【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 冷手執個熱煎堆
230k釋出
敏：「佢係嘅。」
冰：「咁下年嘅隊長Tiffany，妳覺得呢？」
旎：「其實我細佢哋一form，不過聽返嚟就，Tamama係一個好正經同好乖嘅男仔。」
其實重有好細膽同好內向，但當然唔講出嚟。
冰：「曉彤，咁妳認為呢？」
劍冰真係好犀利，短時間之內就可以喺我哋啲對話之中記住啲人名，D1確實唔係虛有其名。
彤：「嗯…佢唔係我口味，不過又真係無乜明顯嘅缺點，唔似得某啲剩係識做女神隻兵，打波又專恰女仔嘅衰人。」呢個EX真係多謝晒…
冰：「咁詩敏隔籬嘅…」
詠：「妳可以叫我Wing，Tamama係咪好男朋友我唔知，但佢一定係好仔。」
冰：「既然係咁，我都唔使自己嘥心機搵答案啦。」阿冰一副定過抬油嘅樣，好似睇穿一切咁。
T：「妳…妳哋…好多謝…」
試問一個男仔幾可有機會可以同時受到四個女仔嘅認真稱讚吖，我俾人圍攻批鬥就試得多，四隻小魔女都係當我玩具咁玩…所以呢，平時無乜太多情感動作嘅Tamama，都有眼淺嘅時候。
冰：「傻瓜嚟嘅，做乜喊喎。」
每個男人最幸福嘅時候，就係可以喺女人嘅心口入面做傻瓜…
強：「嗚嗚嗚嗚…慘絕人寰呀！」
豪：「叛徒！你無資格喊呀！我哋都未喊！」
T：「我…開心…得滯…」
係嘅，當一個毒撚俾心愛嘅女人接受而脫單，嗰種開心同激動實在係難以言喻，只不過我實在係太好彩，周旋喺兩個女人之間被玩到死去活來，好似從來都無感受過呢種平凡而實在嘅幸福；由一開始做兵，俾全世界食花生，唔知女神諗乜，死抽爛抽每日過住不安同無奈嘅生活；再到夾喺女神同初音之間，每日都要面對嗰種心理落差，喺愛與性之間掙扎，隱瞞自己嘅秘密；然後曉彤強姦咗我，嗰種震驚，嗰種不解，不知所措嘅心情到而家仍然係揮之不去，幼稚又愚昧嘅我以為做個好人負起責任就得而不惜背叛自己嘅心意，以為係女人都得，漸漸先發現自己嘅諗法實在天真到唔現實，加埋無能嘅自己一次又一次犯錯，再喺一時衝動之下將我同曉彤迫入絕路…喺最痛苦嘅時候先聽到詩敏嘅心意，你叫我點開心得落？嗰刻嘅我儼如已經自暴自棄，等候上天嘅發落；到同詩敏第三日拍拖，當然都有幸福同開心，但濃濃嘅不捨同惋惜已經蓋過晒所有其他感情，呢一日係帶有拘束嘅愛，有時限嘅愛，最真實亦最切膚之痛嘅愛，愛過之後剩返落嚟嘅就係遺憾；最後曉彤搵返記憶，連個天都笑你自作聰明同白費氣力，無力感油然而生，只想逃避一切，害怕女人同愛情…
唉，唔講啦，好彩已經雨過天青。
望住傻更更嘅Tamama攬住劍冰，我都真係幾羨慕，雖然唔知佢兩個點解可以喺咁短時間搞埋一齊，但如果我係女仔嘅話，見到Tamama黐埋嚟應該都唔會抗拒；尤其係劍冰，相繼被男友同好姐妹懷疑以至背叛，百般無奈咁同重壑相處咗三年，雖則無我嘅經歷咁驚心動魄，但始終都係唔好受，頭先同佢打波完全體驗到嗰種深層次嘅孤獨；喺放低之時無挐挐有隻二等兵彈出嚟，應該都會豁然開朗嘅。
愛情，有時簡簡單單，傻下傻下，糊里糊塗都唔錯，只要過得開心就好；萬裡挑一，你又點肯定你嘅選擇係正確答案？
豪：「咪住！Tamama！你而家已經唔再係毒撚，所以呢餐飯你都要出大嗰份！」
T：「呀？即係點？」思想簡單嘅Tamama當然不明所以，世間嘅險惡就好似同佢絕緣咁。
豪：「即係咁，你情人節去食飯，都會有毒撚專用嘅粟米肉粒（show me your love）飯同呢個有情人終成眷屬大餐，兩者嘅價格當然係唔同嘅，為咗一視同仁，同埋體現我哋對你嘅祝福，今餐會收你貴啲嘅，你諗下喎，你坐底都要出兩份㗎啦，係咪？」
面對肥豪不知廉恥嘅天花亂墜，就連三隻小魔女都忍唔住笑，佢哋梗係笑得落，因為係受益人嚟…
T：「咁…會唔會好貴？」
強：「唔使太擔心，對面已經有三個老襯陪你！」
Tamama望一望一鳴，到我，再到阿文。
T：「阿文…係老襯？」
強：「係呀，你嚟遲咗十五分鐘，miss咗好多嘢。」
T：「咁阿文嘅另一半係？」
豪：「你咪望下邊個坐佢隔籬囉。」
Tamama先係望一望旖旎，然後又再一面天真咁注視住我…
我：「喂！你望住我搞乜鬼呀？！」
敏：「一早就話咗你兩個有嘢㗎啦！」
T：「哈哈…講下笑啫，阿文…旖旎，恭喜晒！」
文：「客氣啦，我哋恭喜你兩個至啱，今晚要勞煩你破費喇。」
喺商場上面，老襯當然越多越好，對已經俾人搵咗笨嘅參加者而言，絕對唔會介意多一隻水魚入嚟玩呢場遊戲，攤分之下我哋都會得益。唔理三隻小魔女同佢兩個有乜瓜葛，如果四份大兩份細，睇怕佢哋如意算盤就係淨出自己嗰份，剩返十二個人頭就除四份…
T：「但我㩒咗五百蚊咋喎，唔知夠唔夠…」
唔好話佢，就連我都估唔到肥豪同傻強兩個會玩咁大，奉勸各位聽到朋友話不如食豪啲好唔好千祈唔好下巴輕輕應承。
豪：「放心，對面個地主會提供免息分期，絕對唔會要你留喺度洗碗嘅！」
我真係頂你個肺，乜都自把自為，雖然Tamama於我有恩係可以幫佢出住先，當我正想開聲鬧鬼佢嘅時候…有人捷足先登。
冰：「喂！你個死肥嘢，咁樣勒索同學夾錢資助你食飯，你都真係幾厚面皮㗎喎！」
嘩…唔好睇佢人仔細細粒，講起嘢上嚟十足十女中豪傑，同詩敏可謂不分上下，呢個其實喺比賽時已經感覺到，唔係詩敏命令我狠下殺手根本就…
豪：「唔好誤會，我哋兩個係會出返自己嗰份嘅…阿嫂妳唔使太擔心。」
對住劍冰，肥豪採取穩守嘅策略，聽到佢兩條粉腸承諾會出返自己嗰份我都安心少少。
冰：「嫂你個頭！總之我唔會俾你蝦Tamama，你出返你嗰份嘅唔該攞個磅嚟，你食咗幾多份量就出返幾多錢，一係用你體重嚟除都得！」
豪：「此言差矣呀，夫人！其實呢個主意並唔係小弟嘅意思，係嗰邊位一鳴先生話既然今晚咁開心，為咗表達佢哋謙謙君子嘅風度，無理由要靚女們夾錢㗎嘛，所以咪話包起埋女仔嗰份囉…妳睇下，佢身邊嗰兩位美女幾開心…咁我哋兩個孤家寡人，試問又點好意思搶幾位公子哥兒嘅風頭呢？」
肥豪決定使出聲東擊西暗渡陳倉，四兩撥千斤一腳將個波踢畀一鳴，頭先自鳴得意嘅佢都無力反駁。
冰：「正一小人長戚戚！」
好嘢…一個用論語嚟鬧人嘅女仔。
T：「阿冰，算啦，今日咁開心，按道理我哋都要出多份嘅…志華，唔好意思，咁我一陣喺ATM㩒返畀你啦。」
我：「食完先算啦…呢啲小事。」
唉，我又點捨得唔幫Tamama出住先吖，同埋好心你就唔好咁順攤啦，等我同一鳴兩個食完屈揼砌嗰兩隻嘢嘔多一千幾百都好吖…
冰：「唔使麻煩人哋喇…」
阿冰出手制止咗Tamama。
冰：「今餐我幫你出啦。」
我：「阿冰，呢餐…唔嘢少㗎喎…」
冰：「得啦，我話OK就OK，唔使擔心。」
我：「妳肯定妳有帶咁多現金出街？」
冰：「傻嘅咩…邊有人會日日攞住咁多錢喺身？有卡做乜唔轆？如果你想方便咪叫酒樓分卡轆。」
我：「哈…哈…咁就得啦，妳都好熟咁。」
真係估唔到，雖然附屬信用卡唔係啲乜新奇嘢，但有呢樣嘅中學生始終都係佔少數，呢個劍冰實在係唔簡單。
冰：「吓，好正常啫，如果我哋學校球隊齊人去食夜晚，隨時兩三萬㗎喎，唔夠credit都時不時發生，重會有人搶埋單賺里數。」
敏：「阿冰，妳講過妳平時係打開D1，介唔介意話埋畀我哋知係邊間中學？」
冰：「聖，Paul，Co，Ed。」