【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 最後的倒敍回憶
我：「真係唔知原來曉彤已經搬咗屋。」
敏：「唔係幾好咩？人望高處吖嘛。」
講就咁講，但我屋企已經好高，再高啲係點？要搬去半山？我其實無乜呢啲概念，如果可以一直維持現狀就好，同佢食車仔麪係我其中最開心嘅事嚟。
我：「係囉，一係唔溝女，一溝就要女神。」
敏：「哈，讕醒，小心我將你發配邊疆呀！」
我：「唔好啦…乜我做得好差咩…」
敏：「唔係呀，講笑咋嘛，係嘞，你今年唔使準備生日禮物畀我嘞，知唔知？」
我：「嗯？點解呀？我都無諗住破費買嘢…」
係，真係好煩，詩敏佢唔鍾意商品，所以我已經諗到頭痛，如果佢明示我唔使送都好嘅，但無論如何我都想向佢表達我嘅心意，例如寫封情書畀佢？以我文筆好可能會俾佢笑死…或者帶佢去睇下日落都唔錯。
敏：「總之你聽我話唔使準備任何嘢，我到時自會有用你嘅地方。」
我：「好，咁我信妳啦，到時自會全力已赴。」
敏：「乖嘞，咁聽日見啦！」
估唔到過咗成年，我同佢重可以一直維持住呢種日常，同上年開學分別不大，都實屬難能可貴。
到咗第二個禮拜嘅星期五，我哋練完波之後…
敏：「喂，跟我嚟啦…」
我：「嗯，我哋要去邊呀？」
敏：「如果我去地獄你跟唔跟埋我落嚟呀？」
我：「梗係落啦，係驚落到去會被迫分開。」
敏：「咁你就唔好問我啦。」
行咗五分鐘之後我就get到佢要去邊，我即時有啲緊張，希望我重會記得啦…
敏：「嘻嘻，我儲夠錢買新球拍喇。」
我諗起自己房掛住嗰兩塊空框就覺得慚愧，明明佢只要開句聲我就會無條件借畀佢用，但女神就係偏偏有佢嘅堅持，亦都因為咁而突顯出佢性格嘅高貴，所以我先會對佢咁死心塌地，唔單止係感情上，而係作為身邊嘅人發自內心欣賞佢；佢一餐都係食廿蚊多啲，當佢每日慳到五蚊，一塊叫做上到場打比賽嘅拍講緊都要五六百蚊，即係要慳過百日嚟換塊球拍，諗到我好心痛。
雖然…其實食車仔麪無乜問題，又唔會飽得滯，又可以嗌多啲蔬菜，應該點都有益過焗豬紅豆冰。
闆：「咦？妹妹好耐無見喇喎！太好喇，見到你哋重一齊緊！」
敏：「哈哈，其實我同佢係同學嚟㗎咋…」
闆：「有乜所謂喎！人同人相處講緣份，同學又好，朋友又好，乜都好啦，隔咗成年又可以一齊嚟我間鋪，開開心心咪得囉，咁就夠晒好！」
敏：「哈哈…多謝你呀，我今次嚟買拍㗎。」
於是我哋就一齊揀球拍，如我所料佢揀咗一塊六百幾蚊嘅拍，都叫做係佢而家嗰塊嘅double㗎喇，然之後佢畀完錢就係我上場嘅時候，咁老闆佢都好識做借部機畀我用。
成年無玩過話唔緊張就假，今次詩敏重要企喺我隔籬睇我織，佢望住我嘅樣係充滿信任同感謝，而我都無失手由頭到尾一次過咁完成，唔使老闆佢過嚟幫手。
闆：「Bye bye呀！下年要繼續一齊嚟呀，淨係嚟買粒波都得㗎！」
敏：「呢個老闆都真係幾得意。」
我：「嗯，係呀，可以同妳一齊我真係好開心。」
敏：「乜嘢一齊呀，你抽得中先算啦。」
我：「唔係呀，我係話平時同妳一齊已經好開心。」真心，就算唔係拍拖，無得掂都好滿足。
敏：「喂，不如我哋食碗糖水先返去咯。」
真係難得，平時絕對唔會花無謂金錢，又死都唔肯俾我請嘅詩敏，竟然撩我食糖水，不過呢啲屋邨商場嘅街坊鋪就好平嘅啫。
敏：「椰汁西米露吖。」
我：「椰汁紫米露啦。」
同平時一樣，有最平嗰個選擇通常佢就係揀嗰個，而我就會跟佢嗌，所以大大話話佢都令我儲多咗唔少錢…但諗深一層，啲楊枝甘露，芒果益力多冰係咪真係有咁嘅價值？自己係咪真係鍾意食先？好可能不如一碗最簡單踏實嘅西米露。
唔好諗歪！係甜品西米露，唔係我畀初音妹妹食嗰啲…當然望住詩敏佢一啖一啖潷入口呢…
敏：「喂！做乜咁望住我，係咪諗緊衰嘢？」
真係天山雪蓮都無咁聰明…Sorry，我食糖水食到血糖high得滯所以唔小心喺度鳩噏。
我：「邊有喎…詩敏呀，妳過得開唔開心？」
我知道，生活環境唔同係我哋必要面對嘅問題，就好似佢第一次嚟我屋企都咁問我一樣。
敏：「做乜咁問呀，點解要唔開心？」
我：「我見妳平時做乜都要計過度過，乜都慳住使咁，會唔會辛苦？」
敏：「有你呢個傻仔跟住我慳，乜都開心返晒啦。」
我：「真係㗎？」聽到佢咁講幾驚喜。
敏：「唔使咁興奮喎，其實知足咪常樂囉。」
我：「咁都係嘅。」同佢一齊得多我都感受到。
敏：「我問你吖，有錢人煩惱多啲定係窮人煩惱多啲嘞？」
我：「窮人嘅話，可能用最簡單方法解決咗三餐溫飽就覺得搞掂，就算再差都可以搵政府幫手，但係有錢人呢，就可能要顧住好多嘢…」
敏：「例如交際應酬啦，養車養樓啦，睇住啲股票啦…」
我：「係呀，爹地媽咪呢幾日係咁睇新聞，話美國嗰邊雷曼同美林嗰啲好大鑊，都完全無時間理我。」其實重有好多好多，例如儲咗啲飛行里數要打電話去同airline講數都隨時無咗半粒鐘。
敏：「咪係囉，所以簡簡單單都可以開心，而且又有你呢，好在養兵係免費嘅，嘻嘻。」
俾佢咁樣一講我就即刻面都紅埋，女神妳實在太大方喇，妳無理由唔知出面啲女神養兵係有錢收㗎；我好想講以後會同佢一齊努力，我會好好照顧佢，但一諗到我而家擁有嘅嘢其實完全同我無關，只係我生得比較好命，就講唔出口。
然後就如常送佢返屋企。
日子一日一日過去，除咗每日都要倒數重有幾多日會考令大家努力咗之外，其他嘢整體無乜變，一鳴同Wing兩個繼續神神化化你哋自行想像。
比較值得一提嘅係詩敏同曉彤嘅關係，曉彤搬咗屋之後佢兩個已經無以前咁friend；一來消費模式開始唔同咗，二來又無一齊行返屋企，三來又坐到鬼死咁遠…大家試想像，如果詩敏定位係女神我係兵，有乜可能要佢走過嚟搵我，當然喺我過去㗎啦。
女仔係一種同男仔唔同嘅生物，男仔唔friend可以話反面就反面，一句唔高興就轉場轉地盤，但女仔呢，佢哋係好微妙嘅，就算友情不再都會間唔中搵下大家，就算自己唔friend都要扮畀人哋睇咁，所以曉彤都會有時同我哋食飯，搞到我好似變到佢哋嘅linkage咁；呢種陌生同冰冷感，可能女仔真係適應到，但坐喺佢哋隔籬嘅我就真係唔太好受，我寧願佢兩個夾埋一齊笑我傻仔開開心心咁。
而平時上堂呢，我同曉彤都OK好謦㗎，佢而家生活好咗時不時會同其他女仔friend去睇戲唱K，都會同我講，又問下我有乜餐廳好食，邊度自助餐抵咁，我就梗係搭到嘴啦…但，我同一鳴呢啲小朋友自細就食到厭，已經喺大家樂入面搵到人生真諦，不過睇到佢開心我都開心嘅，可惜佢唔係詩敏，如果唔係我就可以帶佢周圍去食。
重有好多微細嘅改變，例如hand cream變咗大商場啲名牌，搽咗透明指甲油又問我靚唔靚，唔知係咪我錯覺好似連條裙都短埋睇到小半截大髀咁；就連我寫寫下字都八我嗰枝係乜嘢筆嚟，其實…都係我爹地對頭商戶嘅禮品Parker筆啫，真係買都係嚿零水一枝，而佢都開始整到成個筆袋五顏六色，啲notes寫到好似彩虹咁；唔知…咁樣係咪就叫成為港女之路呢？
當然佢都開始受歡迎，有收到情書，重畀埋我睇；睇嗰刻當然係過癮，但我覺得佢咁做有啲衰；佢重問我點樣回信好，應該吊人胃口定係直接拒絕，我問佢做乜唔去認識下人哋先，佢就答我條仔都唔係靚仔…