［愛情純愛］既然忘記唔到佢，不如試下中意我⋯？: 157. 成了過去⋯

淚水將我嘅眼眶濕潤了，我用力地吸一口氣，喺我呼氣嘅時候，我渾身顫抖着；每講一個字嘅時候，都好似萬箭穿心一樣

我愈想令自己平靜落嚟，腦海中就愈係浮現出我同岑諾新一齊時嘅快樂

嗰種開心、嗰種甜、嗰種相處起嚟嘅舒服、嗰種可以依賴嘅感覺⋯全部，全部！都喺我嘅腦海中揮之不去

我以為，岑諾新同孫慧伶之間嘅感情係過去，我冇期望過自己要取代佢，我只係希望岑諾新係真係堅定咁選擇咗我⋯

但原來喺孫慧伶回頭嘅時候，岑諾新會輕易地將我鬆開⋯我同岑諾新之間嘅種種快樂同甜蜜，比唔上孫慧伶帶比佢一次又一次嘅難過





「詠妍，我有邊度唔好？係唔係我唔夠好？」我不禁開口問詠妍

「冇，你冇嘢唔好⋯」詠妍輕拍着我嘅背想安慰我，「你好好，係佢地唔好咋⋯」

「嗯⋯！」我強忍着淚點頭

「真係，我地倩盈冇嘢唔好⋯」詠妍輕輕搖頭

「嗯⋯！」我強擠出笑容，點一點頭





「嚟緊考試啦，考完試再諗啦好唔好？」詠妍柔聲地對我講道

「嗯，好。」我點點頭

嚟緊考試啦，我唔可以因為戀愛事而耽誤咗學業，今年我中五啦，一定要努力讀書，宜家我要做嘅，係專心考試

我番到課室，就當一切都好似冇發生過一樣，我坐低喺自己嘅座位，整理好自己嘅書放到櫃桶

岑諾新企起身，同楊朗然一齊行出課室；喺佢行出課室後，我不禁望向佢嘅座位





「我地宜家，完全係陌生人⋯」我喺心裏難過地講道

我同岑諾新就好似番到去以前嘅日子一樣，我地係陌生人，係同班同學，我地之間唔會有交集⋯

我地之間嘅事，就係咁樣成為咗過去⋯

⋯

Lunchtime嘅時候，希童執好嘢行到我嘅座位前

「倩盈～你同我地食飯定同佢食呀？」咩都唔知嘅希童就好似平日一樣問道

我同岑諾新都望向希童，我唔想氣氛尷尬，只好一笑

「我同你地食啦～」我微笑道





喺希童行過去搵樂恩後，我緩緩地望向岑諾新，我同岑諾新嘅視線對上，我地都冇同對方講嘢，岑諾新先一步將視線移開，起身同楊朗然佢地一齊走

我同佢地一齊食lunch，喺餐廳等嘢食嘅時候，我同詠妍對望咗一眼

「呃⋯係咁嘅⋯」我緩緩開口，樂恩同希童都望住我，「我嚟緊應該都會同大家一齊食飯㗎啦，因為我同岑諾新⋯分咗手啦⋯」

喺我講出「分咗手」呢三個字時，我感覺到氣氛一下子凝重起嚟，我都不禁深呼吸；希童同樂恩都愣住了

「係琴日嘅事，我地分咗手，就係咁～」我微微一笑講道，「你地唔洗擔心，我Okay。」

「你唔Okay要同我地講知唔知呀！我地都喺度！」希童頓時安慰我一樣講道

「嗯！你唔好死撐住！」樂恩都講道





「嗯！我知啦！」我笑道，有佢地喺我身邊真係好

「叻呀你，揀喺考試前個半星期分手⋯」詠妍無奈地講道，「專心考試啦！」

「知道！」我提手比一個敬禮，「我會努力溫書考試㗎啦！唔洗擔心我！」

⋯

放學嘅時候，我同詠妍佢地一齊走，一切就好似番到去我地未一齊之前一樣

放學番到屋企，就拎功課出嚟做，做完功課就乖乖溫書

好似只有努力咁溫書，先可以麻木自己嘅感覺，當自己冇同岑諾新一齊過，當自己一切正常一樣

平日喺學校，我就好似咩事都冇一樣，同詠妍佢地一齊講笑一齊玩，專心上堂聽書





去到夜晚夜深人靜嘅時候，先可以偷偷落淚，喺冇人知道嘅情況下抹眼淚

當大家都覺得我已經冇事嘅時候，其實只有我自己知道，我仍然心痛得要命⋯

呢一個星期，我都係咁樣過⋯

「唔知佢同孫慧伶⋯」今日上堂嘅時候，我托着腮不禁諗道

我偷偷地偷瞄岑諾新一眼，佢一手拎住筆，一手托住下巴

好似都冇見佢同孫慧伶一齊，佢地好似好少接觸一樣，唔知佢有冇同番孫慧伶一齊⋯？

定其實佢已經同番孫慧伶一齊，只係唔想比人話佢一分手又即刻拍拖⋯？





佢會唔會有一刻，顧慮到我嘅感受⋯？

原來咁樣，我地就分開咗一個星期⋯




IG Link: https://www.instagram.com/nd_cotttoncandy/?hl=zh-t