十年後的舊情復熾: 情人節

這個情人節是星期日。中午，光與父母飲茶。光被問到感情生活，光只說沒有拍拖，今晚沒有約會就算。傍晚，他回到自住的家中，他戴起新買的戒指，開啟電腦望著早兩天在家中和MS張拍的親密照。一邊看，光心中泛起古怪的感覺。往日有女朋友時，光最怕的就是情人節。因為要安排節目、送禮物，實在麻煩。這個情人節，明知有情人卻不能夠會面，那份空虛確是難受。他所買的情人節禮物，也只能在情人節前兩天的黃昏，趁MS張來家中幽會時送給對方。他緊記蕙的警告，不要跟MS張說甚麼承諾。即使MS張看似很開心，而且除下了結婚戒指，再戴上了新的戒指和他幹了一場，最後那隻戒指還是放在光書房的枱上。
 
一臉憂愁的光聽到電話響起，打來的是雲。
 
雲：喂你今晚有冇約？
 
光：冇呀。你想約我呀？
 
雲：係呀。不過唔係今晚。
 


光：幾時呀咁？
 
雲：其實係咁嘅。我老公話佢有個同事好索但冇拖拍，不如你識下佢。
 
光：下？你咁認真？
 
雲：唔想你咁DRY 呀嘛。佢大你兩、三年架，啱你口味。
 
光：咁古怪唔好啦。
 


雲：唔領情呀家下？
 
光：唔係唔領情，但係好古怪架嘛。
 
雲：咁搵多啲人囉。過兩個月我個仔生日你上來我屋企開生日會啦。我叫老公叫埋嗰個女仔來。咁咪冇咁ODD。
 
光：哦，生日會我就實到嘅。
 
雲：咁就得啦。咁你搞掂左嗰件事未？
 


光：咩嗰件事？
 
雲：你明架啦。
 
光：哦……差唔多啦。
 
雲：差唔多即係未啦。唔好再咁落去啦。佢唔係你想像中咁樣架。
 
光：唔……我盡快啦。
 
雲：我囝囝生日嗰時你搞掂到未？
 
光：我試下啦。
 
雲：冇得試，一定要！


 
光：好啦好啦。
 
雲：拿！你應承我架。
 
光：唔……
 
雲：一定要做到。
 
光：OK。我做埋公司啲野先，遲啲再講啦。
 
雲：好啦咁，BYEBYE。
 
光：BYEBYE。
  


 
光其實沒有公事趕著做。掛線後，他躺在牀上，更覺得寂寞。雲是他最好的朋友。兩人認識了這麼多年，除非以前拍拖時有女友在旁，否則他不可能在和雲電話聊天時這樣隨便找個藉口結束對話的。他現在經歷的事情和感受，竟不能跟最好的朋友談，甚至令他要逃避雲。
  
光睡了片刻，醒過來覺得肚餓，就到大快活買了一個飯盒回家。他一邊吃飯，一邊玩FACEBOOK。光見到蕙剛剛更新了STATUS，寫著：”開唔開心唔係由有冇一個男人喺身邊決定嘅”。這個STATUS下面有兩個COMMENT，第一個是蕙的朋友留下的：”對你呢講應該係由有冇三個男人喺身邊決定”。第二個COMMENT則是蕙的回應：”十個都滿足唔到呀而家。不過我以後要從良鳥”
  
光望一望FACEBOOK CHAT的顯示欄，見蕙在線，就發訊息給她。
光：冇人約？
蕙：大把人約。不過我冇應承。
光：IC。
蕙：你係咪好悶好唔開心呀？
光：嗯
蕙：明明有情人，但情人節冇情人喺身邊，仲要個情人可能同佢另一個情人慶祝緊。又真係幾可憐嘅。

見到蕙這段訊息，光突然發現，這一刻唯一明白自己的人竟是這位認識不久的蒲精。