只有做愛的時候我才聽得見聲音: （47）

「你做埋啲奇怪動作，想測試啲咩？」Alex用電話問。

「無咩呀，見無聊郁動下啲手腳啫。」晴晴回答。

「我發覺你今日有啲唔尋常。」

「唔係呀，我咪同平時一樣，邊有唔尋常？」

「係有少少唔同，不過話時話，你個肚仲有無痛，你睇左醫生未？」Alex問。



「未呀，打算呢兩日去睇。」

「呢啲嘢可大可少，真係要check清楚穩陣啲。」

「知啦，不過你做咩突然咁關心我呀？」

「邊有，我都係多口問句，唔好自作多情。」Alex答話，雖則把口係咁講，但心入面或多或少係出於關心。

晴晴諗左一諗，問：「假設我真係有咩事，唔能夠再做你嘅合約床伴，咁你係咪會揾第二個人代替我？」



「係呀，你做咩無啦啦講啲咁嘅嘢？你想自己有事呀？」

「唔係，都係假設下啫。」

晴晴雖然只係隨口問下，但見對方答會揾人代替自己時，個心都「銀」左一下，感到唔開心。

原來喺對方心目中，自己係一個隨時可替換嘅合約情人。

然而佢應該都好明白，佢同Alex嘅關係只停留於合約之上，當合約一完，佢就要走，佢地關係就會結束。



既然如此，佢鐘唔鐘意Alex或者已經變得唔重要，因為自己喺對方心目中並唔重要。
 
返到屋企，晴晴攤喺床上，呆望住天花板，心裡仍為Alex剛才嘅說話而在意，成晚都輾轉反側，訓得唔太好。

佢唔知點解自己咁在意，佢同Alex嘅關係本來就只建基於合同之上，除此以外佢地就無任何瓜葛，就算Alex無啦啦想換人，只要賠足錢就可以中止合約換人，呢點佢一直都好清楚，仲有就係，自己明明成世人最在意嘅就得錢，只要有錢收，又何必在意自己喺對方心目中重唔重要。

係囉，何必呢？

「鈴鈴鈴—」

一大早，電話鬧鐘喚醒睡夢中嘅晴晴。

起身後，佢打去café攞左半日假，去醫院做檢查。

個檢查結果無咁快出，醫生話要等一個星期左右。



今日咖啡店無乜客，晴晴棟喺度發呆，心入面仲諗緊琴晚嘅事。

「喂！」佳瑩突然喺佢耳邊嗌一聲。

「嚇死人咩你？」晴晴嚇左一跳。

「諗嘢諗到入曬神咁，諗緊咩呀？」

「無諗嘢呀，發下吽哣啫。」

「答無即係又諗緊個有錢仔啦，見唔到人就掛住人？咁即係鐘意左人啦！」佳瑩看穿晴晴嘅心思。

「無呀，我邊有掛住佢？」晴晴否認，但塊面變得紅卜卜。



「唔洗唔認啦，係鐘意人就主動啲溝佢啦，話曬都係有錢仔，好多人爭架，趁你依家近水樓台，要溝就快手啦。」

「近水樓台都唔代表咩啫，感情嘅嘢又唔係話你日日見，日日對住就可以喺埋一齊，同埋我都話唔鐘意佢，唔好再屈我。」

「OKOK，我封口唔講，不過有時有啲嘢呃到人呃唔到自己，你係咪鐘意佢，我諗你個心好清楚啦。」佳瑩講完就用手掩住自己把口，表示唔亂講嘢。

「唔好講嘢啦，有客人入嚟，做嘢啦，費事陣間老細又過嚟鬧人。」晴晴轉身行去招呼客人。

佢覺得佳瑩講得唔啱，真係要呃嘅話，點會呃唔到自己。

佢諗起之前教過Alex用嘅心理暗示方法，心裡一直默念「唔好再諗Alex」，「唔好再諗Alex。」

一得閒就默念呢句說話，直到收工搭車去清水灣，佢都仲念緊，不過發覺無乜用。

越叫自己唔好諗，就越係會諗。



佢懷疑呢啲心理暗示係咪呃人，點解好似一啲用都無。

Alex覺得今日嘅晴晴都係唔尋常，琴日對方就做埋奇怪手勢動作，至於今日入到嚟，就粒聲唔出，明明平時就好多嘢講。

而喺做完愛之後，晴晴都係靜靜地唔出聲，於是佢就問：「你做咩今日唔出聲嘅？」

「無咩嘢想講咪唔講。」晴晴一路都做緊心理暗示，因此無乜特別講嘢。

「咁你做左檢查未？」Alex繼續問。

「做左啦，醫生可能要等一個禮拜先有結果。」晴晴輸入文字回答。

一問一答完，二人就靜左無交流，氣氛沉默得有啲尷尬。



跟住Alex電話喺度震，又試收到Priscilla嘅短訊。

對方又嚟問佢出唔出去聚舊。

晴晴睄到Alex同Priscilla通短訊，偷望左一眼就無望落去，因為佢覺得自己係時候要抽離，唔可以再在意Alex嘅一舉一動。

佢拎返手袋，向對方揮手示意再見，便轉身離開房間。

Alex感到奇怪，平日晴晴一定會八卦佢同邊個send message，但今日竟然無，而且一做完愛就走人，呢點都同平時好唔同。

接住嗰一個禮拜，晴晴為左將自己嘅情感抽離返出嚟，除左同Alex上床之外，都盡量同對方少交流少接觸。

同埋當佢一諗起對方時，就會心理暗示同自己講「唔好再諗」，只但係效果始終麻麻。

然而，等左一個禮拜，佢嘅檢查結果已經出左。

呢日，醫生打俾佢。

「你好，呢度係醫院打嚟，請問係咪林若晴小姐？」

「我係呀，請問係咪個檢查有結果啦？」

「無錯，林小姐，你嘅檢測結果已經出左，請問你今日下晝得唔得閒，可唔可以過嚟聽報告？」

「好呀，我請假過嚟呀，但個結果可唔可以先透露一下？」

「呢樣我諗你要有個心理準備……」