【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 衣冠不整，恕不招待
200k點擊釋出
執埋啲球拍，我同詩敏返到去看台搵返阿文同Tiffany兩個；Tiffany就鼓起泡腮一面彆扭好唔滿意咁樣…唉，我都無辦法㗎，條仔如果唔昅詩敏底底專心啲打妳應該就唔使請人食飯，呢個時候都係唔好理佢好啲，而且我都好攰。
文：「估唔到…你真係打得好好，同以前唔同晒，可以同呢個水平嘅對手認真較量。」
當然佢個樣都好滿意我啱啱嘅表現，無論點我都係幫佢慳返一筆嘅功臣嚟。
我：「算係咁啦，我無乜信心可以追到佢哋。」
文：「傻嘅，人哋差唔多係全職運動員嚟，你都係留返啲精力讀書好過啦，repeat探花。」
我：「妖，使唔使咁都要串我呀…撞手神咋。」
文：「我諗住話你食咗校花所以叫你探花咋。」
我：「…」
文：「唔玩喇，睇波啦。」
佢用手指一指重喺場入面比賽緊嘅另一pair甲組混雙，亦即係佢哋輸咗嗰一隊將會喺後日同我哋打季軍戰；呢個時候詩敏佢已經坐低咗專心睇比賽，所以我都坐返低，個排位係左至右旖旎，文，我，詩敏。
場入面嘅比賽先係進行到第二盤嘅deuce，第一盤係21比19，可以話戰況拉得非常之接近，雙方實力旗鼓相當競爭激烈。
不過兩邊嘅打法就大相逕庭，好明顯一邊係打標準嘅全能進攻型，大致上都係前後斜線咁企位，一有機會就加快節奏進攻，但就當然無得同我哋頭先pair對手比啦；而另一邊就係左右企，打均衡控球型，真係有啲以慢打快以守代攻嘅感覺，佢哋打得好穩，喺對面啲殺波唔係咁大殺傷力嘅情況下好多球都可以俾佢哋救返，一時高遠球挑去對面後場，對手喺身高同體力限制之下都好難再次發動攻擊，一時就靠反應欄網吊返個短波過去，就係咁樣打亂晒對面嘅進攻節奏；加上睇得出佢哋靭力喺非常之強，不停咁用四方球同控球平切嚟拖慢個節奏…但佢哋就面無表情咁，唔會令人覺得佢哋好想爭勝或者會策劃啲乜嘢攻勢，就只不過喺場入面同你永無休止咁打落去。
最後第二局係俾兩隻牛皮糖磨贏咗，要打到落去第三局，睇到都已經覺得攰，好似重攰過同港青種子選手打。
敏：「你後日想對邊pair呀？」
我：「我都唔知…兩邊都好有實力，我唔敢話對邊邊我哋會比較有希望，但我寧願對返啲標準進攻型嘅對手，比較乾脆利落，贏就贏，輸就輸，如果要磨到輸感覺唔係幾好…」
敏：「可惜唔到我哋揀呢，其實旖旎打法都係差唔多，靠不停拉吊嚟等運到，好少主動進攻。」
我：「旖旎技術無咁穩定，只要有機會殺佢要攞分唔難。」
敏：「你男仔同佢打梗係咁講啦，身高體能都唔同基準，我而家已經無乜信心可以壓倒性咁殺贏佢，有時都會猶䂊不如慳返啲力算。」
我：「無所謂啦，又唔係同佢比賽。」
敏：「志華…我有樣嘢想同你講…」佢欲言又止咁。
我：「嗯，係乜嘢事呀？」
敏：「頭先…我動作好似大得滯，拉親右邊背肌…」
我：「好嚴重？無事吖嘛…如果好痛就唔好勉強自己出賽喇…」
敏：「唔得，嚟到呢步我唔可以放棄…只要重郁到我都會上場，只不過…可能殺唔到波。」
詩敏算係一個倔強嘅女仔，我諗我唔會勸到佢退賽，但去到最後一日先嚟傷出確實可惜。
我：「咁呢兩日妳要休息多啲，後日上到場先再諗辦法應對囉…詩敏…贏輸對我嚟講好閒㗎咋，有得同妳打波，可以同妳一齊，我呢世…別無所求。」
敏：「傻瓜，開波喇，睇波啦。」
到第三盤開始，戰事繼續膠著，一邊繼續把握每個機會進攻，務求係最短時間解決對手獲得出線機會；另一邊廂畀人嘅感覺就係漫無目的咁打，既唔係開心，亦都唔係辛苦，只係好任務性質咁將個波按照既定路軌咁回返過去；但唔好講笑，佢哋拉嘅高遠球又真係啱啱到底線無出界，對面呢條仔無信心亦都無體力射穿佢哋嘅防線，結果又變返做平飛球，每一分都磨足十幾板，論控球嘅話重要係牛皮糖組合技高一籌，知道對面條仔反手唔得就係咁射佢反手位，佢喺側邊就打中線，佢喺後場就轉吊近網，搞到佢要走來走去無乜機會殺波。
嗯…咁樣打波法直頭似打精神耐力多過似打技術，除非你有壓倒性嘅反應速度同體力，如果唔係磨下磨下你都會好快唔知自己做緊乜而失去方針，心浮氣躁更加會自亂震腳，佢哋就可以靠穩定性得勝。
唔經唔覺已經打咗超過一個鐘，論個波嘅觀賞性其實唔太高，都係不停飛來飛去，連續挑四五球高遠球呢啲畫面不時出現，已經想腦補fast forward叫個波飛啲跌返落嚟；但睇佢哋嘅神態，表現出嚟嘅毅力又好精彩，尤其係對無乜表情嘅partner，好似同你講佢只係當你一部發球機器而佢哋喺度練緊波而已。
最後比數係廿一比十八，由傳統進攻組合獲勝，關鍵點係佢哋位女仔有身高優勢，網前表現亦都較佳，有好幾球網前欄截同點殺做得非常之靚，同時亦展現出可以同對方相比較嘅韌性，結果就係靠呢幾分之差分出勝負。
即係話我哋季軍賽嘅對手就係牛皮糖。
敏：「哈，下場你準備打足粒幾鐘喇。」
我：「都係咁打啫，其實無論邊邊做對手都係咁惡打，上到嚟嘅技術水平已經係非常之高，已經無乜話抽唔抽到好籤呢枝歌仔唱。」
敏：「其實我哋十六強同八強可以避開嗰對怪獸已經係超級好彩…打到嚟呢到，盡力而為啦。」
呢個時候我先為意到隔籬個文哥不停咁喺度㩒電話同打電話，好似好鬼忙咁。
我：「阿文…你喺度做乜？咁鬼忙嘅？」
文：「志華…嗚嗚…點算呀，龍景軒，文華廳同港灣壹號都無晒位喇。」
我：「吓？！你哋嚟真㗎？使唔使咁兇狠呀？」
文：「你不朽都知我好認真打羽毛球㗎。」
阿哥，你而家係好認真賭羽毛球咋喎…
我：「呢啲中菜廳好難即日book架，香港有錢嘅人比你想像中多好多，不如你問下幾時有位遲啲先去啦，使唔使咁心急呀。」
雖然我唔係好好呢味嘢，但有時睇到爸媽要臨急臨忙為咗啲商務飯局撲位同謦菜單都覺得辛苦。
文：「點得呀，一陣攤凍咗啲妹妹仔走數點算，到時容乜易拖到返學請我食大家樂就算數喎。」
呢個時候Tiffany妹妹喺佢隔籬撓住對手嬲爆爆粒聲唔出咁…嗱，唔好怪我呀，我就堅認真打波。
我：「嗱，講明先呀，呢啲地方我唔去㗎，無人請我食我唔會嘥錢。」當然係為咗詩敏。
文：「無人叫你去囉，但重有無乜好嘅『五星級酒店』餐廳介紹？」
我：「真係麻鬼煩…walk in食buffet得唔得呀？炮台山開咗間海逸君綽，都算係五星級。」
文：「聽個名好似麻麻咋喎，同埋buffet啲嘢通常好普通…」
我：「你頭先有無打去文華扒房，呢間可能有機會有位。」
文：「呢間…我哋咁嘅身世去會唔會唔係幾好？」
T恤，及膝短褲，波鞋…真係…
我：「會㗎，但文華廳你都敢問啦，有乜分別？」
文：「中菜文化包容性比較強吖嘛。」
我：「咁你應該包容下啲小妹妹，對佢寬容啲…」
文：「港島有無啲好嘅普通扒房？」
我：「金鐘Ruth’s Chris囉…」
文：「等我又打去問下先。」
呢個時候場上面上演緊女丙嘅妹妹仔雙打，可觀性唔大，但就令我諗返起初初同詩敏一齊入校隊打嘅光景，重有Tiffany妹妹中一二嗰陣…嗯，真係好青春，雖然我哋而家都重好青春。
文：「有位喎，你哋一唔一齊呀？呢間應該無咁貴。」
我：「呢層呢…就…女皇妳諗住點呀？」
敏：「是但啦。」詩敏佢無乜心機，用隻左手捉實自己右邊膊頭，睇嚟好擔心身體情況。
但，飯總係要食嘅。
我：「咁一齊囉。」然之後交畀文繼續訂位。