【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 消失的一小時
QQ1.25M釋出
文：「總之，個情況大家都知啦，所以拜託大家，為咗我哋平平安安，喺學校就唔好講出去喇。」
豪：「無問題吖。但係！你而家有女！就係我哋毒撚嘅叛徒，所以呢餐你都要出大份！」
文：「OK吖，無問題，難得大家咁開心，志華出幾多我就出幾多啦！」
我：「你諗清楚未㗎？佢兩個唔係人咁品㗎喎…」
文：「無所謂啦，最緊要我同Tiffany都開心啫！」
戀愛…確實會令人沖昏頭腦，呢餐夾幾錢事小，希望呢兩位好同學嘅初戀體驗可以順順利利啦。
強：「嗚嗚，點解會咁㗎，連阿文都有女，重要即刻大口氣到咁，呢個世界太唔公平喇！」
我都懶得聽嗰兩條毒撚喺度㞗噏，即刻就計下今餐要點夾先；十三條友，當三個單身男至少出返自己嗰份，即係我同一鳴，阿文每人夾三又三份一份，當每位千五先，即係我哋要夾五千…最好就可以屈到佢哋嘔多一千出嚟，雖然Tamama好慘…
豪：「同是天涯淪落人，相逢何必曾相識…」
強：「在這傷心者通道上同行…」
妖，唔識唱就唔好唱啦，調亂啲歌詞喇，明明呢首嘢就最應該畀一鳴同Wing唱，我當然唔敢講出嚟，費事佢哋又叫返我同曉彤唱…
豪：「我哋重有Tamama呢位同伴！」
強：「係！快啲嚟救我哋呀，二等兵！我哋就嚟俾敵軍嘅閃光彈炸死喇，需要緊急增援！」
我：「你哋係咪同佢溝通好㗎，點會搞咁耐？」
T：「欸…你哋…等緊我？」佢終於飄到嚟。
豪：「Tamama，我嘅同伴！好朋友！快啲嚟救我哋呀！我哋就盲喇…」
T：「吖…點解嘅？」佢仍然呆喺門口度。
強：「對面三條仔係咁曬命呀！呢對狗男女重要喺我哋面前打茄輪！實在慘無人道！」
T：「乜咁刺激呀…你哋咁快就玩得咁開心。」
豪：「係呀，你呢幾年書真係白讀喇，你唔會明白啱啱呢十五分鐘到底miss咗幾多嘢！」
T：「咁真係可惜，我都係遲咗少少啫…」
其實我諗Tamama根本唔會care啱啱嘅鬧劇，只不過係應酬肥豪傻強先會咁講。
豪：「一鳴，曉彤，到你兩個打茄輪喇，當彌補返Tamama遲到嘅遺憾啦！」
鳴：「唔係幾好嘅…我哋打茄輪事小，不過，今日就唔搶啲主人家嘅風頭喇。」
豪：「Tamama你重企喺門口做乜？唔入嚟？」
T：「欸…呢個…咁樣嘅…即係…」Tamama一路講一路喺度㧻手指，見佢咁樣都知有少少唔妥。
我：「Tamama無嘢吖嘛？唔係有啲乜嘢事呀，如果要幫手即刻出聲呀，呢度大把人會幫你！」
T：「唔係…無事，唔好意思…俾我準備一下先。」
彤：「呀！係咪你又想表白喇？！」
曉彤咁樣一嗌出來，我又醒返起三年前臨放暑假想同女仔表白嘅Tamama，就係而家咁嘅樣。
強：「唔係呀？！你要同邊個表白！？」
如果係喺現場，一係小魔女…最大鑊係佢唔知阿文同旖旎嘅關係，千祈千祈唔好…另外佢唔會當阿Wing係目標呀？雖然我知Wing一直都幾照顧佢，又不停鼓勵佢要勇敢向異性表達自己心意；但今日唔係精彩到咁呀？我就嚟刺激到爆血管喇，明明我應該要攤喺床死睡…
呢個時候三隻小魔女喺度妳眼望佢眼，而我同Wing對望咗一下，佢都好似有啲擔心，不過無論發生乜事Wing都會care返Tamama嘅。
T：「唔係呀…我唔使表白呀…」
豪：「咁你喺度做乜，食錯嘢濕熱呀？」
雖然我知肥豪隨口噏，但又真係形容得幾貼切，呢個企定定但又坐立不安咁嘅樣呢，一邊閉翳一邊係度跺腳，十足十濕熱朘朘痛想係咁飲水同去廁所坐定定喺馬桶解決問題嘅煩惱樣。
然後Tamama深呼吸咗一口大氣，伸咗隻手出門口右手邊睇唔到嘅位置，再拉啲嘢過嚟…
T：「同大家介紹…佢係劍冰。」
人x12：「？！」
乜事？！我當然知佢係劍冰啦，打咗成粒幾鐘波，但問題係…點解Tamama會帶咗佢嚟？唔通佢哋兩個係一早已經識嘅！唔好同我講Tamama佢…
豪：「喂！點解你會同個敵人一齊㗎？叛徒！」
T：「欸…呀…阿冰…係我新識嘅…朋友。」
強：「乜事！快啲講清楚！點解你會同佢做咗朋友，好快啲畀個合理嘅解釋嚟。」
唔係呀化…新識嘅朋友？即係Tamama頭先喺現場即場溝返嚟，唔係咁大鑊呀？！點做到㗎？頭先我淨係見到佢攞咗枝寶礦力畀阿冰，講咗幾句嘢咋喎，到底之後發生咗乜事？
T：「呢層…我都唔係好知…只不過係…」
Tamama重喺度作緊文嘅時候，劍冰喺佢隔籬拍拍佢膊頭叫佢唔好講落去，然後行前咗兩步，貼住Tamama張吉位，再冷冰冰咁望住我。
冰：「我忍咗好耐喇…終於可以有機會，呼…X志華我憎死你呀！邊有人咁樣同女仔打波㗎？！」
嘩屌…呢個女人係嚟報仇雪恨…踩場踢竇㗎？！
我：「對…對唔住呀…我只係無計可施…迫不得已…出此下策…求女子大人有大量…」
對住女仔，我都真係束手無策，確實我頭先又係打得過份咗啲嘅，自己都覺得樣衰。
T：「志華，我睇錯咗你呀！重以為你打咗咁多年波會好有體育精神，原來你份人係咁無品！」
識咗咁多年…我第一次…俾隻二等兵鬧。
文：「又係嘅，啄住個女仔嚟打又確實係肉酸少少，畀著係我都會覺得唔好意思…」
阿文哥，你重要踩多一腳落嚟…
強：「點會喎，打緊比賽㗎，成王敗寇，有得贏點解唔贏，不擇手段都要㗎啦，打到對手驚，打到佢崩潰為止，都係一種技術嚟！」
傻強…係咪唔火上加油你就會食唔落飯？
冰：「打混雙用埋啲咁卑劣嘅手法你知唔知醜呀？」阿冰唔係講笑，針鋒相對下每句都利劍嚟…
敏：「呵呵，有人輸咗賴地硬呀？」
詩敏企咗起身還擊，呢兩個女人唔係諗住喺度鑽木取火呀？我無眼睇喇…
冰：「有個咁打波嘅男朋友妳重笑得出嘅，佢今日對我無品，唔知幾時輪到妳㗎咋。」
嘩…女仔講嘢狠起上嚟呢，實在係句句到肉，同男仔嗰種靠大聲無腦廢噏嘈架差好遠；唔知…曉彤同詩敏攤牌嗰時係咪咁嘅呢？
敏：「唔好意思，我就係今日場波嘅戰術指揮，所有嘢都係我嘅策劃唔關條仔事；無人叫妳同個男partner打到妳有妳打，佢有佢打，呢個係你哋嘅致命弱點，唔打你哋弱點唔通要打讓賽特登輸畀你哋？唔服氣可以遲啲再打過，我保證你哋會輸得更加慘烈；無辦法啦，鬼叫重壑唔係你條仔咩。」
無眼睇，妳兩個慢慢練玉女劍法，我想瓹落去枱底避一避先，一陣上菜先叫返我出嚟啦。
冰：「妖女！」睇佢鬧人手法…似係讀文科。
豪：「弊家nel！」肥豪雙手拍枱，大叫一聲，劖亂咗兩條女嘅唇槍舌劍，兩隻眼撐到鬼死咁大，嚇到全場人呆晒，然後一枝箭飆咗出去…好彩唔係血脂過高中風啫。
我：「佢又搞乜鬼呀？」
強：「我諗，係去改菜單掛。」
彤：「都黐鬼線㗎，爭啲畀佢嚇死。」
鳴：「我重以為佢會為咗食花生乜都唔記得嘅添，原來係咁上心嘅。」
詠：「人哋一直都好認真做班會主席㗎，下年到你喇，學下人哋啦。」吓…點解Wing姐咁都會知嘅…
一人一句講完，大家又望返住兩條女。
敏：「係呀！我就係妖女！吹呀！喱！」詩敏重要伸埋條脷出嚟扮鬼面，佢係咪要激死阿冰先安樂。
冰：「我同重壑…其實平時打開單打㗎咋。」
敏：「咁咪打單打囉，做乜要夾硬打混雙？」
冰：「單打競爭太大，唔會有機會㗎喇。」
敏：「無打到上床嘅覺悟，就最好唔好打混雙嘞。」詩敏一路講一路望住阿文同旖旎，夠晒含沙射影，又搞到旖旎塊面紅一紅。
冰：「Tamama！妖女蝦我呀！」阿冰扯住二等兵衫袖投訴詩敏。
T：「劍冰乖…佢哋係衰人嚟，不過我都唔識得點幫妳…」睇住Tamama氹女仔，呢種突兀感呢…
呢個時候肥豪行開咗，傻強左右兩個位都吉咗，佢望一望曉彤，又望一望小魔女，然後就順時針褪一個位坐咗喺小魔女隔籬，再示意Tamama同劍冰坐低，於是Tamama坐喺傻強隔籬，劍冰就喺曉彤側邊。
冰：「打混雙打到上床，妳肯定喺聽冠軍嗰兩隻嘢講㗎啦…」吓…原來劍冰都知。
敏：「係佢哋講無錯，不過我都基本同意嘅，就好似雙人花式溜冰，拉丁舞呢啲咁…日對夜對又成日身貼身，無嘢都變有嘢啦，就算原本有另一半都好容易因為睇唔過眼而散。」
冰：「嗯…佢兩個出晒名㗎喇，喺D1圈同埋港青嗰邊係人都知，睇你兩個應該係圈外人先覺得新奇，佢哋唔介意我都唔怕講，條仔小學打波已經好標青，一早就俾人mark起咗，讀書麻麻哋嘅佢就係靠體育項目分數入咗體藝，男單男雙佢都有打，成績重非常突出，咁大家都明，運動叻，生得又高大，個樣都睇得下，大大下自然就有女食，D1圈好多女仔都同佢有過嘢…」
強：「妳咁講唔通妳都…」
傻強堅傻唔係呃人㗎，諗到乜都會講出嚟，好彩唔關我呢邊事啫，不過阿冰身旁嘅Tamama就有啲尷尬兼面燶，如果第一日就聽到自己嘅target原來過去係咁…睇怕都兇多吉少。
冰：「咪玩啦，條傻仔唔係我style…同埋，你估黐埋去就有得食呀？大把女喺度輪緊呀，即係呢，要好似妖女呢啲，高高哋有對長腿，樣貌娟好，身材有返啲睇頭，打波鍾意走光露底褲…嘅女仔，先有機會，幾時輪到我吖。」
彤：「唔怪之得頭先對面咁多男仔喺前排睇到聚精會神，眼都突埋出嚟咁啦。」
詠：「頂！睇唔到女神走光添，蝕晒！」
鳴：「咳咳…好在我已經睇過，唔緊要。」
彤，詠：「唔出聲無人話你啞㗎！」
春風得意嘅男人，睇嚟都有自掘墳墓嘅傾向…
強：「點解…貴圈…可以亂到咁，明明…我都係打波…都係揸住塊板…係粒波有啲唔同啫。」
冰：「你打乒乓波？」