【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 冰雪聰明，劍落伶俐
科學禁書150k釋出
強：「睇嚟呢個唔係旖旎同志華嘅故事，似係詩敏同曉彤上年嘅故事多啲喎。」
得㗎喇，你哋全部車毀人亡算啦。
敏：「傻強，你下年交畀我啲lab report我會直接用bunsen burner燒咗佢㗎喇。」
彤：「我同詩敏六年姐妹感情歷久彌堅，點容你呢啲唔知頭唔知路嘅人說三道四呢？！」
我乜都唔想知，妳哋唔好再玩家家酒就得！
詠：「阿冰，妳諗清楚未㗎？聽妳咁講，睇怕重壑都係勉強同個女仔一齊，好難會有幸福㗎喎。」
喺感情事上面，我覺得Wing姐永遠都係最冷靜嗰個，經常可以將重點一語道破，雖然佢自己當年同一鳴就都幾亂嚟下；而聽到佢呢一句，Tamama個樣又即時突咗一突，眼神中透露出絲絲嘅哀愁，係嘅，兩個鐘前明明重係陌生人，唔知經過啲乜嘢事可以帶埋阿冰上嚟踩場，莫講話我哋唔知，我相信佢自己都糊里糊塗，加上完全無同女仔相處嘅經驗，分分鐘就好似我中四時完全唔知女神同曉彤兩個諗乜咁…唉。
冰：「唔緊要吖，幸唔幸福唔重要，佢自會有佢正確嘅選擇，亦都唔關我嘅事。」
詠：「唔會覺得好可惜咩？」
冰：「都可惜，不過係已經發生咗嘅可惜，亡羊未必可以補牢，與其捉住一啲為時以晚嘅過去，只不過係跌落地揦返拃沙，我同佢無咁矯情，倒不如追求美好嘅將來重好啦。」
敏：「估唔到妳可以睇得咁化喎。」
冰：「如果要有火花，一早就已經有咗；如果係要打波打到上床，咁已經上咗唔知幾多次；如果我哋係會有將來，睇怕早就不惜犧牲一切…三年幾以嚟，做朋友都做到困難重重；既然係咁，嚟到呢刻就不如放低啦，對咗咁耐其實點會唔知對方諗乜吖，今日場波完咗之後，我只想舒舒服服過日子，嚟緊呢年專心溫A level，而重壑入U之後就會打開人生新一頁，佢同而家條女係點唔重要吖，唔好煩到我就得。」
阿冰一路講，個頭就挨咗落Tamama膊頭度，點解…可以咁快就咁親匿，點解我當年同詩敏要咁辛苦，雖然同初音玩又係另一種奇特嘅體驗。但我睇得出，阿冰呢一刻真係好舒懷，好似過去嘅問題終於煙消雲散，有啲似我上年知道曉彤同一鳴攪埋一齊咁，就算唔知曉彤玩乜花臣，但當佢唔再沉溺喺為我同佢嘅關係悲傷，自然就可以放低心頭上面嘅大石。
敏：「重壑入大學，點解重可以打甲組嘅？」
冰：「佢年尾先生日吖嘛，妳唔知咩，聽聞話只要報名嗰時重係十八歲，主辦機構都好似會隻眼開隻眼閉，如果無記錯係有人同一時間打單打乙組同混雙甲組添。」
敏：「如果係咁，即係我下年可以再打？」
聽到呢句，阿冰隻眼閃過一絲寒冷嘅殺氣。
豪：「呼呼呼！終於搞掂！忙死我！」
肥豪氣來氣喘咁走返入嚟，重抬住一張凳，呢度啲凳係實木做的確幾重，都未至於要咁呀？而跟喺肥豪後面重有位侍應姐姐，攞住一set杯碟同筷子羹，肥豪望咗一嘢之後就攝張凳入傻強同Tamama中間，眾人即刻起身縮位，一張大枱坐十四人真係幾迫下，不過呢種熱鬧又好開心，而且我同詩敏其實一張凳都夠啦，放佢喺我大髀上面喂我就啱啱好，嘻嘻。
豪：「喂！講到去邊呀？」
我：「講緊阿冰啲陳年往事啫。」
豪：「即係未講Tamama呀？」
強：「未！呢個叛徒要等你返嚟先審問佢！」
豪：「好！咁就升堂！」
強：「威…武…」
喺外人面前搞啲咁嘅嘢，呢兩隻嘢真係可以唔面紅都得嘅，知唔知個醜字點寫㗎…
豪：「Tamama你呢個叛徒，快啲從實招來，啱啱呢粒幾鐘你到底發生咗乜事？」
T：「我…其實…我都唔係好知。」
豪：「講！又唔係你同人打波，點解你會識到人哋㗎？」
T：「我…只係睇唔過眼…志華個死人頭咁打波…擺明蝦女仔，所以想支持下佢。」
豪：「支持咪支持囉，點解支持到拖埋嚟食飯㗎？中間發生咗乜事？」
T：「呢…呢層呢…」
冰：「唔使怕，有我喺度，直接同佢講啦。」
T：「我…成功表白咗喇！」
Tamama呢句，聽到全場人都呆咗，一個怐咗三年都唔可以成功表白嘅內向男仔，竟然可以喺一個同自己無關嘅球賽入面向一個完全陌生嘅女仔表白？！到底發生咗乜事？但見到佢而家同阿冰黐到咁埋，睇嚟事實又真係咁嘅一回事…
豪：「你…表白…講真㗎？」
冰：「做乜呀，唔抵得你兄弟鍾意我呀？」
豪：「但…睇場波就鍾意？一見…鍾情？」
其實一直以嚟，Tamama都無乜同女仔相處㗎啦，如果要計佢點解會想同女仔表白，咪就係一見鍾情囉；想當年我同詩敏表白咪又係咁，因為佢靚，因為身材正，因為佢打波個樣好吸引，因為大家叫佢女神…但其實我對佢根本就一無所知，所以就俾佢玩弄於鼓掌中成年幾。
強：「你諗清楚未㗎，你都唔識人哋，鍾意佢乜？」
冰：「哈，你唔係覺得我呃佢感情呀？」
T：「我鍾意佢…打波嗰陣時頑強嘅毅力，每一下都展現出無比嘅冷靜同忍耐，對住個黐線佬都可以不屈不撓咁防守，直到最後嘅一分都唔會放棄…咁嘅女仔…好靚，我係真心鍾意劍冰。」
Tamama呢番說話，令到我哋全場人呆晒。
鳴：「掂呀！估唔到Tamama第一次表白就可以咁有紋有路，同某個中三嘅傻仔完全係兩回事。」
妖…好過你lunch俾個姐姐色誘上床啦。
豪：「如果佢叻就唔使猜輸包剪揼啦，剩係識做人哋隻兵，無鬼用！係男人之恥！」
我：「我錯囉…」我即時變咗死魚眼。
當日佢兩個喺現場睇住，我的確無力還擊。
敏：「佢係鬼鍾意我，黑仔猜輸包剪揼見我靚女先嚟搵我咋嘛，鄙視佢呀！」
女神…連妳都咁話我嘅…生無可戀了。
詠：「係囉，真係高下立見，我開始明詩敏妳點解當佢係兵玩咗咁耐喇。」
敏：「唉…早知係咁我不如搵Tamama好過。」
冰：「妳就想！妖女，Tamama先唔會睇上你呀！」
T：「嗯，妳就同打茅波嘅志華一齊啦，咁樣先登對呀。」Tamama你個吃裡扒外嘅反骨仔…
冰：「我同你兩個講呀！如果唔係三盤兩勝而係五盤三勝，呀唔使，只要畀多十分我，你哋根本就無可能贏，死人頭志華隻手根本就唔可以再殺落去！」
敏：「呵，我哋就係咁好彩可以贏埋最後嗰一分呀，有時贏同輸，就只係因為啱啱好。」
T：「阿文可唔可以教我打波呀？」
文：「都得嘅…雖然A level無乜時間，但你想點呀…」
T：「我想同阿冰拍雙打，打贏對面嗰兩隻嘢！」
身邊多咗個女仔啫，二等兵好似升咗做軍曹咁嘅…
文：「短時間應該無乜可能喎，除非而家即刻打，睇怕志華要用左手揸拍。」
冰：「Tamama唔使，要報仇我一個人就得，志華只不過係隻中國象棋嚟嘅啫，重要係卒呀，妖女，我要同妳單打！妳敢唔敢應戰呀？」
明明呢餐係我嘅慶功宴，點解…會咁唔對路。
敏：「哎呀，我打波當課外活動㗎咋，做乜係要打打殺殺，都唔明啲D1圈嘅女仔做乜咁執著…不過，妳真係咁有信心贏我？畀兩個月時間我抖抖先，到時我驚妳喊喎。」
無容置疑，詩敏本人係有D1實力嘅，只不過我哋學校打學界係得佢一個有得打下，其他女仔就…至於阿冰嘅底蘊我哋已經見識過，亦相信佢單打嘅時候唔會有太大變調；但無論如何，絕對係一場惡鬥。
冰：「好吖，兩個月之後我就嚟你哋學校打交流戰，唔止妳一個，我掃晒妳哋成個女子隊都得。」
旎：「喂！嚟我學校踩場問過我未呀？我就係下年嘅女子隊隊長，妳贏得到我先同詩敏打啦。」
冰：「好呀！無所謂，多啲嚟密啲手啫。」
拜託，女人嘅戰爭，唔關我事。
豪：「啱嘞，咁要快啲安排，同學校申請埋，俾對家啲學生嚟觀戰，到時我做莊，旖旎就受讓五分，詩敏就平手盤，咁應該差唔多…」
旎：「點解我要受讓呀！唔需要呀！」
強：「需唔需要呢家嘢係賭仔話事，唔係球手話事㗎，如果妳咁有信心咪買重自己贏囉。」
鳴：「我想問有無波膽買㗎？或者總落網咁？」
豪：「有有有，乜都有，呀，應該要再加多啲賭注，如果詩敏輸咗就要罰志華裸跑。」
為何受傷的總是我？
強：「吓…咁點解唔罰本人裸跑呀，我唔想睇仔裸跑喎…」
呢下真係手掌又係肉，手背又係肉…
文：「欸，交流嘅嘢，不如之後再慢慢謦啦…阿冰，妳都係啱啱識Tamama㗎咋喎，咁快就跟佢嚟食飯，唔係為咗嚟踩場呀？」
諗落又真係怪，話Tamama欣賞阿冰走去識人哋都重可以理解，但點解可以發展得咁快嘅，斷估就唔係Tamama嘅意思，呢個女仔喺度諗緊乜呢？
冰：「梗係唔係啦，我邊有咁無聊呀！」
詠：「咁突然有個唔識嘅男仔嚟approach妳，妳唔驚嘅咩，唔使慢慢認識下先？」
冰：「我想講，呢樣嘢其實喺D1圈係好common，女校嗰啲重離譜，Paul Con，協恩，女拔，真光啲女神隨時打場波可以識到半打仔，只不過…我唔係咁常遇到啫，同埋，既然係好男仔嚟，我又有乜好擔心呢？」
鳴：「吓？一見面就知佢係好男仔？」
冰：「想知佢係咪好男仔，嚟認識佢嘅朋友就係最好嘅方法。」
原來妳哋係咁玩嘅，真係大開眼界。
我：「女神妳都呃我呃得透徹見底咯，乜嘢DIY都唔識，點解會變咗老司機咁嘅？」又咬佢耳仔。
敏：「要怪就怪你自己入世未深，成日天真俾女呃。」
冰：「詩敏，咁我問妳，Tamama係咪好男仔？」