只有做愛的時候我才聽得見聲音: （68）

晴晴醒左無幾耐，精神狀態仲有啲迷糊，見到Alex攬住自己喊，開頭以為自己發緊夢。

慢慢感覺到對方越攬越實，幾乎令佢抖唔過氣，因而先知原來呢個係現實，並唔係夢。

Alex嘅身軀同流出眼淚都係溫暖嘅，令晴晴個心亦瞬間變暖。

佢諗唔到呢個男人竟然會為自己而流淚。

「哎呀~」突然間，晴晴嗌左一聲。



Alex以為對方又病發，立即鬆開個人， 並好緊張咁問：「點呀？你係咪又痛呀？」

晴晴搖搖頭答話：「唔係呀，係你攬得太用力，我個背脊被你『銀』左一下。」

「原來係咁，對唔住。」Alex鬆一口氣話。

晴晴微微一笑，然後用手輕輕抹走對方眼角嘅淚水，眼定定咁望住對方，心裡面有種講唔出嘅感動。

之後佢地兩個都無出聲，氣氛顯得有啲安靜。



而呢一刻，二人相貼得好近，互相對望住，Alex眼裡只有晴晴，而晴晴眼裡亦只有Alex。

大家個心都跳得好快，塊面都係紅卜卜，喺佢地身邊嘅空氣，飄散著愛嘅感覺。

兩秒之後，Alex用嘴唇主動貼上晴晴嘅嘴唇，錫左對方一啖。

呢次唔係佢地第一次嘴對嘴錫，但同對上兩次唔同嘅係，今次係Alex主動錫埋嚟。

從呢一下親吻之中，晴晴感受到之前兩次未感受過嘅嘢，呢樣嘢就係愛意。



佢合埋眼攬住對方，用親吻回應對方嘅親吻。

「叩叩—」

姑娘敲門行入病房，每日差唔多呢個時候，佢都會幫晴晴探熱。

錫得投入嘅二人聽到敲門聲，知道有人入嚟，就拿拿臨分返開。

「咦？晴晴，你終於醒返啦，但你塊面點解咁紅嘅，唔會係發燒掛？」

姑娘幫晴晴量一下體溫，發現對方體溫正常，跟住佢望到Alex：「你兩個搞咩做一大早塊咁紅嘅，係咪冷氣唔夠呀？」

Alex同晴晴不約而同互望一眼，怕怕醜醜咁相視而笑。

然而，雖然晴晴醒返，但唔代表佢好返。



經過醫生嘅檢查，發現佢嘅情況反而有惡化嘅跡象，需要進一步提升治療嘅密度同強度。

咁亦意味住晴晴將承受更多痛苦同折磨。

喺之後嗰段治療嘅時間，Alex一直都陪伴左右，見住晴晴一日比一日瘦，頭髮一日比一日甩得多，而且仲成日嘔又無胃口食嘢，佢心入面相當相當難受。

儘管如此，但Alex都仍然無時無刻鼓勵同安慰對方，而且每日都坐喺床邊陪晴晴傾計。

佢地咩都傾，傾二人經歷過嘅往事，傾Alex喺英國嘅逸事，又傾晴晴以前打工揾錢嘅苦與樂。

每晚都傾到好夜，其實佢地並唔係想傾到咁夜，只係唔願意合埋眼訓教，因為佢地心入面都好驚，驚合埋眼之後，第二日自己/對方就唔喺度，無得再見。

無人知道上天會出咩牌，所以佢地只可心懷希望作最壞打算。



呢一日，傍晚時分，晴晴喺病房屈到悶，想食嘢又食唔落，突然諗到醫院花園行下，散下步。