只有做愛的時候我才聽得見聲音: （14）

「滋滋—」

Alex感受到褲袋入面電話喺度震動，係來自晴晴發嘅短訊。

「你成日嚟呢間餐廳食飯架？」晴晴有時面對面會用WhatsApp嚟同Alex交流，咁樣比喺電話打完字再show出嚟方便。

「間唔中。」Alex用返WhatsApp回覆。

「除左呢間呢，你仲鐘意去邊個間食呀，係咪多數都係食高級嘢？」



「唔係。」

佢地兩個面對面咁咁用電話send message，加上Alex有少少唔耐煩個樣，出面啲人唔知情況，可能會以為佢地係一對冷戰緊嘅情侶，大家鬥緊氣唔出聲，淨係用WhatsApp講嘢。
 
侍應陸續遞上餸菜。

晴晴同佳瑩嗌得唔多嘢，只係嗌左兩碟意粉同兩份沙律。

至於Alex就點左一份牛扒、一份闊條麵同一份黑松露雜菌，而何管家就年紀大，食唔到咁多嘢，只係嗌左個意粉。



「你一個食咁多食唔食得曬呀？」晴晴見到Alex份牛扒煎得幾靚，叫對方share一塊嚟食下。

Alex勉為其難咁分左一細塊俾佢，晴晴禮尚往來分返少少意粉俾Alex。

「少爺佢唔鐘意食意粉。」何管家話。

「係咩？咁我夾返走啦。」聽完何管家咁講，晴晴就夾返走啲意粉。

Alex見到對方呢個舉動，都唔知俾咩反應好。



成餐飯落嚟，大家都算係有講有笑，氣氛都尚算融洽。

食飽曬之後，兩邊分開埋單。

區區兩碟意粉同沙律埋單就差唔多三千幾四千蚊，俾錢嗰陣晴晴都係有啲肉赤，貼士都唔捨得俾多。

相比起晴晴，Alex好爽手就埋單俾八千蚊，仲醒左兩百蚊貼士俾個侍應。

檯面食剩一小撮意粉同兩個餐前提供嘅蒜蓉包，晴晴見食得唔好浪費，就叫侍應幫佢打包。

Alex坐喺隔離，抱以奇異嘅目光，心諗剩返咁少都打包，好似有啲肉酸。

晴晴無理別人目光，照樣打包拎返屋企。

然而佳瑩因為男朋友急call，所以自己一個急急腳走先。



晴晴就問Alex可唔可以叫何管家車埋佢返屋企，Alex其實唔多願意，不過費事拒絕，就話無問題。

何管家一個人去停車場攞車，Alex佢地就企喺馬路邊等。

晴晴食完一餐好嘢，感到十分滿足。

可惜，呢種滿足同快樂卻喺幾秒之後，被憤怒情緒徹底蓋過。

二人等緊嘅時候，突然有一個年約六十歲嘅男人，行到晴晴面前。

個男人身邊有一個望落比佢年輕嘅老婆同一個約莫十歲嘅細路女。

呢對夫婦架車就泊喺路邊附近。個男人落車見到晴晴，就行過嚟打招呼。



「晴晴，好耐無見。」。

晴晴一見到呢個男人，面色一沉，調轉身就走。

「晴晴！」個男人急步上前，擋住晴晴。

「你想點呀？你個仆街唔係去左台灣風流快活架咩？你返嚟做咩呀？」晴晴語氣兇惡，眼神充滿怒火。

「我...我最近搬左返嚟香港。你呢...你幾好嗎？」

「問我幾好嗎？你想我點答你？係咪想我答你我無左個老豆之後，生活過得好好，等你良心好過啲呀？唔好意思我講錯左，你個仆街邊有良心？係有良心嘅，你當日就唔會拋棄妻女啦！」

企喺一邊嘅Alex完全唔知咩事，唔知點解晴晴無端端會同個陌生男人嘈起上嚟。

呢個男人其實係晴晴嘅老豆，林哲。



「對唔住，係我唔啱，我知你唔會原諒我…」

「錯，我唔單止唔會原諒你，我仲會憎你一世！仆街啦你！」晴晴講完句粗口，嬲得滯一腳狠狠咁踢向林哲。

林哲膝頭哥中左一腳，差啲成個人單膝下跪。

「你幹嘛無端端打人？你神經病嗎？」林哲個老婆即刻扶起佢。

「你幹嘛踢我爸爸…」個細路女指住晴晴話。

「無事無事！一場誤會而已，沒事，我們進去吃飯吧。」林哲趌下趌下咁帶住老婆同個女，轉身行入餐廳。

Alex仍然係唔知發生左咩事。



等林哲入左去餐廳，晴晴就喺電話打字問Alex：「你有無鎖匙？」

Alex摷摷褲袋，搖搖頭。

咁啱地下有舊石仔，晴晴隨手執起左，交俾Alex，然後拉對方到林哲架豐田車前。

「你想做咩？」Alex用電話問。

晴晴用動作示範左一次佢想做咩，佢用自己條屋企鎖匙，喺林哲架車車身上劃左一條長長嘅花痕。

Alex拉住晴晴，想阻止佢，但被對方一手甩開。

「你唔幫我我自己嚟。」晴晴出盡力咁用鎖匙刮花車身。

「喂！你兩個做咩呀？」

呢個時候，兩個巡邏緊嘅差佬離遠一百米，見到佢地喺度搞人架車。

「大獲！」晴晴拿拿臨從Alex手中攞舊石仔，一嘢擲碎個車窗玻璃，跟手就拉住Alex逃跑，「走啦仲望！」

「仆街！你兩個唔好走呀！」兩條差佬立刻追上前。

晴晴同Alex 拔足狂奔，拼命逃跑。