【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 無奈的快進
唔拖稿，唔流水賬係我嘅風格。(其實懶得打字)
我：「朋友，好耐無見。」
鳴：「我無話過好想同你坐囉。」
呢個Miss Lam調位真係再一次當捉棋咁玩，今次我同一鳴坐喺走廊嗰邊，而詩敏就同Wing坐喺窗口嗰邊；本來重諗緊佢係咪會成全我同女神多一次，睇怕佢都唔敢玩到咁過份，如果我同詩敏隔籬位坐足一年可能真係會傳到去校長都知；不過去到而家點調都無所謂啦，我相信就算分開幾遠都唔會影響到我哋嘅感情，而且重有樣嘢未講，就係眾所周知嘅原因逢親上Lab堂我哋都會一齊坐，因為我哋同一鳴阿Wing同組。
而曉彤就同咗其他女仔坐，佢都有啲唔同咗，聽講佢阿媽見佢已經大個女就出返嚟做嘢，好似話考咗個保險牌做financial planner；多咗份糧之後生活改善咗，開始有去補習社補下習，佢同其他女仔都friend多咗，唔再係餐餐都同詩敏食大排檔，好似重成日去食我最鍾意嘅大家樂…anyway，唔關我事，因為女神食乜我就要跟住食乜，至於Wing同詩敏一齊坐就當然繼續成日同枱食飯，我同詩敏都發覺佢兩個開始化化哋咁，就係嗰種懶得嘈感情又淡淡地嘅味道，雖然我哋兩pair好大對比，但又可以成日一齊對住，都咪話唔搞笑。
其他嘅都係差唔多啦，大部份人都勤力咗，我哋學校基本上九成幾收返自己學生，所以唔係你死就係我亡…而我，成績嘅嘢我算睇得開，但為咗女神，我絕對唔可以係亡嗰個。
好快就嚟到中四下學期大考，成績呢…我哋幾個都係入到頭半範圍，即係理論上比較安全，一鳴就啱啱擲界，我同曉彤差唔多，詩敏同Wing就再好些少，不過校內試同實戰係兩回事嚟，所以都係唔可以作準。
至於初音妹妹當然有搵過我，平均都係個幾兩個月一次咁，我都係對佢嘅身份茫無頭緒，但佢既然對我無乜威脅都係維持現狀算，反正我同佢玩都係幾開心嘅，雖然佢無進一步做更加多嘅嘢…但我又會驚如果佢更進取就有機會影響到我同詩敏；反過嚟講如果女神拋棄我嘅話都重有個後備女仔陪下我，唔係話一定要喺埋一齊嗰種嘅，雖則佢講過我無咗女神就會同我做，但我諗如果無咗女神嘅話我第一件想做嘅事係攬住佢喊返場先，唔知到時我可唔可以知佢係邊個呢？
咁我都有同佢message下，不過佢好小心盡量都唔會講其他同學，反而吹吹下會同我謦下淫嘢，例如問我多唔多打飛機，有無睇鹹片䚎人裙底呢啲，另外都有問我同女神搞成點；一來我要幫女神保密，二來怕佢介意，所以都係講到自己當個傻仔兵咁手都無得拖，其實係一半事實嚟，佢就會笑鳩我，重喺咁話我哋就算一齊都會好快分手，不如快的同佢做愛好過…我就好冷靜反問返佢同佢做完愛之後可以得到啲乜，佢都唔敢誇下海口話同我會有結果，總之佢都係幾鬼趣緻，其實我相信佢會係一個好女仔，但如果要同詩敏比，我無可能直接放棄而揀一個唔知係乜水嘅女仔。
最重要，我同詩敏又真係run得好地地，佢暑假都時不時會搵我打波同溫書，雖然黑仔嘅我四月之後都無再抽中過，係呀！就連暑假佢走嚟搵我畀我抽我都唔中呀…不過無所謂，自從上次佢個宣言之後我都當咗佢同我訂情㗎喇，我會將佢講嘅嘢當成係目標而唔係權利，唔通我哋到時淡晒甚至乎我哋已經有咗其他伴侶重出嚟做愛咩…唔係唔得嘅，可能要有啲契機囉，我就唔敢貿貿然搵佢話『夠鐘做愛喇！』咁樣咩…
另外就溫書都真係好緊要，兒女私情可以排後少少嘅，而家呢種穩定狀態幾好，我又唔使急點追佢會成功，因為睇落無捷徑；我哋又無其他情侶要面對嘅責任同壓力，反正做兵來來去去都係嗰幾樣嘢，佢又令我有希望，連鬧架嘅觸發點都可以話無。
呢個暑假可以話係我人生最充實又最開心嘅暑假，而開心嘅時間係過得特別快，開學喇！
中五開學有樣嘢好，就係可以跟返中四個位坐。
我：「暑假過成點呀？分手緊定復合緊呀？話定畀我知先吖，驚講錯嘢呀。」
你話我哋專心學業又得，話我哋有異性無人性又得，我同佢喺七月打過一次機之後都無再約過。
鳴：「哼…唔使驚呀…都係一樣。」
一樣？一樣乜呀？不置可否，見到佢個似笑非笑微妙嘅表情就想揰鳩佢，係咪即係愛照做，書照溫，架照鬧，然後同我講扑嘢扑到厭？
開學日同上年一樣，Miss Lam遲遲都唔見人。
喺無王管嘅狀態下我哋又開始亂咁嚟，好多人私自調位坐，反正第一日理論上係無order。
豪：「你哋調來調去問過某人未呀？」
「吓？Miss Lam都唔理㗎啦。」
豪：「唔係呀！係最應該調嗰pair都未調！」
吖…玩到第三年都未厭嘅…
豪：「志華，你重唔同詩敏…呀…唔係！係同阿Wing調位？」
我：「好喇好喇…反正都係坐一日咋嘛…」
橫掂我今日都未抽，所以我就起身，望一望阿Wing，佢都欣然接受起身同我對調。
敏：「嘻嘻，幸會喎。」
當然，抽唔中啦。
等咗半個鐘有多，Miss Lam終於上到嚟。
彤：「Stand Up！」
「Good morning Miss Lam。」
林：「搞乜吖？成班重坐晒喺度嘅？」
我諗全世界都一定心諗，妳自己唔上嚟我哋可以點喎…
林：「重望住我？中四玩過一次，一模一樣㗎咋！自動波啦。」
當然無人識郁，放完假又要適應返佢。
林：「主席，你重坐喺度？落去攞嘢呀！」
豪：「上年咪攞咗…點解今年又係我喎？」
林：「想要新意呀？罰你抄Bio書㗎！」
嚇鬼死人，Bio書比Math書恐怖好多，抄一個chapter都死得人。
豪：「放心！即刻去！」就連我同一鳴都即刻跟埋落去，Miss Lam佢M到起上嚟隨時良民都有殺錯無放過。
結果同上年一樣，我哋開始填form之後Miss Lam又走鬼咗去唔理我哋，不過我哋都真係大個仔，啲嘢自己都可以搞掂晒。
敏：「都知你睺住㗎喇，醒張畀你啦。」
佢講嘅正正就係佢啲証件相，上年呢個動作對我嚟講係驚喜萬分皇恩浩蕩，而家就變成我哋兩個人嘅情趣，當然我都識相咁將我張畀返佢。
Miss Lam Hea到成十一點先上返嚟。
林：「好，又係例牌規矩，調位，自己嚟啦。」
就係咁，同詩敏嘅短暫相處就完結咗，新位呢…今次到我同詩敏被分開，佢喺走廊位同個男仔坐，個男仔個樣灰到呢…而我就同曉彤坐喺窗口位，其實係咪有乜寓意嘅呢？我前面嘅就係乒乓波隊嘅傻強；一鳴就同Wing喺中間區，隔河斜角位，Wing喺前面…其實點調都無所謂啦，全班人馬對咗成年，會考越嚟越近，應該所有嘢都唔會變。
調完位Miss Lam又走咗去，剩返我哋等中午放學。
彤：「唉，又要同隻兵坐。」
我：「咁唔滿意妳咪又收返隻兵囉。」
放完暑假之後曉彤佢又靚女咗，尤其係啲頭髮，由以前嘅中長過頸屋邨妹look變成齊頸平修微微內彎型，好肯定係要用心處理過先會有呢個shape，加埋前面一個空氣瀏海，如果唔靚女就一定會俾人話蘑菇，但呢件事就肯定唔會發生喺佢身上；佢周邊嘅嘢都靚咗，唔再孭小朋友背囊，而係一個側孭嘅文青款啡皮長方包包，上面有塊牌子鋼牌，不過我就唔多識呢啲嘢喇，睇落係有可能要四位數字嘅；我相信佢只要掛塊牌係背脊話畀人哋知佢係女神相信都無人會反對。
彤：「無啱心水呀，一陣自己隻兵戰力唔夠人哋隻高俾人笑就唔係幾好囉。」
乜料呀？揀男朋友得一個位就話要揀個最好啫，兵呢家嘢又唔使攞嚟見人嘅，唔係多多益善來者不拒嘅咩？不過佢又唔係正統派娘娘，同名校啲標準女神有唔同嘅處理手法都唔出奇。最搞笑係佢用戰力嚟形容啲兵，係當我哋係Pokemon吖…定係數碼暴龍喎…
彤：「點呀，你同詩敏佢暑假有無進展呀？」
我：「無呀，咪又係咁。」
彤：「哈，真係睇到你都覺得辛苦。」
我：「唔係吖，我都唔覺得辛苦，講辛苦嘅話好似一鳴佢重辛苦。」
彤：「係你唔知自己嘅機會成本啫，將追女神啲精力攞嚟溝其他女，可能都已經食咗幾個。」
我：「做乜喎，咁詩敏係特別㗎嘛…而且，係咁食女嘅男仔，妳會覺得佢哋係好人咩？」
其實我真心唔明，睇小說又好，名校啲傳聞又好，真係會有男仔係咁換畫食女，都重會有女仔黐埋去，重要繼續封佢哋做男神，我覺得呢樣嘢好反智，而且唔多啱我；雖然剩講食，係想嘅…
其實女神都反智，好彩詩敏同佢哋唔同。
彤：「唔係喎，擺到明係仆街仔嚟囉。」
我：「咪係囉，我而家咁樣唔係幾好咩？」
彤：「好你個頭，你食屎啦！」
我：「黐線㗎咩…咁都要俾妳鬧。」
都唔知佢發乜神經，追唔追到女神都係我自己嘅事嚟啫…定係佢喺度怪我搶咗佢個friend？因為我知道佢同詩敏而家已經無咁friend，但…我覺得呢樣嘢真係唔關我事㗎喎，妳明知佢死都唔食大家樂，而妳就同其他新friend越食越好，我都未話妳哋搞到我得個睇字。
強：「點呀！你兩隻嘢喺個毒撚後面謦埋啲咁嘅嘢好唔好意思㗎？知唔知乜係禮貌！」
傻強顧名思義係傻嘅，唔靚仔，不過對人其實幾好，直率得嚟又熱血，份人搞笑，一心一意鍾愛打乒乓波…
我：「做乜喎，乒乓波隊入面都好多女仔㗎。」
強：「唔係羽毛球呀！無混雙打㗎！」
我：「唓！學界羽毛球都無混雙㗎！你唔係諗住打場波就可以溝到女呀？唔好話你次次打都抽死佢哋搞到人哋怕咗你，女唔係咁溝㗎！」
都真係荒謬，自己未拍過拖都重可以講大道理，睇嚟女神呢個光環真係幫我加咗唔少戰鬥力。
強：「係都無用啦，打親乒乓波啲女個個都又矮又男仔頭，成堆張怡寧咁…」
我：「吓…唔係呀，張怡寧都幾靚女吖。」
張怡寧打波我當然有睇，比賽嘅時候兇狠到殺人犯咁，但打完攞牌笑嗰陣都幾甜吖，份人又開朗清爽，短頭髮得嚟都唔係差，如果靚少少就會同Wing佢差唔多，雖然Wing佢而家啲頭髮已經留到好長。
強：「咪玩啦！你有羽毛球女神梗係講乜都得，起碼都要福原愛吖，張怡寧真係留返畀你。」
雖然我係女神隻兵，但男仔之間嘅對話都重係戇鳩無下限嘅，曉彤一聽到我哋鳩吹即刻零興趣。
我：「福原愛有乜好，剩係覺得佢讕可愛咋喎。」
強：「不如我哋打下波咯？」
我：「好呀…」
識咗成年當然知佢講乜，我哋將兩張書枱轉做打直拍埋，佢反轉坐然後畀咗塊板我，再放兩個筆袋喺中間。
強：「唔準過界，唔準bat㗎！」
我：「第一日玩咩…開波啦。」
唔好睇少呢啲傻仔乒乓波，當兩個識打嘅人認真起嚟係隨時打到幾十板。
豪：「咁開心做乜唔預埋我？一蚊跟機！」
強：「呢度高手過招，我哋唔想恰你呀。」
豪：「吹呀？我就係鍾意嚟獻醜。」
無人駕駛，大家就係咁瘋狂，無奈嘅曉彤唯有坐喺隔籬睇住我哋兩個細路仔開戰；係呀，我重係好細路仔㗎，最鍾意玩，所以我都未準備好要認真拍拖，有得抽下就已經好開心。
強：「喂！咪話咗唔准抽！」
我：「呢下叫推，唔叫抽。」
一直玩到中午放學。
我：「曉彤，唔一齊行？未返屋企住？」
彤：「係喎，未同你講，我啱啱搬咗屋呀。」
我：「搬咗…去邊呀？」
彤：「我屋企抽到居屋呀，唔係太遠，搭幾個字巴士咁囉。」
我：「咁恭喜晒妳…我送詩敏返屋企先喇。」