只有做愛的時候我才聽得見聲音: （63）

二人出到港島，未去到餐廳，架車就唔知咩事突然間死火。

無奈之下，佢地被迫將要架車停喺路邊，停嘅位置咁啱就喺醫院門口附近。

佢地落車檢查下部車係發生左咩故障。

同一時候，喺醫院探望完晴晴嘅佳瑩行出嚟門口，佢離遠見到Alex。

佢地淨係見過一次面，但佢都認得出對方。



「請問你係咪Alex？請問方唔方便講兩句？」佳瑩主動行到Alex面前。

Alex打量左佳瑩好一陣，先醒起佢係晴晴嘅朋友，之前一齊搭過檯食過飯。

「係，我係Alex，如果我無記錯，你係晴晴嘅朋友？」

「我有嘢想揾你傾下，係關於晴晴嘅事。」

「關於晴晴嘅事，晴晴佢有咩…」Alex說話講到一半就被打斷。



「Alex，你快過嚟幫手睇下，係咪舊電出左事？」Priscilla揭開車頭蓋，叫Alex行埋嚟一齊下check部車有咩問題。

「唔好意思，我地架車死左火，依家可能唔太方便…」

「喂呀，Alex唔好棟喺度，快過嚟幫下手！」

「你可唔可以借一百萬俾晴晴醫病？」佳瑩直接開口問。

兩把聲音重疊埋一齊。



Priscilla把聲大啲，行過嚟拍一拍Alex膊頭，聲音遮蓋左佳瑩嘅聲，令Alex聽得唔清楚，淨係聽到晴晴同一百萬呢兩隻字。

跟住Alex就被Priscilla拉走去搞部車，想問多句都唔得。

佳瑩見佢地搞緊架車，都唔好意思繼續打擾，唯有轉身離開。

二人檢查左部車一輪，，發現無得搞，只可以call人嚟拖車。

Alex望一望周圍，發現晴晴嘅朋友已經走左。

佢喺度諗：晴晴？一百萬？啱先究竟對方講左咩呢？
 
佢地本來訂左7點，點知途中遇上架車死火，搞到成九點幾先有飯食。

「唉，真係黑仔，無端端架車死火都有嘅。」Priscilla話。



「係呀，真係黑仔。」Alex附和。

「你頭先做咩同個問路嘅傾咁耐，都唔過嚟幫手呀？」Priscilla埋怨。

「啱先嗰個係識得嘅，唔係過嚟問路，同埋我連車都唔識揸，想幫都幫唔到手啦。」

「識得嘅？係邊個嚟架？」

「佢係晴晴嘅朋友。」

「咁佢同你講咩？」

「佢有啲關於晴晴嘅事想同我講，但我無聽得清。」Alex答。



「其實，嗰個晴晴係邊個嚟架啫？之前見佢成日跟喺你身邊，你地其實係咩關係？」Priscilla問。

Alex諗左一陣先答話：「無咩關係。」

「無關係你又成日WhatsApp人？」

聽到呢句，Alex眉頭一皺，用懷疑嘅眼神望對方一眼。

「拿，你唔好用咁嘅樣望住我，我無偷睇呀，係你自己成日拎部電話出嚟check，我有幾次唔覺意睇到咋。」

「你放心，我同佢真係無關係。」

「真係無關係？如果真係無關係，咁你del左佢個contact啦咁。」Priscilla對住Alex講。

「下？點解要del」



「無關係你仲留住人地個contact做咩，del左都無所謂架。」

「……」Alex一時無言，感到為難。

「哈哈，講笑啫，講下你又信，我點會咁霸道要你del走電話啲contact呢？」Priscilla發出哈哈哈嘅笑聲。

Alex就覺得對方笑得牽強，好似喺度扮唔介意咁。

佢猶豫左成餐飯，最後決定將晴晴嘅聯絡電話同過往通訊記錄刪除，因為佢唔想女朋友為此介懷。

佢打開電話，揾出晴晴嘅電話號碼同對話記錄，然後按下刪除鍵。

一秒後，畫面就得返一片空白。



「你睇下，我del曬左啦。」Alex展示電話屏幕。

「哇，乜你真係delete左呀？！」Priscilla又展露笑容，而呢一下笑容係自然流露。

為左佢地呢段關係，Alex唔介意包容同迎合對方。

佢一直覺得呢啲都係愛嘅表現，直到有一日佢先發現，原來佢啲所謂嘅包容同理解並唔係出於愛，而只係對方未觸及到心底最在意嘅嘢。

Priscilla一直想Alex消除驚搭車嘅心理陰影，佢覺得Alex就係太依賴個頭盔，一直喺度逃避，所以先無法正視從而克服心入面恐懼。

呢一日，佢想趁Alex唔注意偷偷掉走個頭盔，不過卻俾對方無意中撞破左。