［愛情純愛］既然忘記唔到佢，不如試下中意我⋯？: 156. 各自的心痛

我同蔣倩盈之間嘅感情，原來比唔上一個張景彥⋯係唔係因為我對蔣倩盈唔好？唔夠好？定比唔上張景彥嘅忽然回頭⋯？問題出喺邊度⋯？

「我，考慮得好清楚⋯！」我諗起蔣倩盈對我講嘅說話

佢考慮得好清楚⋯佢最後喺我同張景彥之間，揀咗張景彥⋯

「嘖⋯」我心裏嘅煩躁湧上嚟，我將手上戴住嘅手繩一下子扯咗落嚟掉到枱上

我一個人留喺房中，直到外面天黑都冇踏出過房門半步，我心裏剩下嘅全部都係煩躁





我唔明點解佢最後揀嘅會係張景彥，佢真係唔記得張景彥令佢有幾傷心係唔係⋯？

如果我冇同孫慧伶抽到同一組做Physics project，嗰日我早啲執完嘢冇留喺視藝室⋯

我明明都知道，張景彥對蔣倩盈留下嘅嘅啲咩傷痕⋯但佢同咗我一齊之後，委屈都唔同我講⋯

係我唔好⋯係我令佢又一次受委屈⋯係我嘅錯⋯

「嘖⋯」我又一次覺得煩躁，但今次我係對自己煩躁





「叩叩。」我嘅房門傳嚟兩聲敲門聲，門打開嘅同時，外面客廳嘅光從門縫滲入嚟，「哥哥，媽媽話買外賣番嚟，問你食咩～」

「唔洗。」我輕皺起眉頭唔耐煩咁講道

「但係—」「都話唔洗！」

我一時控制唔到情緒，直沖嵐嵐發火

「哦、哦⋯」嵐嵐比我突如其來嘅怒氣嚇咗一跳，頓時乖乖點頭行番出去，將我嘅房門閂上





「哈⋯」我痛苦地呼一口氣，心臟好似比人揪成一團一樣，胸口好似有一塊大石壓住一樣而發悶

心痛，撕裂般嘅痛⋯我都唔知我到底係因為同蔣倩盈分手而心痛，定因為佢其實仲中意張景彥而心痛⋯

X⋯X⋯X

我睡房嘅房門緊緊地閂上，喺昏暗嘅環境下，我嘅眼淚完全止唔住

我坐喺冰涼嘅地板上，眼淚一直滑過我嘅臉頰滴喺我嘅手背上

我一直用紙巾抹眼淚，我其實心入面係真係中意佢⋯！真係⋯！比中意張景彥嘅時候更中意佢⋯！

但我同岑諾新，分手啦⋯

我同岑諾新，到此為止啦⋯





⋯

翌日

我冇同岑諾新一齊番學，我特登早咗出門口，唔想同岑諾新碰面

番到課室，我見到我旁邊嘅位置空盪盪的，佢未番嚟⋯

我將我嘅嘢放低喺枱上，然後去開locker

「都唔知今日點算⋯」我不禁諗道，都唔知要點樣面對岑諾新

「早晨！」我聽到詠妍嘅聲音從我身旁傳嚟，原來詠妍番嚟啦





「早⋯」我有啲不在狀態，我望向詠妍，勉強地擠出一個微笑

「唔夠瞓呀你⋯？」詠妍見到我嘅反應，一臉訝異地講道

「唔係⋯」我緩緩搖頭

此時門口傳嚟開門聲，我同詠妍不約而同地回頭望向課室門口，岑諾新番嚟啦⋯

我同岑諾新對上視線，一秒後我地同步地將視線移開

「仲未好番⋯？」詠妍細聲地問我

「陪我去toilet⋯」我微微一笑講道，然後將喺locker拎出嚟嘅嘢放番埋位

我唔敢望岑諾新，我放低啲嘢後直接行出課室，喺推開女廁嘅門行入女廁後，我鬆咗一口氣





「我地冇好番，亦唔需要和好啦⋯」我望向詠妍直接地對佢講道，「我同佢⋯我同岑諾新，分手啦⋯」

我對詠妍講出呢個事實時，我感覺到我嘅聲線都微微顫抖着

詠妍不禁感到愕然，佢

「點、點解呀⋯？」詠妍一臉愕然，「點解咁突然？點解分手？你講定佢講？」

「係我講分手㗎⋯」我低着頭，不禁紅了眼眶，「我放佢番去孫慧伶嘅身邊啦⋯」

我提起孫慧伶嘅名字，腦海中浮現出嚟嘅都係嗰一日嘅畫面⋯孫慧伶知道岑諾新嘅好啦終於，所以番轉頭搵佢⋯岑諾新對孫慧伶嘅中意，大概一直都收喺心底⋯

或者連岑諾新自己都覺得佢已經將對孫慧伶感情忘記咗、放低咗⋯直至孫慧伶搵番佢，直到嗰一日⋯





「倩盈⋯」詠妍好似都唔識安慰我，只可以輕輕地攬住我，拍着我嘅背

「我冇事⋯」我咬緊牙關搖搖頭，輕輕地推開詠妍

「你唔好講大話啦⋯！」詠妍心疼地將我嘅頭輕按到佢嘅膊頭上，比我靠住，「我唔係第一日識你⋯你唔好將所有事都收起晒啦⋯！」

「我真係冇事⋯」我合上雙眼，艱難地開口講道，「但係，心入面好難受⋯真係㗎⋯！真係好難受⋯！」




IG Link: https://www.instagram.com/nd_cotttoncandy/?hl=zh-t