只有做愛的時候我才聽得見聲音: （16）

夜色漸深。

暗黃街燈映照公園角落。

Alex發左短訊叫何管家到上環一個公園仔接佢。

佢同晴晴坐喺公園長凳度，等待何管家出現。

二人沉默無言。



女嘅平時多嘢講，不過頭先重遇返自己個仆街老豆，搞到無曬心機唔想講嘢，男嘅就不嬲唔講嘢，呢刻腦海就回想緊剛才同Priscilla重遇嘅畫面。

...

...

...

「喵~」



忽然傳來一聲貓叫打破安靜嘅氣氛。

二人低頭一望，見到腳邊有一隻受傷嘅小貓，舔緊地下無肉嘅魚骨。

「喵~」
 
晴晴踎低個身，溫柔地撫摸貓仔身上嘅橙毛：「貓仔，你隻腳受左傷？唔怪得你不停咁叫啦。」

「喵~~~喵~~~喵~~~」小貓左邊後腿滲血，可能係俾路邊草叢嘅玻璃碎「界」親。



晴晴拎頭先打包嘅意粉同蒜蓉麵包來餵小貓，然後用電話問Alex點算好。

「隻貓仔受左傷，不如我地帶佢去睇獸醫？」晴晴問。

「呢個鐘數啲鋪頭閂曬門啦。」Alex回應。

「咁點算好呀？」

「由佢，唔好理。」

「點得架？一隻貓仔受左傷喺條街度，咁好危險架，不如帶返去你屋企，我地用啲紗布藥水幫佢包紮？」

「要帶就帶返你屋企。」

「我住嗰度唔俾養寵物，帶佢返你屋企啦，佢個傷口好似唔深，我地幫佢包紮應該好快無事。」晴晴快速打字。



「你想幫咪帶佢返去你自己屋企。」Alex立場不變。

「有無搞錯呀！一啲同理心、同情心都無！鐵石心腸，見死不救，正一衰人！」呢句晴晴無用文字打出嚟，佢「蝦」Alex聽唔到嘢，直接喺對方面前講壞話。

Alex見到晴晴口噏噏，好似鬧緊自己咁，就用電話問：「你講緊咩？」

「我話我決定帶貓仔返我屋企。」晴晴打完呢句就抱起貓仔。

大約過左五分鐘，何管家開車駛到公園門口嚟接佢地。

晴晴抱住貓仔大步行上車，Alex跟隨其後上車。

「晴晴，你做咩抱隻貓上車？」何管家問。



「隻貓仔受左傷，佢好可憐呀，你少爺Alex見隻貓仔咁可憐，咪叫我帶埋佢上車，然後送佢返屋企」

「返邊個屋企？」何管家問。

「梗係你少爺嗰個望到海嘅屋企啦。」

「真係？等我問下少爺先？」何管家有啲半信半疑，想問准坐喺後座嘅Alex。

「唔洗問啦，佢真係咁講架，我地返到清水灣先啦。」晴晴催促何管家開車。

「真係？」

「係呀！」晴晴語氣肯定咁回答。

最後何管家信左晴晴嘅說話，開車返清水灣。



至於坐喺後座嘅Alex，一上車就戴左個電單車頭盔。

佢面前塊擋風鏡有啲濛，因此佢無留意到何管家同晴晴嘅交談，之後開左車無耐佢仲洽著左。

佢本來以為何管家送左晴晴返屋企先，點知訓醒打開眼，發現晴晴竟然帶埋隻貓仔跟左佢返屋企。

晴晴一落車就即刻抱貓仔入屋，Alex想反應都反應唔切，佢用手語問何管家點解隻貓同晴晴會跟左返嚟。

何管家就將晴晴喺車上講嘅嘢用手語複述一次。

Alex得知晴晴出蠱惑，條氣好唔順，就去揾對方理論。

晴晴都知自己理虧，於是動用左一啲小聰明。



Alex行入屋，見到晴晴匿左喺飯廳，佢行過拍一拍晴晴膊頭。

殊不知，晴晴一擰轉身，雙手血淋淋，左手沾滿血嘅手掌拎住電話，屏幕上展示一行字：「貓仔隻腳流左好多血，你再唔揾紗布幫佢止血，佢可能會死架！」

Alex聞到晴晴手上傳來酸酸甜甜嘅味道，一睇就估到對方用番茄醬扮血，想扮慘嚟氹佢收養隻貓。

「嗚嗚...貓仔...嗚嗚....真係好需要人幫同照顧架...嗚嗚...」晴晴帶住哭腔講。

佢想扮喊，可惜卻擠不出眼淚，啲戲屎到一眼就睇穿。

Alex原本好嬲，但又見晴晴搞場大龍鳳想佢收留隻貓，仲喺錯漏百出嗰種，想嬲但又好想笑。

「嗚嗚—」晴晴頭dup dup，仲扮緊喊。

Alex係心入面歎左口氣，佢真係頂呢個女人唔順，心諗如果佢咁都唔應承，對方肯定唔知出咩招數死纏爛打。

既然係咁，不如都係順下佢意算，雖然佢唔無養過寵物，但屋企咁大，佢諗多一隻貓應該問題不大嘅。

佢叫何管家過嚟幫晴晴同隻貓止血同包紮傷口。

「你肯收留隻貓啦？」晴晴用電話打字問，臉上表情隨即一百八十度轉變。

「隻貓一好返我就馬上送佢走。」打完呢句，Alex就獨自返上房抹黑膠。

晴晴今日嚟m，所以無上房同Alex搞嘢。佢幫貓仔包紮完，等到隻貓訓左佢就離開。