【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 曉彤出院
我：「詩敏…一陣…我哋要點樣…比較好？」
上咗的士之後我開始頭痛，喺曉彤面前同詩敏點相處會比較好，我諗夾一夾先會好啲。
敏：「有乜點樣呀？自自然然咪得。」
我：「但我就係唔知點樣先叫做自然吖嘛。」
敏：「總之你一陣唔好咁多廢話，做返你嘅廢J兵仔就得，我會搞得掂，靠你就真係死得。」
詩敏嘅變面真係無懈可擊，話變女神就變，唔使一秒就搞掂。
我：「詩敏…」
敏：「你都唔好同我廢話，所有嘢在心中。」
咁果敢決斷嘅女仔，除咗佢真係唔知去邊度搵。
話咁快就去到我哋熟悉嘅醫院走過熟悉嘅路。
彤：「詩敏！等咗你哋好耐喇！」
兩個女仔相見就抱埋一齊，見到呢一幕我覺得安樂晒，之前嘅事彷彿只係一場不存在嘅惡夢，佢哋可以做返好姐妹，我身邊有無女朋友呢個問題都可以拋諸腦後嚕。
曉彤嘅爸爸媽媽當然喺度，睇到自己個女好返晒可以出院當然開心，至於嗰啲考唔到會考要repeat嘅問題都只係不值一提嘅小事，不過呢，曉彤媽咪有時望住我嘅眼神總帶住一啲啲擔心。
就係咁，我哋五個人搭車返到曉彤屋企樓下。
彤：「爹地媽咪，我想一陣落返嚟陪同學食晏呀，會唔會好不孝？」
彤媽：「點會呢，妳暈咗嗰陣佢哋成日嚟探妳，有啲咁好嘅朋友我哋不知幾戥妳開心，不過妳啱啱好返咋喎，記住唔好食煎炸刺激嘢。」
敏：「放心啦，伯母，我會睇住佢㗎喇。」
彤：「咁你兩個喺度等陣，我上去沖完涼換埋衫就落嚟搵妳哋啦！」
我同詩敏就喺樓下商場等佢。
我：「睇到曉彤而家佢咁樣真係放心晒。」
敏：「係囉，佢好似好開心喎，係咪你喂咗砂糖畀佢食呀？」
我：「妳唔好笑我啦，我只不過係正正常常咁對一個女仔好啫，咁…詩敏妳開唔開心？」
敏：「你哋開心我咪開心囉，係咪？最緊要人無事，其他都好閒嘅啫。」
我：「其實當我見曉彤醒返，我發覺自己重係當佢係女朋友…感覺嘅嘢唔係話講一句就會無咗，就算佢係有缺點，曾經做錯嘢，唔代表我唔著緊佢…嗰陣嗌分手只係我想逃避，想盡快解決個問題…但其實無論係點，個問題都係仍然喺度，無論作為佢嘅男朋友，定係普通朋友，我都唔應該一走了之，咁樣太唔負責任…而且自己嘅脾氣都佔咗好大因素。」
敏：「所以嗰陣咪叫你冷靜啲，好彩佢無事咋。」
我：「放心啦，經歷過呢啲，以後真係會醒定…只不過，我好似負咗妳…」
敏：「邊有啲咁嘅事呢，我同你好公平，誰也不欠誰，唔係咩？最好嘅嘢我哋已經享受咗…未來嘅嘢又有邊個可以保証到呢？」
我：「係咪妳都係對我無信心？」
敏：「唔知呢，諗辦法令曉彤幸福，咁我就信你；可能，係我對自己無信心多啲呢。」
謦咗一陣之後曉彤都落返嚟，睇得出係經過一番打扮，瞓咗成個月個髮型當然keep唔到而且長咗好多，所以佢就紮咗蓻頭髮去後面變咗條老鼠尾，前面個陰長咗又帶啲散亂，但就令人覺得有一種天然隨心嘅舒服，無以前咁拘謹；上身著住件粉紅色無袖平膊襯衫，下半身係一條露膝嘅白色百摺裙；本來有啲病容嘅佢喺搽咗lip gloss同上咗少少粉之後個樣精神咗好多，除咗真係瘦咗一個圈之外應該睇唔出佢大病完一場嚟。
同hea爆嘅詩敏應試裝有好大分別，呢邊一件鬆身嘅白T加條唔長唔短嘅裙褲，睇嚟佢都唔想身邊嘅男仔因為分心而影響到成績。
敏：「大小姐出院第一餐想食乜呀？」
彤：「有妳喺度就梗係食大排檔啦，好唔好！」
我喺度諗，究竟曉彤嘅心態係返到去中四所以同詩敏咁friend吖？係因為嚟接出院所以又friend返吖？定係其實只係禮貌上扮出嚟…女人心真係海底針，睇嚟唔係我呢啲凡夫俗子可以諗得通，就算我比佢更清楚之前發生過嘅事。
要面對曉彤落差嘅人唔止我，詩敏曾經俾佢威脅而搞到完全反面，自己鍾意嘅人就俾佢用手段搶走，但而家就同佢撓住手喺條街行，唔知佢嘅心情係點嘅呢？不過望落就好自然。
真又好，假又好，睇落和諧都好過之前嘅。
曉彤屋企附近嘅大排檔當然唔係平時果檔，呢度無車仔麪，詩敏睇完一輪就決定嗌四寶河，真係好乎合佢平時嘅風格，至於曉彤就喺度左諗右諗。
彤：「你諗住食乜呀？」
我：「妳食乜我咪食乜囉。」
佢望咗詩敏一眼，好似有少少尷尬。
彤：「我想食燒臘呀，好耐無食過肉，但又怕肥膩得滯…」
我：「唔緊要呀，拆咗層皮，肥得滯嗰啲咪畀我囉。」曉彤聽到個樣一面滿意咁笑咗出嚟。
就係咁我嗌咗兩碟四寶飯改髀，再加碟油菜，十足十平時我同一鳴嗰啲敗家食法。
彤：「詩敏…咁妳點算呀？」估唔到佢先開口。
敏：「嗯？乜嘢點算呀？」
彤：「妳真係唔要佢呢隻兵嗱？」
敏：「睇到佢為咗妳喊到呼天愴地咁，我重點好意思同佢繼續玩落去喎，兵呢家嘢都係留返畀啲真正適合嘅人啦。」
彤：「咁妳得返一個人…咪好寂寞囉。」
敏：「點會呢，妳接收咗佢等佢唔好煩住我重好，我都想專心啲溫書㗎！」詩敏呢個大話精…
彤：「乜喎，我無應承同佢一齊㗎。」
敏：「唔緊要㗎，搵佢做住兵先，雖然有啲煩，但都幾好玩，間唔中又有啲用，都OK㗎。」
彤：「唔怪之得妳enjoy咗年幾啦…」
當呢兩個女人friend返，我地位又變返地底泥。
敏：「嘻嘻，少少啦，不過妳小心啲呀，佢都會曳㗎。」詩敏露出一個意味深長嘅笑容，啲戲真到…
彤：「點呀？佢好鹹濕㗎？」
敏：「呢層咯…男人九成九都鹹濕㗎啦。」
彤：「點㗎，點㗎？話我知吖。」
詩敏望一望我，然後將個嘴貼咗係曉彤側邊。
彤：「依！好鶻突呀！」
今次我真係百辭莫辯，但無所謂啦…其實呢個moment畀我嘅感覺真係好奇妙，兩個都曾經係我嘅女人喺我面前竊竊私語，先唔講我同佢哋而家嘅關係開唔開心；一個係相愛過三日，喺上天嘅戲弄之下，因為自己嘅背棄而只可以喺心入面繼續愛嘅女神；一個係曾經要強姦我都要得到我但而家無晒啲唔好記憶嘅麻煩女仔…我忽發奇想如果可以永遠保持而家咁嘅狀況都唔錯，三個人一齊食飯開開心心，何必拘泥於嗰啲庸俗嘅男女關係呢？要解決性慾一隻右手都搞得掂啦，日日對住佢兩個，再唔係偷偷借Wing姐嚟用下。