只有做愛的時候我才聽得見聲音: （20）

滿足嘅Alex攤喺床上稍作休息，訓喺佢隔離嘅晴晴開聲問：「Alex，我地不如幫貓仔改個名，你話叫佢豆豆好唔好呀？」

晴晴知道每次Alex射完後嗰二十幾三十秒內都聽到啲聲，所以直接開口問。

「是但你…我無意見…」話音剛落，Alex嘅聽覺就徹底變返0%。

「是但咁即係好啦，咁貓貓以後就叫豆豆啦，哈哈！」

晴晴隨即著返衫，落到客廳撩豆豆玩多一陣先走。



呢段時間佢日頭返女僕咖啡店，夜晚收工又要由九龍趕嚟清水灣，之後又要搭車出返九龍返屋企，差唔多日日係都兩邊頻撲，搞到自己身心疲倦。

不過幾攰都好，一有得同豆豆玩佢就馬上精神返曬，開心返曬。

睇嚟養寵物可以治愈人心。

佢留到差唔多十二點半先捨得同豆豆講再見，再晏嘅話就無車返出九龍。

搭成個幾鐘頭車佢先返到屋企，沖完個涼，差唔多成兩點先訓，第二日返工無精神，結果俾老細「炸形」。



「頂你個肺，你有無搞錯呀？呢排日日返工都恰眼訓，你係晚晚蒲天光定係去做賊嚟呀？」咖啡店老細語帶責備。

晴晴打一個喊露，回答：「我無恰眼訓呀，只係見無乜客先閉目養神...」

「我閉你個死人頭！見無咩客你就入廚房幫手！唔好棟喺度烏眉恰睡！」

「哦…知啦…」晴晴又打一個喊露。

「晴晴，嗰邊有客人話想你過去。」佳瑩行埋嚟指一指遠處，近窗位置坐左一個中等身形，帶住黑框眼鏡，相貌普通嘅男客人。



「揾我？」

「係呀，我見條友拎住扎花又有朱古力，睇嚟係要同你表白。」

「唔係掛？」

「我睇就係，你睇下，條友又望住你，快過去啦。」佳瑩催促。

晴晴慢慢行到嗰位男客人面前，禮貌咁問：「請問呢位客人有咩吩咐呢？」

個男客人拎住扎紅色嘅玫瑰花同朱古力，當眾單膝下跪：「晴晴，我鐘意你，你可唔可以做我女朋友呀？」

情況就如佳瑩所料，呢個男人真係嚟表白，而類似嘅情況都唔係第一次發生。

話曬佢地都算係女僕咖啡店嘅生招牌，深得客人歡心，間唔中有啲特別迷戀佢地嘅客人同佢地表白，其實都好正常。


 
「多謝你扎花，但我唔會接受你嘅表白。」晴晴直接拒絕，同時表情變得嚴肅。

「下？點解呀？你嫌棄我唔夠靚仔呀？」

「唔係。實不相瞞，其實我有絕症，隨時都可能會死，所以…」

「唔緊要架，我可以陪你度過最後快樂嘅時光，我會好好對你架！求你俾個機會我啦！」個男客人講嘢嗰陣，周不時都望向晴晴個胸。

「雖然機會好微，但如果你俾三百萬我醫病，我有可能唔洗死，唔知你願唔願意呢？」

「Er…三百萬…我...er…呢層…」男客人猶豫不答。

「你嘅答案我明架啦，其實呢位客人，你條件都唔差，你值得揾一個比我更好嘅女仔。」晴晴扶起個男客人，然後話：「啱先你點左兩杯latte，加埋承惠一百零六蚊，多謝。」



該名男客人望一望張單，再𥄫一𥄫晴晴個胸，放低一百零六蚊，心有不甘細細聲講左句：「頂！竟然咁都衰左，早知就揾佳瑩表白。」

講完佢就離開咖啡店。

「犀利喎！你扮有絕症呢招次次都使得，次次都嚇走曬啲人。」佳瑩讚歎。

「哈哈，小意思啫。」

「喂！你兩個仲傾計？出面無嘢做就入廚房幫手洗碗啦！傾傾傾，唔洗做呀？！」老細大聲訓斥二人。

「哦...知啦...」二人低聲下氣回答。

踏正夜晚八點，對住個難頂老細做左一日嘢，晴晴終於都有得收工。

只但係佢仲未有得抖，佢仲要入清水灣同Alex啪啪啪。



佢攰到一上車就恰著左，訓到打埋鼻鼾，好彩無訓過籠坐過站。