手，就同邊個拍拖。
但係佢既「奸計」一直都無辦法得逞，因為班女仔淨係當佢係傻仔咁玩，雖然阿龜自己應該都樂在其中，但到頭來佢一啲實質既收獲都得唔到。
同埋佢外表成熟，其實言行舉止仲係幼稚，佢做既野往往同佢實際年齡爭一兩年咁，如果唔係，岩岩阿峰都搵唔到位抽佢水啦！
「喂喂喂，呢度人多，唔好亂講野啦峰爺!」阿龜臉色有啲難堪咁講。
「拿，其實我就唔係好清楚姐，不如大家問番當時人啦。」阿峰呢個時候仲想推波助攔。
當時人決定不再沉默，就解話啦：「哦！果時我做project，咁要兩個人一組，咁我咪我搵左個平時傾得幾咀既女仔一組囉！」
「哦～～～」好明顯，大家都唔滿意佢呢個解釋。
「傾得兩咀即係點？靚唔靚架？你鍾唔鍾意佢姐？」珊珊對住阿龜連珠炮發，完全唔放過佢。
以女人既思維方式，你只要比佢問一條問題，而你又選擇以迴避式去答返佢，下場就只有比佢好似審犯咁繼續問，直到佢得到想要既答案為止。
真係難為你啦，阿龜！
老老實實，大家一聽都知阿龜唔想自爆，但大家依然咬住佢唔放，睇下仲可以R到幾多野聽。
「我同佢只係普通同學黎咋！唔好諗太多！真係冇野！」阿龜講。
呢個時候，靜左一輪既阿瑋突然放出一支冷箭，呢一下直中阿龜要害！
「冇野？你果班咁多男仔唔一組，但就偏偏搵個女仔，你話冇野都冇人信啦！」
「哈哈哈.....」成班聽完阿瑋既見解後，即刻笑晒。
我見到阿龜臉都紅晒，見到佢咁樣比大家糟質完，我覺得佢好慘。
但係呢個咁好玩既遊戲，班女仔點會比佢停呀！
「好啦，我地唔好再問龜仔啦！ 岩岩講人講得咁開心呀啦～就到你啦，阿瑋！」阿瑩話。
阿瑋聽完即刻有反應：「做咩姐？你地班女仔唔好淨係問我地野啦，我地都想聽下你地既故仔架嘛！阿瑩，點解唔由你開始先？」
「係囉，係囉！」成班男仔好齊心咁和應，個個都即刻應晒頭。
「下！你地冇理由要lady first架？」阿瑩詐嬌咁講。
「咩lady first姐， 岩岩你地問完阿龜，你地搵番個女仔代表出黎比我地問啦！好公平，我地輪流問大家！」阿瑋答。
「咁人地女仔人家，怕醜架嘛！」阿瑩笑住講。
「我唔接受呢個藉口，一係你就講，如果唔係就當你冇。」阿瑋再講。
似乎阿瑩覺得如果佢本身冇追求者既話，好似係一件好失禮既事，所以見佢猶疑左一陣，好似想度個故仔去拆掂阿瑋。
但係佢又作狀應番阿瑋。
「耶～你都係唔好問我啦，你問Sandra（珊珊）同Carmen（阿敏）先啦！」
「唔好拖我地落水喎，瑩！」珊珊聽完即刻講。
「車～都唔好玩既！各位男仔，我地拉大隊退出啦！」阿瑋扮嬲。
哈，阿瑋的確係有幾手，話晒佢本身quali唔差，讀書運動又勁，的確係迷倒唔少女仔，而佢最殺食既，係識得搵方法同佢地溝通。
而家擺到明，係阿瑋個勢壓番住阿瑩。
「唔好唔好，我投降，我講啦！」阿瑩終於屈服。
成班男仔睇黎都好期待佢會點答，洗耳恭聽。
「我真係冇鍾意既人，但係我都知學校裡面，有幾個係對我幾好人既。但係男女校入面，冇話因為你對人好啲就代表你鍾意人呢回事架嘛！」
「姐係人地對你有好感啦！」我答。
「嘩，阿瑩都有仔鍾意，真係世界變啦。」阿輝呢個時候插咀。
「哈哈，使唔使咁串呀！」珊珊就話。
「咩野呀，我都話佢地唔係鍾意我，只係對我好好姐！」阿瑩答。
「對你好？佢地有冇成日跟住你出出入入，幫你做野？」阿龜回過神，又八掛一下。
「例如我每次做值日生，次次都會有男仔主動走左出黎幫我擦黑板，佢地話呢啲麻煩野唔好搵女仔做，廢事整到成身粉。」阿瑩答。
「嘩，勁到呼風喚雨都得！」阿輝細細聲講，點知比班女仔聽到。
「呢啲野係男女校係好正常架咋，好多粗重野都會有男仔幫手。」珊珊話。
「其實你地都忽略左個重點，究竟係咪只有阿瑩做值日果陣，先會有男仔走出黎幫手呢？」阿瑋話。
「唔係，差唔多個個女仔都有男仔幫架。」阿瑩就答佢。
講下講下，原本由問阿瑩有冇鍾意既男仔，變到值日生，完全離晒軌，我直覺上覺得阿瑩係特登去轉移大家視線。
「拿，今次就信住你先啦。」阿瑋又出聲。
阿瑩笑住話：「嘻嘻！乜你覺得我會講大話咩？」
我心諗，你講咁多野去掩飾，其實咪又係冇人追，就不如就坦白啲講冇就得啦，兜咁大個圈。
不過，我都相信班男仔未必會信阿瑩冇仔追，因為係經濟學既角度黎講，女仔呢一種稀有品種，對於男仔而言，佢地既需求都係長時間處於極高水平。
而我同時都差啲忘記左阿敏，因為佢大部份時間冇咩點講過野，令人忽視左佢存在。
而佢心入面，好似一路都諗緊啲野，但佢仲要係咁望住阿龜，令我個心有啲唔舒服。
我既結論係：阿敏係咪一早已經心有所屬呢？佢會唔會暗戀阿龜呢？
既然我想知道答案，倒不如直接問佢仲好啦。
之不過，係我要得到呢件事既真相之前，我就遇到單大獲野啦。
「阿泉， 到你啦。」班女仔話。
到我答啦？點算好？如果我答冇會點？如果講啲唔講啲，會唔會仲難收科？
呢個時候我果斷地做左個決定。
我同佢地講：「我想去一去廁所。」
冇錯，我想用呢個小解既時間，去諗下點講係最好。
其實，可能大家一路都係講下笑，只係我認真左，點解我要咁驚去面對呢條問題？
我之所以驚，無他，因為我鍾意阿敏，我唔知道如果我答冇，會對成件事有乜影響。
而佢對阿龜既視線寸影不離，就更加令我憂慮。
點算好呢？