【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 近水樓台先得月
190k釋出
敏：「你唔使咁緊張喎…我同曉彤兩個嘅問題，已經解決晒㗎喇，不過呢，我一直都有諗當時嘅自己係咪做得好錯…但曉彤佢咁樣，又會有啲慶幸對佢做成傷害嘅係我呢個好朋友，如果換轉係第二個呢，結果可能會更加不敢想像…嗯…其實鬼叫佢當年咁大口氣喎，係要迫咗我啲火出嚟。」
我：「想問下…曉彤當年點大口氣？」
敏：「放心啦，關於呢樣嘢你呢世都唔會知。」
我：「唔好啦，不如講少少hints嚟聽下吖。」
敏：「請不要試探妳的女神，專心打波吧。」
我：「妳哋女仔啲關係真係好複雜…」
敏：「唔通好似你同一鳴咁咩，見到靚女就摏個頭埋去。」
當年攤牌嘅一幕睇怕會變成我永遠嘅一道謎團，無論係詩敏定曉彤都一直三緘其口，喺呢件事上面又的確無話邊個錯得多啲嘅，我自己都要負上好大責任。
對面應該討論緊點樣盡快解決我哋，而我哋就喺度討論兒女私情，好似有少少過份。
結果第一局我哋喺呢個節奏下輸廿一比十七，但對面已經全身濕晒喺度嗦緊氣。
敏：「我決定咗喇！」
我：「妳又決定咗啲乜呀…」
敏：「都係開返個網頁計數機ran下一陣買乜嘢味嘅浴鹽啦。」
我：「如果有幾個男仔一齊追妳，係咪又要開計數機嚟ran？」
敏：「好提議喎，入到大學咁多姿多彩，無計數機幫手真係唔知點揀先好。」
我：「我的女神…」
敏：「嚟喇，要認真打波喇！」
第一球由企對面右手邊嘅女仔開波畀詩敏，呢個時候我發覺佢已經企前咗，而又可能對面覺得我哋無乜威脅，所以開咗一個平遠球過嚟。
詩敏輕輕一跳欄截再劈落去對面右邊線T字位，對面個女仔無諗過突然之間個波會回得咁刁鑽所以只能近乎甩埋個身位逗返個波上網，而呢個時候詩敏已經彈咗嚟我面前，個女仔都重未企返好就已經俾佢點殺咗。
嗯，幾好，我唔介意無波打㗎。
對面兩位選手見到咁嘅情況突然面色大變，而女神就露出狡猾而奸詐嘅笑容，好在…詩敏係我嘅女人，而唔係我嘅敵人。呢個時候我哋啱啱熱完身全力衝刺，而對面已經係力有不逮。
跟住到我開畀對面條仔，你估我重會開高遠球咩，雙打本來就唔應該咁開，所以我用一個短波迫返佢上嚟，詩敏喺網前嘅反應係非常之快，喺主動控球下個節奏好快就嚟返我哋呢邊，回咗幾下之後我一嘢劈落對面底線又攞多分。
而呢場比賽接落嚟我哋單靠走位，反應速度，同埋控球落點已經可以壓制住佢哋，到咗第三局對面已經係接近望住個波無力跑過去嘅狀態。
其實唔係佢哋體能差，一日用盡全力打三場波其實唔係一件合理嘅事，第二場我哋遇到水平比較低嘅選手算係好好彩，叫做平衡返今朝嘅極端黑仔。我諗，對面今鋪都叫做輸得心服口服嘅，我終於明白體育精神唔係話每一分鐘都要出盡全力，而係因應情況用最好嘅戰術嚟為自己爭取勝利。
打完波之後詩敏行咗去塊白板前面睇幅賽程表。
敏：「唉，今次實攞唔到第二喇。」
我：「妳唔係想話畀我聽有機會攞第一呀？」
敏：「唔係呀，你望下，如果我哋一直贏落去，四強又會對返今朝嗰pair。」
我：「好在妳唔係同我講下場對佢哋啫，我諗返起都驚…不過妳諗到咁遠做乜喎，下一場有得出線先再算啦。」總之我哋成功晉級十六強。
去到化妝品店之後我哋發現咗原來有六隻唔同味道嘅浴鹽，結果我同佢為咗點ran而喺度辯論。
我：「1000除6咪167囉，你用ran出嚟個數除以0.167咪知佢係第幾份囉。」
敏：「咁樣唔準㗎，搭正中間點算呢？都話將嗰個數mod6睇下餘數係幾多會比較公平。」
我：「咁不如妳剩係睇第一粒數，一至六先count，零七八九就reject再嚟過，唔係重好咩？起碼唔使怕計錯數。」
同妳一齊，再無聊嘅嘢都會俾我哋發掘到樂趣。
唔再係沉迷喺妳嘅美貌，並唔會因為妳係我條女而覺得自豪，更加無須為咗自我心靈完成嚟堅持我哋嘅關係，只係因為有妳喺我身邊本身就係一件好開心嘅事。
上到酒店我先有閒情細心咁望下我嘅女人，佢換咗條連身羽毛球裙之後…嗯，我唔會話靚女咗嘅，但就好似女性化啲，溫婉嫻淑咗，嚴格嚟講係更加容易俾佢呃咗；而自從嗰次佢同曉彤冰釋前嫌之後都無再堅持keep到啲頭髮好短，而家嘅佢係綁咗條老鼠尾喺頭後面。
唔知點解我覺得佢而家個樣變咗一個可愛得嚟又有啲恐怖嘅妹妹仔，雖然我早就走唔出佢嘅手指罅，唔通…怕老婆真係男人嘅天性嚟？
結果呢一晚我哋就留咗喺間酒店度過夜，我阿媽聽到係詩敏同我一齊就即刻唔理我，而詩敏屋企亦都好順攤，我有諗過呢個乖女突然唔返屋企會唔會令屋企人擔心，不過出國旅行成個禮拜都係咁啦…而且佢總係會有一種懾服力，令到身邊嘅人同埋事隨住佢嘅心意而行。
敏：「點呀？你阿媽有無叫你中出我呀？」
我：「哎呀，咪玩啦，一個二個都係咁嘅…」
敏：「咁樣你就唔好中出我喇喎。」
我：「無諗住…攰到就嚟郁都郁唔到重中出咩。」
敏：「咁佢有無嫌我搶走咗佢個仔呀？」
我：「可能佢想趕走個仔，換個女返嚟玩多啲。」
日子一日一日咁過去，激烈嘅比賽亦都繼續進行緊；唔知係女神佢太好運吖，定係真係我哋實力有所長進呢，我哋竟然可以喺十六強同八強兩日嘅賽事度取勝進級；贏嘅過程當然一啲都唔輕鬆，但可以入到四強呢件事係超出晒一開始嘅預算，呢個成績絕對係我哋兩個打咗咁多年羽毛球所達到最好嘅一次。
而大家肯定都知道，我哋又要對返嗰對可怕嘅港青選手…就算詩敏係幾咁好勝都好，都知道我哋嘅贏面係小之又小，所以只求唔好輸得太樣衰就叫做對自己有個交待。無論下場係贏定輸，剩返落嚟嘅兩日我哋都要出賽㗎喇，因為係有季軍戰嘅，如果有機會…或者我哋可以第一次踩上頒獎台上面。
但，重有另一件都算係重要嘅事。
2010年8月4日會考放榜（第二次），對我嚟講呢…實質意義唔算係好大，因為我上次考得都唔算差，今次放榜只係補返科英文；但從各種唔同嘅角度嚟講，我對今次嘅成績係更加期待同重視。
鳴：「咁遲㗎，係咪想累我俾曉彤鬧呀！」
我：「放心啦，如果佢鬧嘅話我幫你哽咗佢。」
又唔係未俾佢鬧過。呢一年嚟經歷過種種事情，大風大浪嘅日子都終於過咗去，雨過天青後第一次同一鳴一齊返學校竟然係會考放榜。
我：「你科中文唔會再失手㗎？」
鳴：「傻啦，我上年以為語文科可以唔溫都合格先至一時輕敵啫，我唔會俾呢樣嘢再發生！」
我喺度諗，佢科中文合唔合格睇落同我關係不大；但只要諗深一層嘅話，佢上年合格就會升中六，咁好大可能會繼續同淫Wing拍拖，就唔會同曉彤做同班同學坐喺隔籬變得咁friend，甚至有可能變成我同曉彤一班而識唔到Tiffany，或者所有嘢都會改寫。
事過境遷，回頭一看其實詩敏同曉彤都係好女仔，我唔會執著到話嗰啲乜嘢非女神不娶嘅人嚟，但而家呢個情況確實係好理想；無謂深究曉彤同一鳴兩隻嘢愛得有幾深，至少都睇到佢哋相處得風流快活，比起同淫Wing一齊嗰陣嘅時晴時雨可能嚟得更加好。
我：「下年…又同你做返同班同學喇。」
因為選科問題，可以話確定咗九成九。
鳴：「爽呀！我日日同女朋友一齊返學，睇住你呢個孤獨精，今年重唔輪到你唱電燈膽？」
我：「屌！講呢啲，你夠膽同Wing姐上去唱《相逢何必曾相識》或者《會過去的》或者《愛到分離仍是愛》，我咪唱電燈膽囉。」
鳴：「玩唔起喎，到時我驚要你幫我唱輓歌…」
我：「玩唔起就唔好講廢話啦。」
鳴：「唔使唔開心喎，可能旖旎肯做你妾侍呢。」
我：「喂喂喂…點解你會講啲咁嘅嘢出嚟㗎？」
鳴：「吓…出面都傳咗好耐啦，話情聖落難民女甘心以身相伴。」睇嚟我真係無帶靈魂返學。
我：「拜託唔好再加鹽加醋，我都已經煩咗好耐。」
鳴：「吓！原來係真㗎？！我以為吹㗎咋喎。」
我：「邊有得真吖，佢都知道咗我同詩敏已經係點，只係…佢有時怪怪地咁唔知佢諗乜啫。」
鳴：「不如你大方啲問詩敏，可能真係可以納妾呢？」
我：「食屎啦你，係咪重嫌我嘅校園生活唔夠多災多難呀，教人一腳踏兩船都講得出嘅？」
鳴：「無呀，我想食花生咋嘛！」
我：「你呢啲損友！都唔明做乜當初同你friend。」
鳴：「吓，咪因為咁啱住喺同一棟囉。」
其實佢講得無錯，好多時人同人嘅關係只係受環境因素使然，並唔係因為啲乜心理上高層次嘅原因，正如中四開學嘅座位表已經決定咗我同佢嘅命運咁。