只有做愛的時候我才聽得見聲音: （17）

屋企多左隻貓，Alex唔敢打開房門訓教，驚隻貓趁夜晚「鼠」入嚟間房賴屎賴尿。

尤其係佢間房有音響有喇叭又有唱片，都係佢珍而重之嘅嘢，更加就唔能夠俾隻貓隨便入嚟整污糟。

天光了。

一覺訓醒，Alex行出房門，經過廚房去廁所刷牙洗臉，見到何管家喺度拖地。

佢問對方點解一大早就喺度拖地，何管家話啱先自己煮緊早餐，隻貓突然跳上嚟搶嘢食，仲打瀉曬啲材料。



Alex再問埋何管家琴晚隻貓有無周圍屙屎屙尿，對方話貓仔喺客廳同洗手間門口屙左督屎同尿，但全部都已經清理好。

Alex心諗自己琴晚閂門訓教呢個決定果然係正確嘅。

佢刷完牙就食早餐，貓仔一聞到香味就即刻蒲頭，失驚無神跳上Alex大髀，再擒上張檯爭食Alex面前嘅火腿通粉同牛油西多。

身手仲十分敏捷，左腳嘅傷似乎無影響到佢嘅行動力。

Alex都反應迅速，第一時間捉返隻貓仔落地下。



「喵~~~喵~~~」

貓仔搖搖尾巴，用楚楚可憐嘅眼神抬頭望住Alex，發出喵喵喵嘅叫聲，似在乞求對方分少少早餐俾佢食。

「喵~~~」

Alex就聽唔到貓叫，所以嘈唔到佢食早餐。

隻貓叫左一陣見無人理，又跳上佢大髀爬上張檯度，呢樣嘢就令佢好困擾，唯有就叫何管家揾塊麵包引開隻貓。



啲貓認嘢食唔認人，總之邊個俾嘢佢食就跟邊個，話咁易就俾幾塊麵包條引走左。

不過得咁少麵包邊夠食，貓仔三幾啖就食完，然後又返轉頭到飯廳揾Alex搲嘢食。

Alex叫何管家引隻衰嘢上樓上，最後要咁先可以安安靜靜食完個早餐。

同往常一樣，食過早餐佢就會到地庫gym房健身。佢先上房換件運動衫，點知行到房門前見到地下濕左一噠，仲傳出「壓壓地」嘅味道。

好彩佢眼利，如果唔係就踩中貓尿。

佢心諗咁樣唔係辦法，唔可以由得隻嘢喺佢屋企到處屙屎屙尿，返入房佢都唔換衫做gym住，而係上網揾下點樣教啲貓去廁所。

網上面有好多關於養貓嘅心得同資料，大致了解過後佢列左一張清單，叫何管家照住張單去寵物店買個盆同啲貓砂，仲有啲貓糧返嚟。

到左下晝，何管家照吩咐出左去買嘢，間屋就得返Alex同貓仔兩個。



前者就喺間房睇書，後者就被放置喺客廳自己同自己玩。

「滋滋—滋滋—」

睇睇下書，Alex感受到放喺身旁嘅電話喺度震動。

係晴晴發message過嚟。

「貓仔乖唔乖呀？你有無餵嘢俾佢食？同埋佢依家喺度做咩呀？」

Alex回覆：「唔乖，有，唔知。」

唔洗五秒，電話又震，晴晴覆返話：「我依家返工好悶，你可唔可以影下貓仔俾我睇下，俾我解下悶？」



「唔好。」

「影啦影啦，我想睇下貓仔呀！」晴晴重複連續發左五條message過去。

為左唔俾晴晴短訊轟炸，Alex只好行落客廳影幾張相來滿足下對方。

貓仔就喺大廳度自得其樂，氹氹轉玩緊自己條尾。

Alex隨手影左幾張貓相發過去。

「你影得好濛，可唔可以行近少少影清啲？」

Alex zoom近少少，等貓仔靜止唔郁嗰陣就快手影左幾張。

跟住晴晴又提出新請求：「不如你開cam，我想同貓仔Facetime呀。」



「點解你咁多要求架？」Alex回覆話。

「開啦開啦，求下你啦！」晴晴一連用左幾個表示請求嘅表情符號。

Alex勉為其難咁開左Facetime俾晴晴同貓仔見面。

貓仔哄近電話屏幕聞左一聞，發現唔係食得嘅嘢，施施然調頭走開左。

Alex一路影住，等晴晴望得到。

一見到貓仔，返工返到苦悶嘅晴晴成個人就開心返曬。

佢地FaceTime左差唔多半粒鐘，如果唔係晴晴俾老細發現佢匿埋偷懶，佢都唔捨得收線。



時間已經係黃昏時分，日落餘暉穿透落地玻璃窗，映照到屋內。

Alex背靠梳化背，遠望天空橙黃色嘅晚霞，隻貓仔就玩到攰，就喺佢大髀度訓著左，搞到佢想起身都起唔到。

佢看著貓仔訓教嗰樣，其實係幾得意嘅，呢點就同晴晴一樣，唔煩嗰陣都係幾可愛嘅。