只有做愛的時候我才聽得見聲音: （64）

本來Alex喺書房練緊結他，練練下發覺少左塊Pedal，佢醒起之前去比賽嗰陣，佢擺過喺車尾箱度，可能唔記得攞返，跟住佢就出去揾下架車有無。

點知撞見佢行去就車前，就見到Priscilla拎住晴晴送俾佢嘅頭盔，唔知想做咩。

「Priscilla，你喺度做咩呀？」

Priscilla見既然都被對方發現左，唯有拎住頭盔行返入屋解釋。

「你有無搞錯？！你啱先想dum我個頭盔？！」Alex激動到企左起身，帶著責罵嘅語氣對Priscilla講。



「你洗乜咁大聲咁惡呀？你就係一直就係太依賴個頭盔，所以先一直克服唔到恐懼，我咁做都係想幫你，唔通你想成世攬住個死人頭盔咩？！」Priscilla反駁。

「點都好，總之呢個頭盔點都唔可以dum！仲有，我請你以後都唔好掂呢個頭盔！」Alex語氣堅決。

「一個爛鬼頭盔你咁緊張做咩啫？你要我唔掂咪唔掂囉，你估我好想掂呀？個樣又唔係靚，入面內籠仲係穿窿嘅，都唔知你咁緊張做乜？同埋就算我dum左又點，你想繼續戴嘅咪買過第嗰囉，有乜咁大不了？你洗唔洗咁大聲鬧我？」

「家下明明係你唔啱，我話你兩句有咩問題？」

「我係想幫你，其實有咩唔啱？你咁緊張個頭盔，唔通又喺嗰個晴晴送架？」



「……」Alex俾對方講中左，一時間唔知點應。

「你唔出聲就即係俾我講中左啦，原來真係嗰條女送嘅，唔怪得咁緊張啦！」

「係，係晴晴送嘅，但咁又點？」Alex承認。

「你日日當住我呢個女朋友面前，用緊第二個女人送俾你嘅嘢？你覺得咁樣仲無問題？」Priscilla情緒激動，露出憤怒不甘嘅神情：「你根本就對佢有嘢，話同人無關係根本就係講大話，你唔好當我傻先得架？」

「我...我...」Alex想講又唔知講咩好。



Priscilla一手搶過放喺Alex身旁嘅頭盔：「唔洗『我』啦，依家我就俾你揀，一係揀我，一係揀呢個垃圾頭盔，總之一日有我喺度，呢個頭盔都唔可以留低！」
 
一個係自己女朋友，一個只係上左三個月床嘅人所送嘅頭盔，俾你你會點揀？

Alex本以為呢個係一個輕易就可以作出嘅決定，但真要選擇嘅時候，佢卻猶豫。

亦正係喺呢一刻，佢先發覺，自己竟然在乎一件死物多過自己女朋友。

唔係，或者佢在意唔係個頭盔，而送呢樣嘢俾佢嘅嗰個人。

「咁都要諗？咁都揀唔落手？」Priscilla問。

Alex猶豫左幾分鐘，最後伸手從Priscilla手上攞返嗰一個黑色嘅頭盔，嘴裡抱歉一句：「對唔住，如果你真係逼我揀，咁我只好揀呢個。」

Priscilla錯愕左幾秒，然後嬲到爆咁話：「Alex 你好嘢！寧願要個爛鬼頭盔都唔揀我！好！我依家就走，我走左之後你唔好後悔呀！」



對方轉身就走，Alex望住對方離開嘅背影，無作挽留。

一直以嚟，佢都未認真理清過佢心入面對晴晴嘅感覺，而就喺Priscilla剛才逼佢揀嗰刻，佢望住個頭盔，腦海突然回憶返佢同晴晴所有嘅經歷，由第一日見面到最後一日分別，所有一點一滴都浮現眼前。

嗰一瞬間，佢淨係想從Priscilla手上攞返屬於佢同晴晴嘅嘢。

佢一直都以為自己仲係七年前嗰一個迷戀Priscilla嘅Alex，原來已經唔係，原來佢個心早就變左，而佢卻一直都無發覺。

如果唔係Priscilla死都要逼佢揀，可能佢都唔會覺悟到，原來自己心入面鐘意嘅係另有其人。

佢拎住個頭盔，坐喺床邊，心裡怪責自己點解咁後知後覺，點解咁遲先發現到自己真正嘅心意，如果早啲發現嘅話，咁佢就唔會同晴晴解約，亦唔會俾晴晴走。

更唔會同Priscilla一齊，咁就唔洗浪費大家咁多時間，就唔洗傷害左對方。



Alex，你反應真係太慢啦...

「叩叩—」

何管家敲敲門，行入間房問：「少爺，今日你洗唔洗煮飯，定係你又同Priscilla出去食？」

Alex回過神來，答：「唔洗啦，Priscilla已經走左，應該都唔會再返嚟，今晚得我同你食。」

「哦，明白，咁我預煮少啲米。」

「嗯，辛苦你啦。」

何管家正要轉身離開，Alex又叫停佢話：「係啦，何管家，你係咪仲保留住，之前晴晴發過嚟嘅嗰啲個人資料呀？」

「嗯？你講當時我地招聘所收集嘅資料？」



「係呀，你仲有無keep呀？」

「都幾個月前啦，我唔知有無刪除左，我陣間揾下。」

「唔洗啦，我自己開電腦揾下。」

當時招聘合約床伴嘅時候，每個女仔都被要求send自己個人資料嚟，上面會寫上詳細住址、職業等等資料。

Alex想揾返晴晴嗰一份出嚟。

既然打電話唔通，咁要試下去對方屋企甚至係工作嘅地方揾。

佢想知點解對方突然無左消息。



想搞清楚佳瑩所講嘅「晴晴、一百萬」係咩一回事。

仲有，想再見對方一面。