［愛情純愛］既然忘記唔到佢，不如試下中意我⋯？: 158. 回憶起過去

X⋯X⋯X

我同蔣倩盈分手啦⋯

我將我嘅難受收到最底最底嘅位置，平日番學嘅路上我都有啲唔習慣，唔習慣佢唔喺我嘅身邊⋯

記起當日蔣倩盈同我講分手，或者佢真係考慮咗好耐先決定好

我偶爾會偷望佢一眼，我心入面對佢，係中意⋯





如果當日我同佢講我中意佢，會唔會可以將佢留住⋯？

楊朗然佢地知道我同蔣倩盈分咗手，但男仔之間都唔會有太多嘅安慰，我嘅難受佢地唔會明白⋯

「大佬！點呀食咩呀？」楊朗然行過嚟問我

「是旦。」我順口地回答道

我同蔣倩盈之間，又慢慢地變得疏遠⋯





我冇同任何人講過「我中意蔣倩盈」之類嘅說話，因為喺大家嘅眼中，我同蔣倩盈都係一對

但我連對蔣倩盈都冇講過「我中意你」之類嘅說話，因為我覺得佢會感覺到

我中意蔣倩盈，真係⋯但好似已經冇辦法再話比佢知我中意佢嘅呢一份心情⋯

「我地宜家，完全係陌生人⋯」我喺心裏有啲心痛地講道

我同蔣倩盈⋯就好似番到去以前嘅日子一樣，我地係陌生人，係同班同學，我地之間唔會有交集⋯





我地之間嘅事，就係咁樣成為咗過去⋯

偶爾同蔣倩盈對上視線，我都會下意識迴避⋯我怕見到佢眼中冇我嘅樣子⋯

「唔知佢同張景彥，係唔係真係一齊番⋯」今日上堂嘅時候，我嘅手托住下巴不禁諗道

我用眼睛嘅餘光望咗蔣倩盈一眼，佢手托住腮，一臉認真地聽書

分咗手嘅呢一個星期，我冇見到佢同張景彥一齊⋯什至見到面都冇講嘢⋯

佢有冇同番張景彥一齊？定佢想再過一段時間先再同張景彥一齊⋯？唔知佢係唔係因為唔想喺同我分開之後一段短時間內就同張景彥一齊⋯？

佢會唔會都同我偶爾諗起佢一樣，偶爾諗起我⋯？佢仲記唔記得，我地之間嘅開心事⋯？

佢心入面，有冇一刻，為我留下一個位置⋯？





⋯

下個星期中就考試，今日係清locker嘅日子，大家離開學校嘅時候都拎住一大疊書，都係唔早啲清locker嘅教訓

我呢幾日一直每日清啲每日清啲，今日係最後一日，要拎嘅嘢已經唔係好多，至少雙手都可以騰出嚟唔拎咁多嘢，放晒喺書包入面就好

我離開學校搭巴士番屋企，我企喺下層冇上去，我企喺輪椅靠板着對面，望向窗外時見到蔣倩盈抱住一個箱上車

蔣倩盈拍完卡後冇上上層，反而行去後方坐低

「我地真係分手啦⋯」喺啱啱視線對上，但佢迅速移開視線嘅時候，我不禁喺心裏講道

感覺一切好似好唔真實，但我同佢的確分開啦⋯一開始一齊嘅時候感覺都好唔踏實，但慢慢地又接受咗





如果佢冇提出要試下真係一齊，咁今日我地就唔會咁樣分開，用呢種不歡嘅形式分手⋯

喺巴士到站後我先一步落車，行喺蔣倩盈嘅前方

我知道佢就行喺我嘅身後，我想回頭望佢一眼，但我卻冇勇氣回頭望佢

我有啲掛住以前我地一齊放學番屋企嘅時光，嗰段日子顯得更外美好⋯

X⋯X⋯X

岑諾新行喺我嘅正前方，我同佢相隔咗三步嘅距離，佢冇回頭望我，佢唔知道，我沿路上都將目光落喺佢身上⋯

明明講分手嘅係我，但唔捨得嘅都係我，真係中意佢嘅，都係我⋯

「就算佢回頭望我一眼都好⋯」我明明知道冇可能，但都係忍唔住咁樣諗





我手上抱住一個細紙箱，入面有五、六本重嘅書，我唔想放佢地喺書包，所以揀咗手捧住

我嘅目光離唔開岑諾新嘅背影，完全冇注意到紙箱嘅底要爛

「啪！」紙箱中嘅書直接跌到地上，我一臉無言咁望住地上嘅書

我蹲低喺地上，將紙箱放到路邊，然後將書本逐本執起

「睇嚟都係要捧住番屋企⋯」我一邊執書一邊無奈地講道

忽然一個身影擋喺我前面，擋住咗光嘅來源，我緩緩抬頭，見到岑諾新企喺我面前，佢蹲低幫我手將啲書執起

「唔該⋯」我攬住書企起身





岑諾新企喺我面前，我企喺原地，我地兩個都冇行開，我抬眼望向佢

感覺岑諾新好啲咩想同我講一樣，我有啲期待佢會同我講啲咩

「如果佢話佢同番孫慧伶一齊嘅話⋯」呢個想法喺我腦海中一閃而過，我期待嘅心情頓時消失得無影無蹤，我微微耷低頭，緩緩開口道：「唔該⋯我走先啦⋯」

我繞過佢從佢嘅身旁走過，我先唔想聽到關於佢同孫慧伶嘅事⋯

所有事，我都唔想理⋯宜家我淨係想好好咁溫書應付考試，其他嘅嘢，我都冇心神去多理⋯

「先過咗呢兩個星期嘅考試再算⋯」我喺心裏對自己講道




IG Link: https://www.instagram.com/nd_cotttoncandy/?hl=zh-t