只有做愛的時候我才聽得見聲音: （22）

一開始何管家先教佢同解釋一次佢每日要做嘅嘢。

「少爺每日八點準時起身，刷完牙洗完面大約八點二就落飯廳食早餐。我就建議你呢，最遲朝早七點半就要過到呢邊，煮定早餐俾佢。」何管家推住輪椅，帶晴晴入廚房講解。

「七點半要過到嚟，咁我咪六點半鐘就要起身？不如我直接喺度住咁仲方便。」

「唔得啦，少爺唔鐘意多個人住喺度，所以呢段時間辛苦你啦。」

「唓~」



「呢度有張早餐餐單，上面都係啲好簡單嘅中西式早餐，我諗你應該識煮嘅。」何管家展示一張餐單。

清單上面寫住都係麥皮、公仔麵、通粉、三文治之類嘅普通嘢，煮呢啲對晴晴嚟講無難度。

「少爺食完早餐，就會落地庫做gym，呢段時間你就洗左碗碟，全屋吸一次塵，抹下啲地方咁，而晏晝嗰餐你可以唔煮，少爺一般鐘意去高爾夫球會食，同埋你識揸車架何？」

晴晴點點頭：「識呀，我有車牌。」

「咁就好啦，少爺平時鐘意去球會打下golf，有時需要你車出車入。」



「原來Alex鐘意打golf，除此之外佢平時仲有咩細藝？」晴晴問。

「出下海釣下魚啊，平時係我揸船嘅，咁依家我傷左揸唔到，就應該就無得去啦。」

「釣魚聽落有啲無聊喎，仲有呢？」

「無啦，平時留喺屋企嗰陣，少爺鐘意睇下書、睇下Netflix、打下機咁囉。」何管家答。

「聽落都係有啲悶，如果換轉係我有錢唔洗返工，肯定日日出去周圍去玩，最好環遊世界，去到邊玩到邊，咁先係享受人生架嘛。」



「其實以前少爺讀書嗰陣都好活躍架，最鐘意同啲朋友夾band、彈結他，又成日出去表演，只係自從對耳仔聽唔到嘢後，佢就變得有啲收埋自己。」

「唔怪得之啦，我見佢間房有支結他，原來佢以前夾band嘅。咁話時話，其實Alex對耳仔點解會聾左嘅？」

「唉~七年前發生左一場車禍，導致到少爺聽覺嚴重受損，變到完全聽唔到嘢。我記得車禍嗰日係父親節，佢同老爺、夫人，亦即係少爺嘅阿爸阿媽出去食飯慶祝，原本一家人係開開心心，無估到回程路上佢地不幸遇上個醉酒佬司機。嗰條友揸架車迎頭同佢地部車相撞，少爺雖然聾左但都救得返，至於老爺同太太，仲有我地原本嘅司機，全都不幸離世。」何管家臉上浮現傷感嘅神情。

「估唔到Alex有咁悲慘嘅經歷。」晴晴同情Alex嘅遭遇。

「唔好講呢啲啦，跟我過嚟，等我教埋你用我地部洗衣機…...」

何管家交代好曬啲嘢，晴晴都明白曬，第二日就正式返工。
 
琴晚晴晴臨訓前較左兩個鬧鐘，今朝未夠六點半起左身。

本來以為七點半左右就可以去到清水灣，點知上到巴士自己眼訓得滯，唔覺意訓著左，坐過左站，搞到成九點都未去到。



而八點就起左身嘅Alex，對住空空如也嘅飯檯，餓住個肚等待晴晴出現。

見豆豆喺檯底食貓糧食到lam lam脷，自己就仲未有早餐食，佢開始有啲後悔搵左晴晴做替工，心諗嗰條友睇嚟都係靠唔住，早知登廣告認認真真請個臨時工好過。

佢叫何管家打俾晴晴，啱接通電話，對方就剛好出現眼前。

平時返Café扮女僕，就要化曬妝著曬女僕衫，當家下真係做女僕，晴晴只係求其著牛仔褲同T-shirt，連少少妝都無化。

現實同幻想始終都係有分別嘅。

晴晴九點三到，一嚟到就馬上入廚房煮野。

到左九點半，只係用左十五分鐘就煮好曬拎出嚟，唔單止係一人份量，連何管家同自己嗰份都煮埋。



呢個效率令Alex同何管家感到有點詫異。

晴晴同何管家一人一份麥皮同三文治，Alex嗰份就豐富啲，有火腿煎雙蛋，沙嗲牛肉公仔麵加杯蔬果汁。

見晴晴咁快手就煮好，Alex以為對方求其hea整，但係放入口食落去，佢又發現又唔係太差，食得出係認真煮嘅。

而喺做家務方面，晴晴都做得有板有眼。

吸塵、掃地、抹檯抹凳呢啲做得妥妥當當，乾淨又快手，完全唔係Alex所諗嘅「姐手姐腳，連家務都唔識做」嘅死𡃁妹。