只有做愛的時候我才聽得見聲音: （69）

西邊嘅夕陽散發柔和嘅餘暉，映照花園裡嘅一草一木。

喺橙黃色嘅晚霞照耀下，晴晴慘白憔悴嘅臉上仿佛多返少少生氣。

「你睇下，個鹹蛋黃好靚呀。」晴晴拖住Alex，看著黃昏景色，發出讚歎。

「係呀，好靚呀。」Alex望向遠方夕陽話。

「不過我都係鐘意睇日出多啲，揾日我地不如去返上次嗰沙灘，睇多次日出？」晴晴問。



「嗯，好呀，等你好返我地一齊去睇。」

「如果我好唔返，你會唔會揾第二個去睇呀？」

「唔好講呢啲衰嘢啦，你一定會好得返架。」

「哈哈，我隨口講下啫。」

「呢啲嘢點可以隨口講架？」Alex問。



「哈哈，咁當我無講過啦。不過，我發現嗰啲絕症片都唔算呃人，原來有病嗰陣，真係會有人肯一直陪住你。」

「係呀，而你都會好似嗰啲片入面嘅女主角咁，最後一定會好返。」

「其實都唔係個個女主角都好返架，有啲最後都瓜左架。」

聽見晴晴又講啲唔吉利嘅說話，Alex心裡不禁沉左一沉。

佢捉住晴晴雙手，好認真咁講：「唔會架，我知你一定會好返，我地一定可以再去沙灘睇日出。」



晴晴望見對方一個咁肯定嘅表情，笑一笑點點頭話：「嗯，我信我一定會好...」

說話仲未講完，晴晴個肚又忽然作痛…
 
儘管治療強度提升左，但晴晴嘅情況卻一直都未有改善，甚至繼續惡化。

見住晴晴難受痛苦嘅樣，而自己卻無能為力，呢種無力嘅感覺彷如一塊沉重嘅巨石，壓喺Alex身上，令佢喘不過氣。

晴晴啱先打完兩支止痛針，身上嘅痛楚才得以舒緩，依家訓喺床上休息

佢望到坐喺床邊Alex雙眼泛紅，知道對方頭先應該又喊過嚟，呢排對方都陪伴喺自己左右，連屋企都唔返，淨係喺醫院訓，搞到訓得唔好，黑眼圈仲大過熊貓，佢見到都覺得心痛。

「Alex，你成個禮拜都無返屋企，今晚唔好喺度陪我啦，你不如返屋企休息一下啦。」晴晴開聲。

Alex搖搖頭答：「唔得，我要留喺度陪你。」



「呢排你喺醫院訓得又唔好，精神又差，依家塊面有咁大個黑眼圈，你肯定好攰架啦，快啲返屋企好好訓返覺啦。」

「邊係呢？我一啲都唔攰，不知幾精神。」Alex故作精力充沛，但事實的確如晴晴講嘅，呢刻嘅佢身心都十分疲倦。

「聽話啦，我打完針感覺好好多啦，無事架啦，你放心返去休息啦。」

「但係…」

「唔好但係，乖啦，休息完聽日再嚟探我啦。」

「唔好啦，我想留低陪你。」

晴晴見Alex唔肯返去休息，於是就拎起床頭嘅手提電話，打俾何管家：「何管家，Alex話今晚唔留醫院過夜，麻煩你依家過嚟醫院，嚟接一接佢返屋企呀。」



「晴晴...」Alex未反應得切，對方就講完電話收線。

「何管家佢話過緊嚟啦，你今晚就好好咁返屋企休息啦。」

Alex雖然有啲唔願意，但喺晴晴努力說服之下，最後聽話咁返屋企好好訓返一覺。

臨走前，佢地不捨咁goodbye kiss一下。