【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 混雙上床是國際常識
作者榜十二釋出
然之後我哋就去報到，再去看台睇住其他組別比賽先，今日呢個場全日都係會打雙打嘅準決賽，合共有八個組別，首先比賽嘅係乙組混雙，然後就到我哋嘅甲組混雙；順帶一提主辦單位可能為咗避免有協助及教唆衰十三嘅嫌疑，呢個比賽係無丙組混雙嘅…但對於促成乙組混雙發生衰十一呢個可能性，我哋係絕對唔可以排除。
如果無羽毛球，我同詩敏就唔會行到嚟呢一步；由中一開始第一眼見到佢到而家，都可以話係為咗佢先打波，我從來就無諗過要喺運動上面攞到啲乜成就，但每次可以喺學校練波，出去打下友誼賽可以望到佢幾眼，謦到幾句就已經好開心，可能我真係唔係咁鍾意羽毛球㗎咋；但係一路走來直到今日，我好想可以喺比賽上面同佢一齊攞多幾分，享受埋剩返落嚟唔知重有幾多次一齊打波嘅機會。
我緊緊咁捉住咗詩敏隻手，緊張嘅心情令到我坐喺度都已經掌心冒汗。
文：「嘩，兩位一大朝早就咁黐纏呀？」
好一個無乜存在感嘅人，最鍾意就係突然係人哋背脊後面冒個頭出嚟。
可能由於我哋之前都好避忌從來唔會喺佢哋面前拖手，下意識地詩敏就即刻鬆開咗我隻手。
我：「欸…唔好意思囉。」
文：「怕乜嘢吖，見到你兩個終於喺埋…嗯…恭喜晒喎。」俾佢咁講都唔知點應佢好…
旎：「唓，醒定啲呀，唔好輸得太樣衰！」
我：「使乜你講喎，乜…我哋一定輸嘅咩？」
旎：「哈，心照啦，如果呢場你有得贏睇怕聽日可以上報紙㗎喇。」
打到嚟準決賽，個場都真係有啲類似體育記者咁嘅物體喺度行嚟行去，如果港青頭號輸咗可能都幾值得攞嚟做新聞…應該話無論輸贏個新聞價值都係喺佢哋度。
旎：「唔怕同你講，如果你哋夾埋攞到廿一分以上嘅話，我就要請呢隻嘢食飯。」佢指一指阿文。
文：「拜託打得好少少，我想食妹妹仔軟飯。」
旎：「你算吧啦，我諗緊book文華東方定係Grand Hyatt好。」
我：「喂，你哋當我哋場波係乜？！」
敏：「阿文，book定four seasons啦！幫我食窮呢個靚妹！」詩敏…唔好火上加油啦。
旎：「呵，唔該晒幫我book埋喎，four seasons我都OK㗎！」
我：「玩到咁大好似唔係幾好呀…」
然後我又諗起詩敏餐銀河整到一鳴肉痛嗰個樣，以上呢三間如果食buffet都還好嘅，如果係中菜餐或者扒房嘅話都係不敢想像。
敏：「喂！攞唔到廿一分嘅話你幫阿文畀呀下！」
我：「點…點解受害的總是我？」
文：「我對於呢個安排無異議。」
旎：「呵，我有得食就得，邊個埋單無所謂。」
我：「咁…攞到廿一分嘅話我係咪有份食？」
敏：「食你個頭呀！星期六之前你唔使指擬可以有得亂咁食嘢。」
文：「放心啦，我食之前會影相畀你兩個睇，等你哋知道旖旎佢有幾肉痛㗎喇。」
俾佢哋兩個咁樣搞一搞，原本緊張嘅心情突然變得輕鬆晒；唔知，星期六打埋比賽之後可唔可以同詩敏食返餐好嘅呢？不過佢又唔俾我亂咁嘥錢，唉…我唔想辛苦完都要食大家樂呀。
然後好快就到我哋落場比賽。
「早晨，你哋好呀，好耐無見，詩敏多多指教。」
又係嗰條神神化化嘅仔，重要記得詩敏個名究竟係乜嘢一回事？！
敏：「嗯，多謝你上次對我哋嘅關照。」
「太好喇，可以同你哋再打多場，今次終於可以盡情打喇。」
敏：「哈…我哋已經準備好喇，唔會俾你哋贏得咁輕鬆。」唉…雖然咁講同認輸無乜分別。
「係就好，我幾擔心你哋會為咗留力季軍賽而唔想同我哋比賽…」我…頂你…個肺，呢條友個表情雖然平平無奇，但啲對話內容每次都係咁哽耳嘅，就連佢個女隊友聽到都反一反白眼無奈咁望住我，可能連條女都怕咗佢。
我：「放心！我哋一定會使盡渾身解數嚟應戰！」
當然旖旎個胃都係一大問題，本來請佢食嘢就無乜所謂，但又唔係我同佢食…
「重講！天黑喇，準備開波啦！」
第一球，由對面條仔開畀我，上次同佢打過都知佢啲手法大概係點，就同出面專業啲公開賽一樣，頭嗰兩三下都係高反應嘅快速網前球，每一下質量都係好高，射距短，角度刁，落點準，唔會發生啲差唔多落到地先嚟挑返個波過嚟俾機會你嘅場面。
當然係指佢哋，唔係指我哋，要盡力咁飾演一面牆將個波彈返過去已經令我哋非常之吃力，喺佢哋嘅節奏下我哋嘅步幅同埋預判都要比起對其他對手更吃緊，喺呢個環境之下只有人追波打，唔會有波等人嘅情況，不停調整企位同姿勢已經搞到我哋疲於奔命。
打咗四五板之後對面仔仔用一個大斜角劈削落我邊線度，個波高速咁劃過我心口，我知道已經miss咗一個上手回波嘅機會，唯有一個跳步彈去右後方將隻右手伸到最長，僅僅可以用下手挑返起個波，好彩都夠時間畀我隻手劃晒成個弧度將力量注入返落個波度，變成一個高遠球飛返過去。
角度就無乜㗎喇，中線附近啦，好彩都貼近底線，應該可以為我哋爭取返少少時間，照上次經驗應該對面條女會回返個高速平球過嚟…
乜話？！當個波重喺半空嘅時候對面仔仔已經跑到返中線…無錯，畀時間自己同一時間就係畀對面對手，但應該都唔使咁快呀？睇怕係由我決定要用下手挑波嘅時候佢兩個已經移好位，如果我唔夠力條女就會欄網點殺…
當然而家係我夠力，所以條仔已經喺底線附近跳到高一高咁殺咗落嚟，以超高速直飛我同詩敏中間嘅底線，當我哋兩個判斷到球路而伸塊板出嚟嘅時候，個波已經應聲倒地，剩返兩塊前後凍結喺空氣中嘅球拍。
要知道，雙打嘅底線係向前褪咗72cm，呢個變化令到高手可以肆無忌憚咁企喺底線對一個高遠球啱啱好做一個漂亮嘅跳殺，身為港青代表當然有技術，佢身高同體力都非常足夠，問題係佢啱啱先喺右邊T位做完一個大幅度劈削，究竟要有幾兇狠先會即刻預判而跑去底線跳殺。
出面就係咁兇狠，如果你睇林丹打波，佢可以走勻每一個位不停殺，正手殺，側手殺，背反手殺，總之你一畀機會佢就會不停殺到你手忙腳亂直到你崩潰為止；每次睇佢同李宗偉打，明明你會覺得技術不分上下，甚至李宗偉係比較穩定，但就係超級丹嗰種致人於死地嘅狠，加埋個由頭燒到落尾嘅眼神，李宗偉每次都唔可以喺掟拍嘅林丹身上搵到著數。
唔好咁啦…我同詩敏兩個嚟志在參與㗎咋。
即係話，嗰啲乜嘢以慢打快，以守代攻，穩住陣腳嘅打法全都無用；對面嘅節奏就係咁快咁狠，啲分你唔攞就佢哋攞晒，唯一可以攞分嘅方法就係迫返住佢哋，等到一有機會就大力還擊，呢點我同詩敏都好清楚。
漸漸地，我同詩敏已經唔記得咗呢場球賽嘅輸贏，盡可能去迫近返對面嘅節奏；我主要喺後場拉開兩邊嚟平推，務求唔會回到啲就手波畀對面條仔，詩敏就喺前場封網同救啲近吊，有時可以抖兩板睇佢哋兩條女喺前面搓波都好過癮，只要一下回得樣衰，我哋就已經喺中場等緊殺返過去。
我諗，佢哋嘅水準就係啱啱可以同我哋打而我哋重可以搵到比賽樂趣嘅高度；確實人哋係付出咗無數嘅心力喺運動上面，相對上我哋只係叫努力咗一排，贏我哋實屬正常不過。
唔理喇，好好享受比賽啦，我諗呢啲咁高水平嘅賽事我哋呢一生都唔會再有機會參與到。
最後，我贏咗…旖旎。
第一局輸12比21，第二局輸14比21，總分26分贏咗Tiffany個衰妹…我諗，我同詩敏已經叫做打得好好睇睇；真係好攰，打到全身都濕晒，從來都未試過只係打咗兩盤四十分鐘到就好似成個人散晒咁，真係黐鬼線；確實我哋係唔需要咁樣搏晒老命嚟打，但每次可以喺對面手上攞到一分之後都會好感動，興奮嘅心情實在係難以言喻，使到我哋可以無後顧之憂咁向前衝。
都唔係，為咗銀包係應該搏盡嘅，破財事小，問題係破完財詩敏就會進一步限制我支出，呢個先係重點…今次好好彩，旖旎妳今次重唔大鑊？冷靜啲，打完比賽都要再同對面握手。
「呼…你哋今日打得好好呀，真係贏得一啲都唔輕鬆。」我諗同佢打多兩三次就會慣晒佢嗰種說話方式，但我哋唔會有呢個機會。
敏：「多謝呀…可以同你哋比賽…實在係我哋嘅榮幸。」啱啱打完波都重氣喘緊。
「詩敏，我會懷念妳嘅水藍色底底㗎…」
聽到佢咁講，我同詩敏即刻O晒嘴唔知點回佢好，重艱難過要回佢啲跳殺。
「頂你個肺！就知你個PK仔喺度昅嘢！吓！如果唔係第二局點會失驚無神連失幾分？！」對面條女叉住腰喺度抱怨，睇嚟激烈賽事中我哋為意唔到嘅小動作都瞞唔到呢條女，明明佢喺前場就無後眼嘅…
「呀…詩敏真係太靚女吖嘛，忍唔住，我第一次見打波叻嘅女仔可以咁靚女咋。」
「你咁講係乜嘢意思呀！當我係乜？」只見姐姐佢怒火中燒，睇嚟呢條仔激嬲佢都係家常便飯。
「女partner囉。」
敏：「多謝…我重以為我嘅策略無效…」
「好有效呀，佢有三球落網可以話係咎由自取。」
「都贏咗啦，咁執著做乜啫…」
「哼！知你色心起喇，打完波同你去開房嘞。」
我：「原來…你哋兩個…」
「打混雙好難唔打到上床㗎喎…」佢講呢一句嘅時候我先第一次見到佢嗰種女性嘅神情。
「唓，好似好委屈咁。」
「我同你講呀，到我哋退役我就唔會要你㗎喇，就睇下你到時點溝女。」
「乜我哋嘅關係係咁㗎咋？」
「你唔好以為我好想成日由朝到晚對住你呀！」
講講下佢哋就一路鬥嘴一路行去執嘢走人…準備去開房，應該係，除非唔係。
我：「詩敏，我哋喺咪打埋後日就要退役…」
敏：「你又諗咗去邊呀？」
我：「無呀，聽到個女仔咁講我有啲擔心啫。」
的確，無咗羽毛球，唔再喺同一間學校，我對將來嘅呢種朦朧不清嘅畫面係有少少不安。
敏：「我哋同佢哋都唔同！」
我：「係有啲乜唔同呢？」
敏：「佢哋係為咗打波先打到上床，我係為咗同你上床先叫你打波。」
我：「吓？！乜原來係咁㗎？」
然後詩敏佢唔鬼理我。