【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 會考進行中

見佢哋兩姐妹謦得好開心，自己啲私慾簡直煙消雲散，我諗我就嚟可以出家㗎喇；我靜靜地咁幫曉彤批走啲雞皮，切咗啲燒腩皮同面嗰層自己食，再用啲瘦叉換走佢啲肥叉…
睇嚟曉彤真係好肚餓，差唔多食晒成碟四寶飯。
敏：「嘩！妳做乜換咗電話嘅？iPhone嚟喎！」
彤：「嘻嘻，呢隻嘢借畀我用㗎。」
敏：「哦！原來係無事獻殷勤…」
彤：「係囉，非奸即盜！」
我：「No no no，係不亦樂乎。」
我伸咗隻右手食指出嚟左右攉，同佢哋講我呢個先係正確嘅concept，唔好誤解。
敏，彤：「食屎啦你，肯定你中文fail！」
唔會囉…中文嘅話一定合格，起碼我重識一句，有錢使得鬼推磨，夜半敲門也不驚…


敏：「好喇，食完飯我都差唔多要返歸喇。」
彤：「吓…咁快走，唔陪多我一陣？」
敏：「哎呀，我點好意思阻住你兩個拍拖呢？」
彤：「邊係喎！呢條友對我嘅好意…我諗要好好慎重考慮一下，觀察一段時間先。」
『對換了你身份可應該滿足　情人還是知己都擁入懷抱』腦海內再次出現呢段歌詞，一年前嘅同枱食飯就好似無變過，只係錯咗位…
敏：「咁我唔同妳而家可以休養生息嘛，我下個星期三要考A.math，星期五要考英文㗎。」
彤：「邊個話我休養生息！我都要去考！」
敏：「使唔使咁搏呀…」
彤：「嘻嘻嘻，橫掂我畀咗錢㗎嘛，去坐下感覺都無咁蝕吖，如果我今年pass咗成績又唔錯嘅話，下年咪可以溫少科囉，係咪好叻呢。」
論小聰明同蠱惑嘢佢又真係幾在行嘅。


敏：「咁我哋一齊努力啦！不過我啲書喺晒屋企，要快啲返去先有得溫。」
彤：「我今晚要陪屋企人，星期六日要搵下啲長輩，佢哋都好掛住我…不如，我哋下星期一二一齊溫書吖，好唔好呀？」
敏：「吖，妳個衰妹係要我做電燈膽嘅。」
彤：「唓，妳唔捨得咪還返隻兵畀妳囉，我都唔係好恨。」孔融讓梨定以退為進？我都唔知…
敏：「唔得…阻人溝女會俾人BBQ㗎，咁我哋過兩日再約啦，到時見。」
食完飯我就同曉彤去商場行下先。
彤：「你做咗佢年幾兵真係乜都無㗎？」
我：「無呀…咪好似妳以前睇到嘅咁囉。」
彤：「都唔係吖…起碼佢都有畀過裙底你睇呀。」
到底呢個大話精女人頭先喺佢耳仔同佢講過啲乜…但諗深一層又唔係大話，由day 1開始…


我：「與其話佢益我…不如話佢惡搞我呢隻兵。」
彤：「唓，我就唔信你唔想睇…咁，你而家想唔想睇我裙底呀？」
我：「就算想都唔係咁㗎，妳都知我乜人嚟…」
彤：「咪讕正經嘅人囉，係嘞，詩敏佢對你…真係無嘢㗎？一啲感情都無？」
我：「做乜咁問呀…曉彤…」
彤：「如果唔係我好似搶走你咁，佢咪會唔開心…」曉彤個樣愁眉深鎖咁，睇嚟真係擔心。
雖然我中四開始就無讀歷史，但都知世界上好多悲劇同大事都係因為開初嘅一個輕微誤解又或者做錯一個小決定而引發，如果希特拉當初堅持要做一個畫家，咁畢加索呢…望住眼前嘅曉彤，就好似感受到歷史一切推倒重來，曾經同詩敏決裂，威脅好朋友，喺女廁強姦我嘅佢彷彿從未存在，就連呢個人格都好似係虛構出嚟嘅海市蜃樓咁…我諗係好事嚟嘅，女仔都係純純地比較好。
對於佢呢個尖銳嘅問題，我當然有預期過會有出現嘅一日，亦都準備好一個適合嘅答案。
我：「曉彤呀，其實呢…詩敏佢喺好早就拒絕過我㗎喇…」唯有學埋詩敏一齊做大話精。
彤：「吓？咁妳年幾重圍住佢轉…傻㗎？」
我：「唔係咁嘅…詩敏雖然係拒絕咗我，不過都仍然當我係朋友嘅，嗰陣全世界都已經知我追緊佢又做兵，直接turn down我嘅話我實俾全世界笑到面黃，佢話唔介意我喺佢身邊繼續好似隻兵咁圍住佢，都係朋友嘅一種啫，加埋又可以趕走晒佢啲狂蜂浪蝶，就係咁我同佢嘅女神與兵遊戲就玩咗年幾囉…」
彤：「原來係咁，唔知係女神太難追呢？定係你太廢呢？」
我：「我諗係我廢掛，所以做緊佢兵嗰陣都唔敢追其他女仔囉…曉彤，如果妳想拒絕我嘅話，直接同我講就得…唔使怕hurt到我。」
雖然我知肯定無可能。
彤：「嘻，咁妳又唔使咁擔心嘅，我一直都覺得你係一個OK嘅男仔嚟；不過呢…我就唔係為咗難為你，不如我哋而家專心溫書考試先，考完先再一齊相處多啲再決定，咁樣好似對我哋都好啲。」


我：「好呀，無問題！多謝妳。」
彤：「咁我返屋企陪家人先，星期一再見啦！」
就係咁我同佢分別咗，估唔到一個不惜用身體嚟搶我走嘅曉彤可以變到咁有條不紊，究竟係之前詩敏對佢嘅刺激真係咁嚴重吖…定係佢昏迷完之後個性格產生咗改變呢？
無論如何，一切正常就好。
星期一二我哋三個人真係一齊出咗嚟溫書，講真係專心到超出我想像，完全無提過任何兒女私情嘅嘢，只不過曉彤同我嘅距離坐得接近咗，而詩敏都有同曉彤惡補返啲A.math，畢竟咁耐無計過係會生疏好多。
話咁快就去到星期六考完英文listening，除咗oral之外就只係剩返Bio一科，我哋決定約埋一鳴同Wing聚一聚，其實佢兩個都大概瞭解咗個情況，但保險起見都係出嚟夾一夾口供先隱陣啲。
詠：「嗯，我哋知道大概要講啲乜㗎喇。」
鳴：「Sorry呀志華…你同曉彤發生咗咁大件事我都好似幫唔到你啲乜，雖然我要顧住溫書…」
我：「唔緊要…其實你要幫都真係幫唔到啲乜…」
敏：「咁你兩個又點呀，呢排無鬧架呀？」
詠：「我哋都咁耐啦…有乜好提喎…」
然之後Wing姐伸咗隻手去一鳴塊面捏到佢呱呱聲咁叫，睇嚟感情都重過得去。
詠：「詩敏…我擔心你哋兩個多啲呀…」
敏：「做乜喎，我同佢有乜嘢要擔心？」
詠：「詩敏妳唔好呃我啦，我唔信你哋兩個乜嘢都無。」勢估唔到Wing咁關心我哋，重要咁直率。


敏：「多謝妳，唔使過慮喎，我哋一直都係互相明白嘅好朋友嚟，我諗妳諗多咗。」
詠：「詩敏呀…點會喎…」
鳴：「佢哋嘅私事就由得人啦，無謂插手…」
詠：「你知啲乜吖！木獨男，諗下食乜好過啦。」
鳴：「不如食大家樂咯？」
詠：「大家樂無五個位嘅枱㗎，你係咪自己一個坐隔籬呀？」佢兩個都真係兩年如一日。
結果我哋都係去返平時檔大排檔，等咗一陣曉彤都嚟埋，今日嘅坐法係逆時針曉彤、我、一鳴、Wing同詩敏；唔使講詩敏又食返佢嘅車仔米粉，一鳴食燒臘飯，Wing就食常餐，曉彤大病初癒特別珍惜品嚐各種唔同嘅美食，我就嗌咗福建炒飯同沙嗲肥牛炒河同佢兩份share，而曉彤嘅腸胃、面色同體形都好返好多。
鳴：「犀利喎志華，今日終於唔使食車仔麪。」
敏：「哎呀，你就唔好笑你嘅好朋友啦，之前又唔係我攞把槍指住佢個頭迫佢嘅。」
都係嘅，只不過呢樣係做兵嘅條件，且我自願。
我：「做人有時換下口味都好嘅…」
詠：「志華你而家真係追緊曉彤㗎？」
彤：「哎呀！好地地食飯做乜要講埋啲埕埕塔塔(情情塌塌)嘅嘢喎，影響消化㗎！」
詠：「哈哈，妳對住我哋呢對情侶係咁㗎啦。」
我：「我睇住佢暈低，先知道原來自己係會咁緊張佢，喺醫院陪佢嗰陣，雖然佢只係喺度瞓緊覺，但唔知點解就覺得佢越嚟越cute…」


我講完曉彤塊面就由嫣紅色轉為赤紅色，十足十煲水煲到出晒煙嘅情況咁，咇咇聲響。
敏：「夠喇！知你哋四個好sweet sweet喇！」
彤：「無啲咁嘅事呀，連詩敏妳都玩我嘅…我無講過已經接受咗佢㗎，等佢慢慢追啦。」
鳴：「哦，唔通妳都想一直由佢追妳當佢係兵咁？都明嘅…又真係幾好玩，我睇住都覺得歡樂。」
真兄弟，從來都唔介意互食花生嘅…雖然我係好想兜捶揈落佢心口度。
詠：「唔好咁衰啦，曉彤，其實拍拖好開心㗎，最多一言不合就分手嘅啫。」拜託我唔係你兩個…
彤：「哼，睇下佢有無誠意先啦，男仔個腦九成時間都喺度諗緊啲衰嘢，我都係小心啲好。」
詠：「都唔緊要㗎，佢好朋友都係一⬛樣㗎咋，一齊耐咗好快就慣，唔只諗衰嘢，重好低B。」
Wing姐，計我話論諗衰嘢妳都應該係表表者。
彤：「夠喇，呢個話題唔該停止！如果我真係同呢條粉腸拍拖嘅話到時一定會鄭重咁通知大家；難得重有一科主科就考晒試，不如討論下呢個有史以嚟最漫長嘅暑假到底點玩好吖？」
詠：「啊，呢隻嘢已經機票都買埋同我去兩個禮拜韓國旅行。」
彤：「嘩！咁正！羨慕死人喇！」
敏：「旅乜鬼行吖…唔方唔係你兩個喺韓國扑到天荒愛未老。」
搞乜呀…詩敏做乜突然語不驚人死不休咁嘅，雖然佢講嘅真係好中point，睇住Wing同一鳴連砌詞狡辯反擊嘅能力都無就覺得好好笑。