只有做愛的時候我才聽得見聲音: （15）
跑左幾個街口，左穿右插又左閃右避之下，佢地好唔容易先走得甩。
二人跑到隻狗咁，氣來氣喘，匿喺一條巷仔抖左好耐先抖得返順條氣。
等再三確認過嗰兩條差佬真係走左，佢地先敢行出巷仔。
頭先佢地見路就跑，完全無睇方向，結果跑到嚟中上環嘅酒吧區。
「啱先係咪好刺激？」晴晴喺電話打左呢幾隻字，一邊行一邊遞俾Alex睇。
「一啲都唔刺激！啱先究竟發生咩事，嗰個男人係邊個？你點解要打爛佢架車？」Alex遞返電話俾晴晴。
「嗰個男人係我個仆街老豆！」晴晴喺「仆街」兩個字用左加大字形同紅色字體，仲放左好多個感歎號喺句子末。
Alex拎上手睇左一眼，晴晴又攞返部電話過嚟，補充話：「唔好講個仆街，一講就火滾！」
十年前，晴晴佢阿媽患左重病，好需要人照顧同需要錢去醫病，而佢老豆林哲竟然喺嗰個時候，粒聲唔出同左個台灣女人走佬，丟低晴晴兩母子同留低左間唐樓，其他就連少少錢都無留低。
當時晴晴只得十二歲，一個人獨立照顧阿媽，佢地仲賣左層樓去籌錢醫病，可惜嘅係，佢阿媽最後都因為個病而過左身。
晴晴呢一生都唔會原諒佢個仆街老豆。
二人穿過酒吧街，途中經過一間酒吧，有隊band入面喺度演奏，有啲音樂聲傳左出嚟。
「咦，呢首咪係你聽過嗰首歌？」
晴晴認得呢首歌，佢喺同Alex上床嗰陣聽過。
首歌叫Wish you were here。
「算啦，你都聽唔到，應該唔知我講邊首。」晴晴繼續前行，但Alex卻停左落嚟，透過酒吧落地玻璃窗注視台上唱歌嘅女歌手。
係佢？Priscilla？
個女歌手都唱完一首歌，望見酒吧外Alex嘅身影，便快步行左出去。
Alex見對方行緊出嚟，第一時間轉身離開，可惜衰太心急，無留意晴晴喺隔離，結果一轉身就撼到對方個頭。
兩條友痛到標眼水咁滯，Alex被撞到暈托托，想走但暈得滯行唔到。
「Alex，係咪你呀？」個女歌手出到嚟，拍一拍Alex膊頭。
Alex等無咁暈，先慢慢擰轉身，對住對方點頭打招呼。
「哈哈，真係你呀！好耐唔見啦！你最近點呀？」
Alex看著眼前呢個女人，有啲緊張又有啲興奮。
個女歌手望一眼晴晴，問Alex：「呢個你朋友呀？」
Alex想開聲，可惜佢聽唔到嘢，根本唔知對方講緊咩。
「係呀係呀，我係佢朋友呀，我叫晴晴。」晴晴代答。
「你好，我叫Priscilla。」
Priscilla身材高高瘦瘦，瓜子臉鼻高高，外貌都算標誌。
晴晴觀察到Alex見到呢個Priscilla後，就成個人硬曬軚，估緊佢地關係應該唔簡單。
「Alex，做咩唔出聲？你係咪仲嬲緊我？」Priscilla歎一口氣講，「其實嗰陣時我地唔係有心飛起你，你都知我地之後都想揾返你一齊夾band架，只係你出左完車禍後，後尾連學都退埋，電話又改曬，我地想揾你都揾唔到。」
晴晴心諗，呢個Priscilla竟然用把口同Alex講嘢，唔通佢唔知Alex係聾嘅？
Alex見到Priscilla好似講左好多嘢，無奈佢一句都聽唔見。
呢個時候，一個男人行出酒吧，行埋嚟好自然咁攬住左Priscilla條腰：「Priscilla，你出左嚟嘅？」
「係呀，我見到個朋友，出嚟打聲招呼。Alex，呢個係我男朋友Peter。」
「Hi Alex。」Peter同Alex揮手打招呼。
Alex生硬地點頭回應。
「係呀，下一首歌到返我地啦，都係快啲入去準備啦。」Peter同Priscilla講。
「嗯，好呀。」
Priscilla臨返入酒吧前，遞自己部電話俾Alex：「留個電話呀，得閒可以約個時間出嚟傾下計。」
Alex接過電話，諗緊對方係咪問自己攞電話號碼。
晴晴拉一拉Alex衫尾，偷偷地喺身後show出自己部電話嘅屏幕，提醒對方：「人地問你攞電話。」
Alex如夢初醒般將自己電話號碼輸入到Priscilla電話度。
「好啦，我要返去唱歌，係咁先啦，byebye。」Priscilla道別後，就返入酒吧繼續演出。
Alex望多兩眼Priscilla嘅背影，先捨得離開。
喺佢耳仔未失聰之前，佢喺學校夾過一隊band，當時個女主音就係Priscilla。
嗰陣Alex彈結他好叻，幾乎咩歌都識彈，因此Priscilla好迷戀佢，而佢都暗暗地鐘意對方，二人就差一句告白就可以喺埋一齊。
可惜嘅係，一場車禍令佢喺醫院昏迷左兩個月，醒返佢先知道自己耳仔失聰以及父母去世，仲有得知喺昏迷期間，自己隊band贏左一個比賽，但佢係無份嘅。
然而一直以嚟，其實佢嘅隊友都唔知佢耳仔聾左。當其時幾個樂隊成員飛起佢並唔因為知道佢聾左，只係佢地單純有個音樂比賽好想參加，但見Alex昏迷不起，於是先求其揾個人代替。
後尾完左個比賽佢地都有主動揾返Alex，只係Alex逃避唔見。
因為Alex唔想俾大家知佢聾左，佢唔想俾大家知佢唔能夠再好似以前咁彈結他、夾band，尤其係佢唔想比Priscilla知。
佢唔想一個鐘意同仰慕自己嘅人知道，自己已經變左一個連聲都聽唔到，以後連一首歌都彈唔到嘅廢柴。
後來佢好快就退左學，改埋電話，同以前嘅band友斷絕聯絡。
雖然時間過左七年，但佢嗰心其實一直都無忘記當初喜歡嘅人。
（場外聲明：呢個本來係一個少少甜多多情嘅愛情故事，然而系統將呢個故定死為甜故而無法再修改，因此免得俾大家有錯誤期望，我要提提大家故事後面仍然會有甜，但篇幅是以男女主角的愛情故事為主。）