【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 無限復活成就人生
QQ950k釋出
我：「唉，好想快啲落場呀…咁樣等原來好煎熬。」
敏：「急乜鬼喎，畀多一粒鐘你抖唔好咩？」
我：「我哋多一粒，對面嗰隊都多一粒嘅啫。」
敏：「點同，我哋今朝無盡全力，抖一抖就回復返，但如果對面今朝出盡全力打，分分鐘已經周身痠痛，抖多一粒鐘都唔會有乜嘢作用。」
詩敏果然係理科才女，一切已經俾佢機關算盡算通算透，呢個女人真係好恐怖，而我睇怕要對住佢成世，睇嚟我已經成為咗甕中之鱉…
到咗三點鐘我哋落場，咦，好似真係打緊練習賽咁，重輕鬆過平時同文哥旖旎打；明顯地個男仔都有打開波嘅，但個女仔水平就完全跟唔上，就算普通高遠球都可以撻Q撞框邊失分。係囉，咁先正路㗎嘛，呢啲公開賽頭圈係應該就係咁水平參差，撞到頭號種子選手純粹我哋太好彩。
結果我哋直落兩盤輕取一局，都無太大消耗；望落對面嗰pair都無乜唔開心，好似一早就預咗無機會晉級，可能只係為咗嚟參加比賽賺下課外活動title咁。
敏：「喂，睇下隔籬嗰場！」
我：「係喎…贏咗嗰隊將會係我哋嘅對手嚟！」
敏：「呢兩隊都有返啲實力，不過…兩邊都打得好細路仔，好似你以前初中打嗰啲波咁。」
我：「做乜又要無端端賴埋落我度喎…」
何謂細路仔？就係唔用策略配合技術嚟打波，一味個心好想贏通場跑等個波去到舒服位大大力打返個波去對面，兩邊回嘅波好多都係平高球嚟，但可能由於身高同體力問題出現跳殺嘅機會唔多；反而，有啲可以封網點殺嘅機會大家都無爭取，有啲明明out底線嘅就繼續拍蚊咁ban返過去，簡單嚟講係喺度互相消耗體力。不過又幾好睇，個波飛快咁球來球往，兩邊球員硬淨得嚟都帶住堅毅不屈嘅表情，清脆嘅啪啪聲此起彼落。
敏：「我哋抖多一盤嘅時間，今次一定有著數。」
我：「嘻嘻，係咪諗住又輕鬆直落兩盤晉級？」
只要贏埋呢場，我哋就可以繼續打落去，唔使第一日就foul！
敏：「你諗清楚先喎，望下佢哋，都知道係打開體能波，將羽毛球當係划艇咁玩，同佢硬碰係咪真係有信心贏梗先？」
我：「無話梗嘅，落到場鬥完咪知囉。」
敏：「我覺得佢哋心態比較輕浮，有無信心留前鬥後？」
呢個時候個場已經少咗好多人，計埋我哋都係得返七隊喺度，詩敏佢挨喺我身邊又拖住我隻手，咁樣放閃係有少少放肆，希望唔會因為呢個舉動而激起對手消滅我哋嘅決心啦。
我：「佢哋睇落都好有韌性，如果我哋放軟手腳節奏就會俾佢哋帶住嚟打，除非佢哋出現好多失誤嘅啫，如果唔係我哋就會迫喺下風度。」
敏：「第一盤同佢哋玩，第二三盤我哋玩，好唔好？」詩敏用個機心叵測嘅笑容望住我。
我：「吓…又讓盤…如果我哋輸咗第一盤，之後就無空間可以輸㗎喇喎？」
敏：「如果你無信心喺第二三盤贏到佢，咁點解你又覺得第一盤出盡全力會贏？」
我：「無㗎，所以咪話落到場打先知囉。」
敏：「第一盤就好似初初同阿文練波咁打啦。」
我：「開啲中高球等佢殺？咁樣好自虐喎…」
敏：「你無信心救到咩？今朝你都救咗成朝波啦。」倒不如話陪港隊練控球…
我：「今朝啲波嚟得唔算快吖嘛。」
敏：「阿文話係我虐待佢咋喎。」
我：「殺到攰咪抖下囉，殺波又唔係包贏嘅。」
敏：「係呀，所以文哥唔陪我癲，但你睇下場上呢兩隊係點。」
打到第三盤15平，兩隊出線機會都係均等，大家都唔肯放過任何一分誓要將對方置諸死地，只要有機會就出現各種重殺同劈殺，我都戥佢哋兩個女partner慘，因為要跟住兩條仔嘅節奏嚟打…
而我，就應該係跟住女神節奏嗰個。
好快賽場上就已經分出勝負，睇得出佢哋大汗疊細汗，體能上應該再維持唔到好耐；希望詩敏可以賭得中啦，我嘅角度就會想趁佢病快啲攞佢命，打落後波第二三局其實心理壓力好大；我對比賽結果其實睇得好開，因為對我嚟講最重要嘅奬品已經坐咗喺身邊，落到場只想開開心心打波流汗，唔想咁多計算。
跟住就睇另外贏咗第一輪嗰四隊對決，都幾激烈下，但就唔關我哋事嘞，希望唔使靠得失球出線啦，咁樣出線上到去都係做魚腩送死。
我：「敏，妳真係一個好有耐性嘅女仔。」
敏：「你都好有耐性㗎，無嘢辛苦得過等你抽計數機。」
我：「都話一開始唔好set咁難，起碼都要加埋順蛇逆蛇，或者全單全雙都好吖。」
敏：「你唔係諗住讀MS嘅咩，全單全雙機會率係幾多呀，少爺仔？」
我：「全單即係二份一嘅三次方，即係八份一，全雙都係一樣，加埋就係四份一…」
敏：「咪係！即係一個禮拜要同你拍一次拖，咁唔使一個月就俾你溶咗啦。」
我：「你唔係好鍾意我嘅咩？」
敏：「咁不如我第一日就撩你去開房啦，好唔好？」詩敏又擺出佢嘅淫樣嚟望住我。
我：「好就好…但…我應該會拒絕…」
敏：「點解呀？」
我：「因為…我覺得做完之後一定就會俾你丟棄。」
敏：「唔想俾我丟棄一陣就畀心機打波啦。」
好快就到咗我哋兩隊落場，時間已經嚟到五點幾，由今朝九點撐到而家，相信好多人都已經身心俱疲，但只要有詩敏喺我身邊，我就有用之不竭嘅精神同體力。
第一球由我開畀對面條仔，雙打由於底線靠前同節奏更快，好多時會開短波嚟避免對面開局就猛攻，但喺詩敏嘅策略下我開出一個唔湯唔水嘅高遠球…嚟啦！比卡超！
一如詩敏所料對面隻精靈見有機會就底線跳高拗埋腰咁扣殺，真係望到都戥佢辛苦，而又由於詩敏一早就估到佢會咁做，睇清球線之後佢輕描淡寫就喺個波著地之前兜返過對面，條女就大大力回咗個平高球過嚟。
哦…我細細力舉高隻手靠個波嘅彈力飛返過去中間就算，條仔好似執到寶咁衝上網前扣殺，點知佢…可能慢咗0.02秒左右，角度差少少啱啱殺咗落網，我差唔多喺個心入面笑咗出嚟。
睇嚟對面真係好心急要贏。
贏完一球我同詩敏換位，我開球畀對面個女仔接，估計佢九成會回返一個高速嘅平高球去詩敏嗰邊，而詩敏亦都企返喺一個後少少嘅位準備陪佢哋狂轟濫炸。
當你唔係諗住要贏，每一下回返個攻勢過去嘅時候係會有一種心中暗喜嘅感覺，就係，咦，原來呢球我都接得住㗎喎；我又諗返起同Tiffany兩個人練嘅時候，由於體型關係佢係無可能壓住我嚟打嘅，所以我會用七八成力嚟不停進攻佢，去到佢啱啱守到嘅地步；雖然佢無諗過有機會贏我，但睇得出佢係好落力咁要同我打落去，而佢嘅球技亦都一直有進步，去到一種我唔全心殺死佢就好難贏到佢嘅狀況。
不過大家又唔好諗住我哋打得咁輕鬆都會贏，對面無絕對優勢啫，中場休息時都係領先十一比八，而女神就一副事不關己咁嘅樣。
我：「使唔使出力追返幾球呀？應該有機會贏㗎喎。」
敏：「我諗緊…不如買啲浴鹽浸，唔好嘥咗個浴缸，但未諗到買乜嘢味好。」
我：「真係由得對面贏一局先？」
敏：「咪畀人開心下囉，等佢第二局先知味道就得，你到時唔好跌watt呀下。」
我：「妳專程嚟打心理戰？」
敏：「如果一早就俾你知我鍾意你，咁樣重有得玩咩？」
我：「如果我一早知…可能就可以少好多意外。」
敏：「咪畀曉彤佢開心下囉，如果係妳嘅，咁就始終都係妳嘅。」
我：「詩敏！妳當初真係咁諗！？」
雖然我同曉彤關係不再，但唔代表我會想接受詩敏係一個會咁諗嘅女仔。