男校病: 【4】
話咁快，我地一行人就到左今次gathering既目的地 - Blues Cafe。
呢間樓上Cafe雖然唔算大，但勉強都可以將我地一行十幾人坐得滿滿地。
一入到去就已經有幾個著住圍裙既店員用英文招呼我地，幾好態度，呢度既擺設好有歐陸風情，都幾骨緻。
阿瑩先前打電話黎訂位，已經講定左我地會有野食，所以而家我地可以做既，就係等開餐。
既然係咁，不如我就趁而家，介紹下呢度黎左gathering既人啦：
首先係我左手邊既，有阿祥同肥偉，佢地兩個以前都係同我同班，唔知做咩佢地一坐低就已經拎左部PSP出黎係度連機，完全無視晒其他人存在。
佢地兩個一向都係機癡，以前個玩Gameboy 果陣日日打寵物小精靈，到而家玩芒亨都係機不離手。
好心你地兩個啦！咁難得先齊人就吹下水，唔好掛住打機啦！
再遠少少既果幾位，分別係阿峰、阿瑋、龜仔，仲有先前都介紹過既阿輝，除左阿輝同我一樣讀緊男校之外，其餘果幾個都係男女校中學讀緊，聽佢地講平時同囡囡玩既有趣事，就令每日返學對仔對到厭既我同阿輝都有啲妒忌。
點解命運要咁殘酷？點解我地只係想每日返學可以見下女姐，都咁難？
阿瑋份人就口水多過茶，鍾意有果句就講果句，佢就完全唔介意同我地分享下佢同學啲衰野。
「上次我地Science科要做project，我有個隔離班既friend同左幾個女仔一組。」
「點解佢要咁做？特登痴埋去想同班女玩熟呀？」龜仔問。
「唔知佢啦，點知佢做完個project之後同我喊晒咁口，話以後都唔敢再試。其實我初初都估到架啦，班女實趁成組得佢一個男仔就玩死佢，駛佢做野。」
估唔到女仔團結上黎既力量可以咁可怕架喎。
阿瑋又講：「佢跟住msn班女，話約時間出黎做埋個powerpoint佢，點知個個都話唔得閒，又要推遲，仲有人放飛機添，卒之佢要自己一個做埋個powerpoint埋尾，哈哈！」
呢個時候阿峰都出聲。
「咁就抵佢死啦，淨係諗住要識女。計我話呢，做project梗係跟勁人做好啦，起碼佢地做起野上黎有交帶，好頭好尾，仲唔會托你手肘，大家都係想做好佢，咁自然就個個都好有heart，理得佢係咪女啦。」
嘩，你呢句簡直同「阿媽係女人」有異曲同工之妙。
阿峰本身係波牛，而家佢中學校隊佢都有份踢，打前鋒，佢係利記fans，房果度有幾套利物浦波衫，果陣費托岩岩轉會過利記，第一年就已經踢得好勁，開心到佢即刻印左費托個名上去添。
唔知而家王子過左檔去車仔，佢會唔會好傷心呢？
阿輝就一路都唔係點講野，可能話題唔岩傾，搭唔到嗲。
至於再過啲既就係班女仔，但係班女仔之間，寧寧舍舍坐左個阿良係度。
阿良係男仔黎，以前係班入面，都算係怕怕醜醜果Type，講野陰聲細氣，行為有時都幾古怪，大熱天時三十幾度仲要著住件褸衫，又鍾意上堂玩手指，以前班男仔都暗中笑佢係乸型。但佢同班女仔，又異常玩得好埋，班女仲要當佢係姊妹咁。
其實今日見佢呢身打扮，都Feel到佢都係cam cam地，而佢又一路保持住佢一貫小白臉文靜Look，班女就好受落，而佢就好留意咁聽班女傾計，冇乜小動作，最多都係Up下頭。
見到佢同成班女仔係果度，我都唔好意思走過去同佢打聲招呼。
而女人傾野，黎黎去去都不外乎化裝衣著追星追戲追劇，平時有儲開Yes！明星閃卡既，就曬下自己有幾多珍藏同限量版，有打開Xanga既就交流下心得，點樣將個page整得靚靚仔仔。
佢地傾呢啲野，我都覺得冇乜所謂，最怕就當住成班人咁講事講非，因為佢地呢頭可以同個friend好好，但背後又可以手指拗出唔拗入。果然，變臉係女人既天生技。
講左咁耐，我都知你地想我講下呢幾位甜姐兒有咩來頭架啦。
燈、燈、燈、凳！
首先登場既係珊珊，本身佢係中澳混血兒，所以個樣鬼鬼地，有人話佢似Leah Dizon。佢英文好流利，中文就甩甩咳咳咁，但平時吹水都難佢唔到。佢個樣幾趣緻，同以前冇咩分別。
佢嚐好係睇英文書，呀係，佢最鍾意睇Mitch Albom，佢仲介紹我地睇《The five people you meet in heaven》添。佢有個家姐，嚐好同佢差天共地，成日去老蘭落Billion 同 Level劈酒，一到週末就痴住班鬼佬party，天光先返屋企。
佢家姐想食洋腸？呢層我就唔知，不如你問返珊珊。
跟住到琳琳，相貌一般，戴住淺藍色幼框鏡，少少冬菇頭，書卷味好濃，但佢有個不為人知既秘密，就係佢係個腐女，鍾意睇BL，事關作為毒撚既我，經常上開一個動漫論壇，無意中比我發現佢原來係BL版版主，深藏不露！
我見佢平時覆親既post都係同腐有關，所以我先咁肯定佢好呢味野，但我實在忍受唔到兩個漫畫中既靚仔係度互摸挑逗格劍，救命！
跟住呢個就厲害，阿昕，相貌OK，有啲似何韻詩。佢咩運動都好勁，球類運動樣樣皆精，就連體操都有番一手。佢以前係長頭髮，但係今次竟然變左個男仔頭，初時班女見到佢都好錯愕，以為認錯人，但係阿昕始終都冇解釋到，點解佢要剪短啲頭髮。
而今次gathering搞手 - 阿瑩，就坐係佢地班人既中間，佢一向都係好鍾意話事既人黎，我地都覺得佢好有領導才能，果時小學校際辯論，學校拉大隊帶埋我地去睇，阿瑩代表我地學校參賽，佢一上到台完全唔怯場，講就無懈可擊，諗野思路清晰，真係唔怪得佢拎冠軍。
今次全靠佢先搞得成呢個gathering，佢功不可沒！
「喂，Carmen，做咩坐埋係個角落度，坐過黎同我地傾計啦！」
Carmen，咪住先，呢個名好熟面口⋯⋯呀！係阿敏既英文名！
原來我地一直都遺忘左阿敏，因為我地啲坐位好似梳沙咁圍住個圈，冇櫈，中間就係張檯，本身已經坐得好迫，結果最遲黎既阿敏，因為跟住隊尾而坐到去個圈既最尾處，同班女仔隔左一個大西洋既距離。
我都唔明，點解佢黎左成十分鐘，都仲可以呆下呆下，坐係最側係度唔出聲，隔黎阿祥肥偉，仲有阿榮阿威，幾條友唔係講打機就係講波經，阿敏根本就完全唔岩咀形，最神奇既，係佢唔主動坐埋去班女仔度。
呢啲可能就係傳說中既「天然呆」，我鍾意呀！
講番佢今日既打扮，以前佢番學就紮馬尾，因為校規規定，但今日就唔同，佢一把秀麗長髮落到膊頭再落少少，出面著左件薄薄既Sleeve，然後入面就襯上左一條米色既連身裙。
佢靚到直頭有一種神聖不可侵犯既感覺。
可能班男仔都好唔習慣有個堂堂校花坐係佢地側邊，所以就係咁各自吹水分散注意力。
我知架，佢地一見到阿敏，就好似心如鹿撞，方寸大亂，唔扮鎮定又唔得。
我同佢隔住三四個位，阿輝隻眼周不時睥實我，佢個款都係食花生，睇下我會唔會有進一步行動，但我對住阿敏，真係唔識開口！
呀！明明女神就係眼前，我居然唔知道點同佢傾計！呢啲唔通就係：這麼遠那麼近？
呢個時候，我feel到阿敏望緊我，我地係其他人既吹水聲之中，兩目雙投左數秒， 我成個人當堂打晒震，原本仲諗住開句聲壯膽，但係比佢望過黎呢一下搞到我霎時間驚青，點知佢轉個頭企左起身，一聲「好呀」，就走左埋去班女度繼續吹水，而佢既視線亦都移離左我。
阿輝見狀，知道我錯失左呢個機會，都不禁對住我搖頭示意。