【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 貴圈真亂？吾圈真亂。

作者榜第十位釋出

一般嚟講，揸板打嘅波有四種，學界大致上都係羽毛波同乒乓波，網球同壁球比較冷門，多數係啲高產小朋友先會玩，但論貴圈真唔亂嘅話，我諗乒乓波係會排第一。
強：「正是。」傻強已經面如死灰。
冰：「咁無計嘞，你已經輸在起跑線。」
敏：「冰，我唔追究妳住，繼續講嗰兩隻怪獸，我都想聽。」
冰：「咁由於條友仔經常都可以同啲女球手保持住超友誼嘅關係，去到中三四咪開始打埋混雙囉，因為呢邊競爭低啲，佢又好容易搵到女仔陪佢part，但…佢呢啲咁嘅人，又唔定性，身邊又多誘惑，無乜邊個可以長期忍受到佢，今個月糖黐豆完，下個月就可以鬧到僵晒以後唔再喺同一個球場上面出現…不過佢唔care㗎，一來可以繼續打男單男雙，下個月又可以搵到第二個女仔同佢part，就係咁一直換partner，直到佢而家呢個partner出現。」
強：「你哋打波定打炮㗎…係咁啪part啪…我真係好命苦呀，嗚嗚嗚嗚…」當然係唔會有人理佢。
冰：「呢個女仔好特別，佢同之前嗰啲妖女姣『嘟』…狂蜂浪蝶都唔同，雖然佢都有啲姿色，但佢真係專心打波，從來都無攪過男女關係…」
女人呢…希望詩敏唔會記仇啦。


冰：「直到佢兩個相遇，一齊嘗試打混雙，嗰陣大家都覺得好奇怪，因為呢個女仔唔似會喺球場以外嘅地方滿足到佢，只係為咗佢嘅球藝先合作，而條仔嘅性格從來都係有食錯無放過，所以認為佢哋好快會解散…但神奇嘅就係，好快就傳出佢兩個已經搞埋咗，當大家諗緊係咪條女開始大個所以有轉變嘅時候，佢只係拋咗一句，無所謂，有波打就得，呢一句激到D1圈啲女死咁滯，之後有啲婊子試過去煽風點火，又有EX走返去返撻條仔玩足幾日幾夜，結果條女都係一笑置之…自此，佢哋呢pair就一直打落去，由中五到而家已經差唔多兩年，越嚟越順手，就係你而家所見嘅佢哋。」
彤：「嘩…條女咁高章嘅…」
旎：「乜真係有女仔可以咁大方嘅咩？成個D1圈都知道晒喎…諗起要喺啲咁嘅目光下過日子我實在係想像唔到。」
有時我會喺度諗，我身邊嘅女同學都唔係幾想像到…重有一個令我大開眼界嘅Miss。
我：「我就覺得，佢唔係高章或者大方，只係佢同條仔一樣係傻嘅，根本就唔當球場外嗰啲嘢係一回事，只係好似熱身同拉筋咁，但返到去比賽場上面，嗰度先係佢哋真實嘅世界，好似變咗另一個人咁。」
冰：「你咁理解都得嘅…不過佢哋而家就平靜咗好多，已經無乜人得閒理佢哋，應該嚟緊會一齊打職業賽。」
敏：「係呢…頭先一打完場波，重壑就急急腳走嘅，佢無乜嘢吖嘛？」
冰：「可以有乜嘢吖，我同佢乜都無，就算想有都唔可以有，今日係我同佢最後一次打混雙喇。」
我：「點解咁講嘅？唔係輸咗就封拍呀？」
冰：「唔係咁嘅…好長篇喎，怕唔怕阻住你哋食飯呀？」


強：「點會阻呢，妳自己都有份食嘅。」
無錯，Tamama帶得佢嚟，一定預埋佢㗎喇。
T：「我想聽呀。」二等兵一面期待但又有啲怕醜…
劍冰呢個時候摸摸Tamama個頭，神情非常溫柔，同佢喺球場上面嘅表現好唔同，我覺得佢應該要改名做冉冰或者恬冰會貼切啲；雖然Tamama高佢成個頭，但個畫面就好似家姐湊細佬咁；喺啱啱呢一個鐘頭入面，呢對人仔到底發生咗乜事呢，實在係太神奇喇。
冰：「我哋呢啲讀D1圈學校嘅學生，無論係有乜嘢才能都會畀學校用到盡，所以我由中一開始就年年都出戰D1學界，咁都無乜嘢嘅，學界係得女單同女雙㗎咋嘛，打波咪打波囉，直至中三個暑假，學校嘗試叫我同重壑一齊打混雙，我先知道原來青年錦標賽係有混雙呢個項目，咁點解學校搵我哋兩個呢，係因為我哋都唔係首席球手，實力大概排二三到，學校為咗發掘多啲攞奬嘅可能性就搵咗我哋，而重壑佢係大我一屆嘅。」
D1圈…實在係另一個世界，唔係我哋呢啲凡人可以明到，但估唔到無打開波嘅其他人都會有興趣聽。
冰：「妖女妳所講嘅打混雙打上床，其實我都覺得無乜嘢，好多人都係咁…」Tamama聽到呢句個樣有啲不安，好鬼趣緻…「但呢樣嘢就無機會發生喺我同佢身上嘞，因為中三嗰時，我係有男朋友嘅，佢係我小學同學但中學就唔同學校，都係一齊打開波，我同佢由中二就開始拍拖…」
我：「喂…妖女，妳又話，佢不解風情，未拍過拖，DIY都唔識，點解同事實不乎㗎？」我喺詩敏隻耳仔側邊細細聲講。
敏：「唔謴下你點會打得咁落力呀，食完飯我先慢慢好好招呼返你呀下。」妖女回敬我。
冰：「咁D1球圈其實好細，有乜八掛新聞幾日就通晒天，咁我條仔當然知我會拍個師兄打混雙啦，開初都無乜嘢，我諗住打波就係打波，自己有仔都唔會再諗無謂嘢，而且當年細個學校話乜就乜唔會夠膽反抗，但原來…事實並唔係自己所諗咁簡單。」


詠：「唔使問，條仔肯定好快開始發癲。」
冰：「係，因為有好多無聊人，婊子會傳我同重壑嘅謠言，搞到我成日要為咗啲無中生有嘅嘢解釋，漸漸地佢開始唔信任我，無時無刻都會check住我，又搵我哋學校啲人做佢線人，當時我好煩，唔知點好，承受咗好大嘅壓力…而重壑其實知我煩緊乜，作為師兄佢都有開解我，令到我當時好溫暖。」
彤：「哎呀，實好enjoy啦，出事喇，出事喇。」
冰：「無…雖然我都enjoy嘅…佢係一個好正經嘅師兄，知道我難處所以佢都講到明唔會影響我同男朋友嘅感情，唔會打我主意，叫我可以放心，雖然佢嗰陣係單身，但佢講得出做得到，半點唔安份嘅嘢都無做過，就連我每次交個波畀佢佢都永遠唔會掂到我隻手。」
詠：「嘩，咁好仔去邊度搵呀，不如轉會算啦。」
冰：「哈…諗返都好可能係，但我中五嗰陣做咗樣好蠢嘅嘢，當時我知道有個好姐妹冧佢，就諗住撮合佢兩個，只要重壑有女朋友，咁我條仔就應該可以放下心頭大石，我帶埋個姐妹出嚟一齊打波，打完佢又叫中六嘅重壑幫佢補習，然後食飯直落，重壑其實點會唔知我嘅心思吖，咁單身嘅佢覺得個女仔都OK，又可以幫到我解決煩惱，佢兩個好快就一齊咗。」
旎：「唔好同我講然後妳同條仔散咗呀？」
冰：「你估中嘞，我當時畀重壑同好姐妹拍拖啲相條仔睇諗住氹返佢，佢只係哦咗一聲，然後好冷淡…後來，我先知佢當時已經同校內嘅一個女隊員打得火熱，當我同佢攤牌嘅時候，佢只係輕描淡寫咁同我講咗句對唔住，話不如一人一次當無數打和，重叫我快啲追返重壑…我當時係完全崩潰，而且就嚟會考，每日都過住地獄般嘅生活。」
敏：「嗯，睇嚟球圈入面真係妖女處處呀下。」
冰：「係，條女又係鬼火咁靚身材好，最鍾意對住啲男仔發姣，就同妳差唔多。」
敏：「當妳頭半句讚我，後半句屈我，遲啲先同妳計數，繼續講落去先。」
冰：「無嘅，無得鬥都無辦法，鬼叫自己揀咗條仆街做男朋友，雖然佢以前唔係咁樣…單身咪單身囉，咪專心溫書囉，都無嘢㗎，橫掂重壑同位好姐妹已經好穩定，咪正好乜都唔使諗修心養性。」
文：「Tiffany，都幾似妳同志華哥哥嘅故事喎。」
真係唔知搞乜，今日啲仔好似全部都唔俾條女虐殺都唔安樂咁，唔通係我嘅錯？
旎：「收嗲啦，係咪想我休咗你等你下年無拖拍呀？唔好阻住冰姐姐講故事啦。」


Tamama同阿冰聽到呢句都一頭霧水，大惑不解…
冰：「直到上年考完會考我又同重壑出賽，結果我同佢都feel到有問題，就係佢嘅女朋友，我嘅好姐妹開始介懷我，佢差唔多次次都跟出跟入，明明唔係校隊但考完會考又日日返嚟睇我哋練波，搞到我哋非常之唔自在，重衰過我有仔嗰時…之後嘅你哋大概都估到㗎啦，條女同我越嚟越疏遠，但係就戴住個假面具嚟同我相處，喺球場入面呢幾年，我同重壑之間就好似永遠有埲牆咁，從來都未試過自由自在一心一意咁練波，我同佢都覺得成件事好可惜，呢個唔係贏輸嘅問題，而係我哋根本就唔知自己喺度做緊乜，我哋唯一嘅應對方法就係將我哋之間嗰面牆延伸去到球場嘅對面，憑住我哋穩定嘅防守能力一直打到今日，今日佢條女都有嚟觀賽，所以輸波之後佢就急急腳搵佢，而呢場鬧劇亦都終於落幕，我以後可以永遠唔使再見到佢兩個。」