只有做愛的時候我才聽得見聲音: （48）

蒼白嘅白燈，長長嘅走廊，以及反光嘅地板，醫院總係俾人一種冰冷嘅感覺。

醫生拎住檢驗報告，將結果當面同晴晴講一次。

「林小姐，呢份係你嘅檢驗報告，你患嘅係一種罕見嘅遺傳病，病症同胰髒癌差唔多，主要係肚痛、腹瀉、背痛等等，唔同嘅係，你呢個病惡化嘅速度可以好快，唔盡快接受治療嘅話，惡化起嚟隨時一日內就令你器官衰竭致死，同埋醫治方法暫時得…」

「電療同化療，而且醫藥費好貴，死亡率亦都高，啱唔啱？」晴晴面對噩耗，表現卻異常冷靜。

佢有預計過呢一日會嚟，只係無諗到嚟到咁快。



正如醫生所講，呢個病係遺傳病，遺傳率約莫40%，十年前佢阿媽就係因為呢個病而去世。

（作唔到咩病，只能用「呢個病」概括）

醫生點點頭話：「因為用對付呢隻病嘅藥大多數都從歐美進口，而且某幾款藥仲係得一間藥廠生產，所以醫藥費相對會貴少少，至於死亡率方面，近年算係回落左，隨住啲藥同醫療設備改進左，病人治愈率有所提升，數據顯示三成病人接受兩個階段治療後痊愈，我地呢度試過有一個病人做左一個階段嘅電療同化療就好返，不過當然，亦都有人捱唔到一個療程就去世。」

「……」晴晴無出聲，唔知講咩好，佢望住份報告，眼神之中流露出哀傷。

「林小姐，我建議你最好就盡快入院接受治療…」



「咁第一個階段療程嘅醫藥費大概係幾多錢？」晴晴未等醫生講完，就心急提問。

「醫藥費連埋住院費，第一階段嘅療程大概要一百一十萬。」

一百一十萬？晴晴喺心入面，即刻開始計算自己依家全副身家有幾多。

佢十六歲開始做兼職，讀完中學直接出嚟做嘢，一個人打幾份工，平時又慳住咁洗，用左六年時間，銀行戶口都儲到九十萬。

再加埋佢做左兩個幾月合約情人同埋一個月嘅全職工人，呢度加埋有一百零六萬左右，如果計埋呢個月嗰九萬同café嘅人工，都算叫做湊得夠筆錢。



佢一直好驚有一日自己病發，更加驚有病無錢醫，因此要不停咁揾錢、揾錢。

只不過儲左咁耐，筆錢原來只係夠俾一個階段嘅療程，假如佢無好似啱先醫生舉例嘅病人咁，可以一個療程就好返，咁佢就算想繼續醫病，都無錢再醫。

當年佢阿媽訓左醫院大半年，洗左接近二百幾萬，但結果都無法戰勝病魔，離開人世。

晴晴就諗，唔知自己又可以捱到幾耐？

「醫生，我諗我要等多一個禮拜先入得院，我有啲私人嘢想處理一下。」晴晴想用多一個星期時間，湊夠曬嗰筆醫藥費。

「嗯，我明白，既然係咁，我可以開啲止痛藥俾你食住先，不過作為醫生，我建議你都係盡快入院治療。」

「知啦，醫生。」

晴晴喺醫生面前一直表現得冷靜，直至行出醫生房門後，佢就再都無法按捺心入面嘅悲傷同絕望，終於忍唔住放聲大哭，透明淚珠不停從眼角流出來。



佢只得二十二歲，仲有好多嘢未做，仲未嚟得切好好見識過呢個世界，甚至連日本都未去過，佢唔甘心，佢唔甘心要喺自己正值最美好年華嘅時候死去。

眼淚如決堤般湧出嚟，佢一個人坐喺醫院走廊長凳上，喊左好耐好耐，喊到眼淚枯乾，雙眼腫曬。

喊到無力，佢抹乾眼淚，將被眼淚沾濕嘅檢驗報告放入手袋，拖住沉重嘅步伐行出醫院門口。
 
咁啱Alex由醫院門口行緊入嚟，二人擦肩而過。

Alex睄到晴晴，但晴晴dup低頭，無留意到Alex，就咁掂行點過。

短短擦肩一瞬間，Alex睄到晴晴雙眼通紅，好似喊過嚟咁。

身旁嘅何管家見Alex突然停低，用手語問：「少爺，做咩停低？」



「我啱先好似見到晴晴。」Alex唔確定自己係咪真係見到晴晴，回頭望一望嗰個漸行漸遠背影，想望真啲睇下。

「仆街，你條友唔行就咪撚擋路啦！趕住割痔瘡架嘛！」突然，一個中年男人盲盅盅撞開Alex，搞到Alex差啲企唔穩仆低。

到再回過頭來，嗰個背影已經唔見左，Alex想揾都揾唔返。