只有做愛的時候我才聽得見聲音: （21）

「叮噹！」

佢準時九點鐘到達，按一下門鐘。

平時何管家好快就會出嚟開門，但今日等左一分鐘都未有人開門。

佢再㩒一下門鐘，又等多一分鐘，先有人開門，不過開門嘅唔係何管家，而係Alex親自開門。

「點解係你開門嘅？何管家呢？」晴晴展示電話問。



Alex用責怪嘅眼神望住晴晴，然後回覆：「一日最衰都係你。」

晴晴覺得莫名其妙，心諗點解無端端咁話我。

佢行到客廳，見到何管家坐住輪椅，右腳打上石膏。

晴晴感到愕然，問：「何管家，點解你搞成咁嘅？」

「琴晚我屙夜尿，一行入廁所突然豆豆就標出嚟，我大嚇左一跳，嚇到企唔穩仆親，我呢啲老人家跌一跌咁就跌斷左隻右腳。」



「原來你整親隻左腳，唔怪得係Alex開門俾我啦。咁點解Alex話最衰係我，關我咩事？」晴晴不解。

呢個問題何管家交返俾Alex作答，佢將晴晴呢番說話，用手語翻譯俾一旁嘅Alex聽。

「一日最衰係你帶隻貓返嚟，如果唔係隻貓喺度，何管家就唔會仆親！」Alex將責任推落晴晴身上。

「咁你都有得賴？有無搞錯呀！」

「總之何管家係因為你帶左隻貓返嚟而整親，導致左我家陣無管家用，因此你要負全責，你要留喺度頂替何管家嘅工作。」Alex一口氣打左好多字。



「要我做阿四？你俾錢咪我幫你做囉！」晴晴衝口而出。

本來呢個鐘數，二人應該喺房入面做緊床上運動，但依家卻因呢件事而爭論起上嚟。
 
「…何管家跌親係意外，你咁都賴落我度？」 晴晴同坐喺對面梳化嘅Alex理論。

佢兩個嘅電話都無電，一個直接開聲講，一個就用手語，由旁邊嘅何管家為二人翻譯轉述。

Alex用手語回應，何管家轉述話：「少爺佢話係你帶貓仔返嚟，而貓仔唔聽話到處走導致意外發生，因此你要負全責。」

「咁你講曬啦，明明都唔關我事...」晴晴扁起嘴，感到委屈。

何管家繼續翻譯Alex嘅手語：「少爺話希望你喺我休養嘅呢段時間，頂替我嘅工作以作補償。」

「你知我日頭要返café，根本無時間過嚟做阿四，就算做，我都要收返錢，無理由白做咁蝕底囉。」



Alex早就預左晴晴唔會咁順攤，同埋其實佢都唔係好信得過晴晴。

佢覺得晴晴係嗰啲姐手姐腳，平時連家務都唔識做嘅死𡃁妹，只係臨時臨急唔知邊度去揾替工，咁唯有揾晴晴暫時頂替下。

佢知對方無錢收肯定唔會做，就開價八百蚊一日當報酬。

「八百蚊？等我計一計...」晴晴暗自盤算一陣，然後對Alex講，「好似有啲少，不如兩千蚊一日？」

Alex還價一千，晴晴索價千八，之後雙方討價還價一輪。

最後結果，晴晴接受左日薪一千四百五十蚊嘅開價，應承臨時頂替何管家嘅工作，負責照顧Alex日常起居飲食，為期一個月。

何管家右腳骨折，慶幸情況唔算太嚴重，醫生建議只要好好休養，一個月後就可復工。



晴晴計過度過，喺度做工人，人工高過返女僕咖啡店，所以決定將咖啡店份工轉做兼職，接住落嚟一個月就全職做個「真女僕」。