【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 驀然回首

第二朝瞓醒，好似發咗場夢咁，究竟係虛幻定係真實？世事往往就係咁令人捉摸不透，一啲喺你眼前日日見到嘅嘢原來都係假嘅，而事實嘅真相就只會喺你生命中一閃即逝。
我打開咗床頭上面嘅一個錦盒，本來係用嚟放錶嘅，攞咗入面個保鮮袋出嚟開封，深深咁嗦咗一下，詩敏濃烈嘅⬛⬛味道仍然喺佢條底褲上面，聞完我成個人精神晒，準備為我今日嘅行程努力；妳放心啦，我已經大個仔，唔會再亂嚟，我愛妳，詩敏。
同屋企人食完晏飯之後我就話要去自修室溫書，而我嘅自修室當然就係…
我：「Maths past paper…caltor…白紙…」
搭住我熟悉嘅路線，去搵嗰個我熟悉嘅人。
我：「曉彤，嚟探妳喇。」
佢望住我個樣好似見鬼咁。
彤：「點解會係你㗎？你嚟做乜！」
我：「擔心妳咪嚟睇妳囉…之前我都成日嚟。」
彤：「你聽日考Maths喇喎！重嚟做乜？」


我：「咪嚟計數囉，如果唔識我會問妳㗎。」
彤：「你係咪黐線㗎！做乜唔同詩敏一齊溫？」
我：「曉彤…其實我今年同佢已經無咁friend喇。」
我唔知點形容好…無咁親密？無咁迷戀？就咁算。
彤：「吓…係咩？點解會咁…我都唔記得晒。」
我：「無呀，一直以嚟佢都係陪我玩啫，我知道自己無乜希望追到佢，臨會考無謂嘥大家時間啦，重玩細路仔遊戲咩…但到我睇到妳突然暈低咗，我先知道原來自己咁關心妳。」
彤：「多謝你…但做乜喎，關心我都唔使成日嚟睇我㗎，同埋我都醒返啦。」
我：「就係醒返我先要更加嚟睇妳吖嘛。」
彤：「你好奇怪，到底發生咗乜事呀？」
我：「嚟睇自己鍾意嘅女仔唔係好正常咩？」


彤：「喂喂…喂！你講乜呀？」
我：「曉彤，我鍾意妳。」
兩年經歷咗咁多事，我諗我同任何女仔表白都可以駕輕就熟，不過當然我唔會墮落成為嗰啲周圍拈花惹草嘅仆街仔。
我：「我幾驚我再無機會親口同妳講呀，好彩妳醒返咋，曉彤。」
彤：「點…點解會咁㗎…係幾時嘅事…」
我：「我都唔記得喇，可能好早好早…只不過我做緊詩敏隻兵唔可以同妳講啫。」
彤：「我想問…詩敏知唔知呢件事…」
我：「嗯…我邊瞞到佢吖，嗰陣時我望住昏迷嘅妳喊到死去活來咁，詩敏就叫我唔好再做兵，好好照顧妳，重祝福我同妳。」
雖然我嘅表情好平靜，但每講一粒字出嚟個心都好似俾針拮咁。
彤：「喂喂喂！你唔好見追唔到女神貪方便就走嚟approach我呀，我唔受呢套㗎，我唔係替代品。」


我開始越嚟越明白女人，口是心非真係佢哋嘅天性嚟，如果呢個係上年十一月嘅曉彤，佢係會鍾意我鍾意到強姦我，但偏偏就係會話唔受溝。
我：「曉彤呀，我俾人拒絕咗咁耐乜都慣晒啦，我今日唔係嚟追女仔㗎，追都等妳好返晒出院先啦，係咪？妳休息下俾我靜靜地計數就得。」
以退為進，我開始攞啲數出嚟計。
彤：「你…真係鍾意我？」
我：「嗯，如果唔係我點會聽日考數學都嚟喎，貪過癮咩…」
彤：「嗯…明明聽日我都有份考…」
我：「唔好諗喇，醫生話妳最快星期三出院，同埋妳無溫咁耐書點考噃，出年再好好努力囉，或者最尾嗰一兩科妳可以當去體驗下囉。」
彤：「考會考緊唔緊張㗎？」
我：「又唔係太緊張嘅，同喺學校考mock差唔多，不過…都緊張過同女仔表白嘅。」
彤：「你呀！都亂咁嚟，無嚟正經！」
我：「係喇…妳身體狀態正常返啲未呀？」
彤：「OK啦，琴晚我已經食粥，係有少少想嘔。」
我：「快啲好返啦，詩敏以前唔俾我請佢食嘢，第時我帶妳周圍去食好嘢呀下。」
彤：「唓，分明係你頂唔順日日車仔麪咋嘛，唔好話我話。」
講真嗰句，其實我係好習慣曉彤係我女朋友，而家喺佢隔籬安靜咁做數，我覺得幾舒服。


彤：「鍾意我做乜唔早啲同我講？」
我：「我未犯賤到想接二連三俾女仔拒絕囉…妳以前都剩係識恥笑我當我笑話，諗落都無乜機會，咪同詩敏玩住先囉…直至妳出咗事，我先知自己咁放唔低，好驚無機會親口同妳講。」
彤：「唔怪之得你當年會送頸巾畀我啦。」
我：「我都係見第一條織得太鶻突，送畀女神驚太失禮俾佢鬧我先織多條啫…」
彤：「我無女神咁㤿憸囉，親手織嘅差唔多啦。」
然後我又喺度計數。
彤：「喂！問你！我昏迷咗嗰陣你有無對我毛手毛腳呀？」
我：「即係上下其手？有呀，醫生話要郁下妳啲手手腳腳，等妳啲肌肉同血管保持彈性。」
彤：「認真呀，有無非禮我？」
佢作狀咁打橫隻手放喺心口前面遮住。
我：「暈咗有乜好非禮喎，梗係等醒返先非禮啦。」我伸咗隻手喺佢胸前幾吋嘅位置。
彤：「你敢！」
我：「唉，瘦蜢蜢非禮唔落，等妳食返肥先。」
彤：「哎呀！嫌我平呀話？我同你講呀！雖然我無詩敏咁大波，但我都有B㗎！」
我：「而家重有無呀？」


彤：「志華你係咪想死！雖然我唔係女神，但我一樣唔好恰㗎！」
我：「知錯喇，曉彤姐姐，我乖乖計數…」
睇住佢舉起手想打我個樣，都真係幾得意；我同佢都唔知有幾耐無咁鬥過嘴，都幾開心㗎，或者我同佢係唔適合拍拖，只適合曖昧。
彤：「係嘞…你成日嚟探我，咪見到我媽咪囉？」
我：「係呀，妳入嚟第一日就見過面。」
彤：「吓…咁我阿媽佢點呀？咪好奇怪囉…」
我：「無呀，佢無講啲乜，咪知道有個男同學會成日嚟睇妳囉。」
彤：「咁點算呀…我點同佢解釋好。」
我：「有乜好解釋，同學或者朋友都可以嚟探妳嘅啫，佢都無問我其他嘢。」
我又計咗兩題數，佢攞咗部電話上手㩒。
彤：「我媽咪琴日畀返部電話我，但我開唔到鎖…你會唔會知道我係用乜密碼？」
我：「吓！我點會知喎…」突然間搞到我作賊心虛。
彤：「咁你嗰時坐我隔籬㗎嘛，或者睇到呢。」
我：「第一，我唔會䚎女仔電話嘅密碼；第二，就算我唔小心睇到我都唔會記住…」
彤：「咁樣我好悶呀，又未出得院住。」


我：「一係妳畀部電話我洗晒入面啲嘢重裝，然後放幾隻game入去畀妳。」
彤：「咁又唔好…或者我會有一日開得返呢，到時我想睇返入面有啲乜，唔想無咗啲回憶。」
曉彤妳可以放心，呢世妳都唔會開得返。
我：「呀，不如我畀部iPhone 3G妳用吖。」
彤：「吓！炒到好貴㗎喎，買都買唔到咁滯。」
我：「上年啫，而家正常返㗎喇，我屋企有部係抽奬獎品，爹地媽咪嫌麻煩唔得閒開嚟用，我畀妳用住先吖，好唔好？」
彤：「我點好意思呀，咁貴重。」
我：「好過就咁放喺屋企吖，或者…妳諗下點報答返我囉…」
彤：「食屎啦你！肯定喺度諗埋啲衰嘢，唔怪之得詩敏佢兵咗你年幾都唔俾你掂！」
我：「邊有喎…我都係正常男仔啫…」
就係咁，我計數計到五點九準備走人。
彤：「志華，過嚟吖。」
我：「做乜呀？」
彤：「有啲嘢同你講。」
我：「咁咪講囉。」


彤：「攞隻耳仔過嚟。」
我：「搞乜呀，呢度都無其他人…」
不過我都係聽佢話，點知佢輕輕惜咗落我塊面…其實呢…對我嚟講就好閒嘅啫，但我呆咗咁望返住佢，我都唔知用乜表情比較適合。
彤：「喂，唔好亂諗呀…唔代表我接受你㗎，只係想報答返你對我嘅關心同埋陪伴。」
我：「曉彤，妳好靚女呀。」
彤：「傻㗎咩，你成日對住詩敏，我算得啲乜…」
我：「邊係呢，妳笑得好靚。」
彤：「喂呀…」佢塊面紅卟卟，成隻傻豬咁。
點嘅女仔先最靚？有自信，開心咪靚囉；曉彤，喺以後嘅日子我都唔想再睇到妳喊，發嬲，發脾氣，可唔可以？我會好好咁陪住妳。
離開咗醫院之後我就搭車去旺角，好在行咗陣就搵到間鋪頭賣iPhone，然後攞咗二千幾蚊出嚟埋單…有少少傷㗎，不過呢啲責任我係應該負，曉彤住咗成個月醫院，就算係公立呢度都唔少錢，我一個學生又無理由同佢屋企講話我幫佢畀…
由於3G上網貴到嚇死人，所以返到屋企我就開封，連Wi-Fi上網幫佢download啲game落部電話度，原來都唔算難用，個mon又好鬼靚…
我竟然可以為咗佢搞呢搞路都唔溫書。
到咗第二日我攞埋部電話考數學，完咗之後咬個包就即刻仆過去搵曉彤，佢見到部iPhone開心到呢，左㩒右㩒不停試我幫佢入落去啲games，我就喺隔籬背Econ definition同埋periodic table。
之後一日係day off，我都要專心搏殺，知道曉彤正常返我就全日留喺屋企溫書。
星期三考完Econ之後我都有睇佢，知道佢聽日就可以出院。
星期四係考Chem，咁啱我同詩敏同一個考場。
我：「詩敏，啱啱份Chem考成點呀？」
敏：「咪問埋我啲無謂嘢啦，快啲行，唔好要曉彤等我哋呀！」