【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 女大女世界
七十追釋出
聽到佢嘅答案，我同詩敏首先呆咗，其他人諗咗一諗都露出讚嘆嘅眼神，成圍枱靜晒。
T：「嗯？有乜嘢特別呀？你哋變晒樣嘅？」
二等兵就係勝在天真無邪，我明。
冰：「無特別呀。」劍冰淡淡咁同佢講。
強：「咁志華同詩敏做乜咁驚奇嘅？」
梗驚奇啦，即係寂寂無名嘅我哋喺混雙項目打低咗一間聲名顯赫嘅男女校。
冰：「哈，你都幾好嘢㗎喎，打開乒乓波校隊都可以唔識我哋學校。」
強：「好正常啫，我係打粒波，而唔係打個人，同死人頭志華唔同，所以唔使識人。」
冰：「咁呀…使唔使我喺學校搵一兩個初中出嚟魚肉下你，又或者，我嚟同妖女打波嘅時候順便嚟同你打返場，應該都…呵呵。」
我諗劍冰確實唔係講緊笑，佢呢間學校喺體育項目可以用千軍萬馬嚟形容，佢識打埋乒乓波一啲都唔出奇，而傻強嘅實力當然都只係普普通通。
T：「咁結論即係乜？」
冰：「結論就係你今晚可以同我開開心心一齊食飯。」阿冰撓住Tamama隻手講。
今次二等兵真係冷手執過熱煎堆，讀得呢間學校，睇怕家底都有返咁上下厚，運動已經非常出色，相信讀書都分分鐘可以秒殺晒我哋成枱，樣貌娟好唔使講，身型同身材嬌小啲我諗都適合Tamama嘅…呢啲女仔肯定見慣世面，唔怪之得佢敢跟埋Tamama過嚟重可以咁鎮定。
敏：「呵，今次你蝕晒喇，少爺仔。」
我：「有啲反差先好，我比較鍾意妖女同魔女。」
豪：「我諗到喇！」肥豪無端端大喝一聲。
然後全枱人又望住佢。
豪：「我終於知道Tamama點解叫二等兵喇！」
其實呢，學校入面每一班又真係有唔同特色嘅，自從中四嗰年同傻強加肥豪同一班，確實係幾有趣，我同一鳴兩對又係咁派花生，加埋個Miss Lam，日日都喺個黐黐地線嘅環境返學，係開心過上一年嘅，呢啲唔多唔少都係班會主席功勞。不過，Tamama點解叫二等兵呢條問題實在係太過荒謬，呢本漫畫本身就係short嘅，作者鍾意點編佢哋啲軍階都得㗎啦，我就剩係鍾意入面隻滅世美女安哥拉摩亞…
強：「係點解呀？！」都總要有人理佢嘅。
豪：「『易等冰』，即係Tamama容乜易等到阿冰！我終於解開呢個千古之迷喇！」
然後一陣寒冷嘅風呼嘯吹過…
強：「連Tamama都可以等運到，究竟幾時先會輪到我哋呀？生無可戀喇…」
豪：「讀physics班重要得八個女仔，七除八扣之後，結果就係零，到底返學為乜呀…鳴…」
扣咗詩敏，扣埋Wing，扣兩個生人勿近死讀書，扣一個出面有仔，扣一個男仔頭，再扣…我都明係有啲慘嘅，可以睇得又諗下嘅得返Wing，但以佢兩個又點會敢approach Wing姐，之前Wing都同我講過自從分手之後就無仔搵過佢。
旎：「其實在座呢度都重有三個單身美女喺度嘅…不妨諗諗佢。」
「喂呀！Tiffany妳亂講乜呀…」
旎：「哈，無人叫妳哋一聽到有免費大餐就諗都唔諗一齊嚟喎，entertain下人哋都要㗎啦。」
估唔到今時今日旖旎咁識玩，頭先就惡攪我同詩敏，而家就整蠱自己啲好姐妹；服咗佢，睇嚟有拖拍之後真係會唔同啲，其實無乜嘢係無可能嘅，大纜扯唔埋嘅阿冰同易等冰都可以咁咯，無嘢係唔得，呢兩隻怪獸係敗絮其外啫，實質又唔係咁差。
不過旖旎漏咗一樣嘢，在座嘅Wing姐都係單身，但又真係無理由提佢嘅，而Wing就望住詩敏同我苦笑。
「Tiffany妳好嘢呀下！自己有仔就想推我哋落火坑！」其實我從來都覺得旖旎係危險嘅。
旎：「我都係擔心妳哋幾個啫，咁大個女拖都未拍過，圍住志華轉咗半年佢又真係不為所動。」
「乜喎！圍住佢轉咪又係因為妳！」
「到頭嚟原來係因為妳睇上咗佢個波友！」
呢點我係同意嘅，如果唔係旖旎睇上阿文，阿文係無可能會做主動，但究竟幾時開始真係無人知，點都係打混雙之後呀？
我：「妳哋…唔好玩我喇，我今世只愛詩敏一個㗎咋！」嗱，係妳哋迫我放閃，唔好怪我。
敏：「妖，好嘔呀！搵鬼信，如果我哋分手，你到時好記得出家呀。」同一時間曉彤對我閃過一下不屑嘅眼神，好，我錯囉，唔吹咁大。
「詩敏師姐，咁想問下妳，呢兩隻嘢係咪好男仔？」嘩！犀利，小魔女竟然即場向劍冰偷師？
敏：「呵…唔…欵…」
面對認真嘅問題，女神開始思考，佢撓起雙手審視嗰兩隻嘢，但以我經驗，睇嚟佢唔係想畀個正經嘅答案出嚟，而對面嘅肥豪傻強就一面焦急。
豪：「有乜好諗呀？！點解答Tamama嗰陣就咁斬釘截鐵？」
敏：「有啲嘢，係會因應環境情況而得出唔同嘅答案，所以有時係要加啲assumption…」詩敏開始玩嘢將啲寫理科essay嘅重點講出嚟。
豪：「咁妳要assume啲乜呀？女神…」
敏：「假設同一個男仔流落荒島嘅話，你都係一個好選擇嚟嘅。」嘩，乜咁爆呀，荒島…孤男寡女…
豪：「女神，妳係咪終於發現我內在嘅可靠喇？知道我有逆境求生嘅能力，可以喺艱難嘅環境下照顧到女仔。」邊有咁好死吖，天真。
敏：「都係嘅…如果荒島上面搵唔到獵物，起碼身邊都重有一隻吖，無咁易餓死。」話口未完…
冰：「哈哈，嘩卡卡，妳真係好正，夠晒妖女。」
豪：「妖女！正一妖女！我恨妳呀！」
敏：「理得你哋點講，就算我係妖女，都重有一個男仔對我死心塌地呀，呵呵。」…。
強：「咁我呢…」睇嚟唔自掘墳墓係唔安樂。
敏：「你打乒乓波都剩係見到粒波同張枱，見唔到對面個人，點解唔考慮同粒波拍拖就算呢？」
強：「嗚嗚…我知錯喇。」
冰：「你兩個真係無鬼用，如果喺我學校一早就俾人恰死咗喇。」
彤：「其實妳哋可以唔使問我哋嘅，如果哽得落嘅話認識下都無壞，發覺唔對路咪掉頭走囉。」
如果曉彤妳早啲睇得開嘅話，我哋又邊使搞到咁…
詠：「呢兩位師兄點都有啲用處嘅，如果妳哋有理科問題唔明佢哋都或者幫到下手。」
豪：「鳴…呢啲先係人講嘅說話嚟㗎嘛！」
「咁，識多兩個朋友都無壞嘅…」
強：「師妹…真，真係？！」聽到隔籬小魔女咁講，傻強即刻成個人彈返起身。
豪：「放心，妳哋三個呢餐茶巾芥全免，兼不收加一代支泊車費，保證一蚊都唔使畀。」認真市儈。
強：「唔好理佢，佢係個呃飯食嘅衰人嚟，唔喺荒島佢就一無是處㗎喇，我先係一個正常嘅男仔。」
豪：「喂！咁講乜嘢意思呀？呢度三個師妹，得我同你兩個，突章㗎喎，有乜好爭？」
強：「無乜好爭，咁你讓我揀先啦。」
豪：「咁唔啱數喎，餐飯係我搞嘅，師妹係我邀請嘅，點可以你揀先呢？」
強：「我揀先，剩返兩個都係你嘅，有你著數。」
豪：「大家咁耐兄弟，唔使你禮讓，我哋猜包剪揼決定先後次序啦。」
強：「唔得，猜親都係你贏嘅，我哋用乒乓波嚟分先後啦。」
豪：「你都霎戇嘅！咁你而家返屋企攞拍同波囉，我哋保證喺度等埋你。」
強：「咦，唔係喎，對面有羽毛球拍同波喎。」
敏：「收皮啦！唔好整污糟我塊拍呀！」
豪：「正一孤寒妖女，又唔係整污糟妳D波！」
冰：「哈哈！好呀，係咪有打架睇？」
黐線…呢兩條友，邊似係想識女仔㗎，朋友都未做成就搞到三隻小魔女扁嘴兼反白眼，無眼睇，拜託你兩隻嘢都係乖乖讀好書先唔好出嚟遺害人間。兩隻廢物繼續自相殘殺，三隻小魔女就喺度靜觀其變，旖旎就一路溫仔一路笑鬼佢哋，我一於懶理。
我：「敏，夾粒核桃畀我得唔得啫。」
對於呢樣高級飯局小食，可能我同一鳴又細到大食得多已經變成毒癮，佢都係咁一粒接一粒放入口，反而其他人就無乜反應，而且各有各忙。
敏：「無呀，唔服侍細路仔呀。」
妳呢個冷血嘅妖女，都唔明點解我會對妳死心塌地…我鍾意食核桃就話我食路仔，妳無事無幹走去練左手揸筷子唔係細路女？
文：「呀…」
阿文…夾咗一粒放喺我面前…
我：「你…搞乜鬼？」
文：「無呀，我幫我未來女朋友代勞㗎咋，費事你咁陰功啦。」佢個樣竟然有少少認真。
我：「喂！有無聽過男男授受不親呀？」
文：「算，唔領情我就自己食。」然後放咗入個口…
旎：「一早都話咗呢兩隻嘢係有嘢㗎啦。」
敏：「快啲拗返直妳條仔啦，唔好同我爭玩具…」
詠：「呀…男女授受相親喇掛？」
Wing姐佢隔住詩敏伸長隻手，又夾咗粒放我面前…我…係打死都唔敢食嘅。
我：「Wing姐姐…妳想點？」
敏：「可能佢想玩家家酒呢？」
詠：「㖿…踢爆人嘅，咁得唔得啫？」
敏：「家家酒…好玩呀！」點解我有個咁黐線嘅女朋友…佢真係一面興奮咁。
詠：「Yeah！好鬼衰嘅啫！呀…」
敏：「喑。」然後詩敏食咗粒核桃落肚。
我：「妳兩個慢慢玩，唔好預我就得。」
冰：「其實對面喺度玩緊乜？」阿冰問易等冰。
T：「唔知呀…我從來都唔知佢哋幾個搞緊乜。」
彤：「嘻嘻，阿冰，就等我同妳解釋下啦。」
然之後唔止阿冰，就連Tamama同肥豪都塞埋個頭聽曉彤細細聲講，而一鳴就望住我苦笑；唉，懶得理，結果我唯有成碟仔核桃攞過嚟面前用手食。
敏：「一早咁樣咪啱囉，都唔明做乜要人喂。」
我：「話晒咁多人，我會唔好意思㗎嘛。」
敏：「呢餐你係主角，無人理你㗎喇。」
呢個時候曉彤同劍冰喺度細細聲講大大聲笑，阿冰望一望我又望一望詩敏，個樣奸到呢…
敏：「曉彤妹妹，妳又喺度講緊邊個壞話呀？」
彤：「無呀，講緊某個妖女點樣搶人條仔咋嘛。」
豪：「係囉，我竟不能相信原來事實是這樣！」
敏：「喂，好似係妳玩爛咗隻玩具掉咗佢咋喎。」
彤：「無辦法啦，鬼叫佢嘅靈魂已經俾妖女污染。」
詠：「咁曉彤，我係咪又要話妳搶我條仔？」
Wing姐用左手捉住一鳴頭頂，再將佢個頭轉來轉去，好似當佢玩具咁玩。
彤：「邊係呢，我都不知幾多謝Wing姐姐妳將個好男仔拱手相讓，俾妳馴服過係乖巧啲嘅。」
呢三個姐妹已經黐咗線，我同一鳴都係唔出聲為妙。
冰：「哈…貴圈真係夠晒亂…」
T：「放心啦，佢哋嘅嘢同我完全無關…」
好彩呢個時候開始上菜，暫停咗呢三個女人嘅鬧劇…有時總覺得，佢哋三個枱底交流啲嘢都唔知有幾多，可能我同一鳴只係兩隻無知嘅玩具俾佢哋玩弄於股掌之中。
第一味係蟹肉竹笙花膠，啲蟹肉好足料高湯好正，但食物已經唔再係今餐嘅重點，睇住傻下傻下嘅易等冰，溫柔嘅Tiffany妹妹，加埋意圖同小魔女謦欬嘅傻強…做乜，今日會咁精彩嘅…